Jesúzaꞌ chzaklebi kwineꞌ to yag uva
15
’Nadꞌ nakꞌ ka yag uva daa nak dowalj, naꞌ X̱aꞌnaꞌ nakeꞌ ka beenaꞌ chaz chaaṉan.
2 Naꞌ yogꞌḻoḻ xozꞌ xkaꞌinnaꞌ daa bi chbia, chc̱hogueꞌn. Naꞌ diikaꞌ chbia, chonshaoꞌcheꞌn kwenc̱he zizikli kwian.
La vid y las ramas (Juan 15.1-17)
3 Naꞌ leꞌ, nakle ka xozꞌ xkaꞌinnaꞌ daa chbia, daa bzenagle ka nak dillꞌkaꞌ beꞌlenꞌ leꞌ.
4 Ḻi soatezi soa gonle nadꞌ txen, naꞌ kaꞌkz nadꞌ soatezi soalenꞌ leꞌ. Ka xozꞌ xkaꞌinnaꞌ, shi bi ndiḻ nllagan xyaguinnaꞌ aga bi chbian, kaꞌkzan leꞌ shi bi soatezi soale gonle nadꞌ txen bi gak gonle daa chibaidꞌ.
5 ’Nadꞌ nakꞌ ka to yag uva, naꞌ leꞌ nakle ka xozꞌ xkaꞌinnaꞌ. Shi leꞌ soatezi soale gonle nadꞌ txen naꞌ nadꞌ soatezi soalenꞌ leꞌ, naꞌ gakle ka xozꞌ xkaꞌinnaꞌ daa chbiachga. Shi leꞌ bi nakle nadꞌ txen aga bi gak gonle.
6 Beenaꞌ bi goneꞌ ka dii le goneꞌ nadꞌ txen, nakeꞌ ka xozꞌ xkaꞌinnaꞌ daa ba bc̱hogueꞌ naꞌ ibillan, naꞌ yitopeꞌn wzaḻeen lo yiꞌnaꞌ kwenc̱he sheyan.
7 ’Shi leꞌ soatezi soale gonle nadꞌ txen naꞌ toshiizi chzoale xtillaanaꞌ, ḻi iṉab daa cheenile naꞌ gakan.
8 X̱aꞌnaꞌ choꞌe balaaṉ katꞌ chonle dii wennaꞌ, naꞌ daa chonle kaꞌ, chliꞌlawin dii ḻi nakle nadꞌ txen.
9 Ka chaki X̱aꞌnaꞌ nadꞌ, kaꞌkzan chakidꞌ leꞌ. Ḻi soatezi soa gonle nadꞌ txen kwenc̱he gakbeꞌile chakidꞌ leꞌ.
10 Shi gonle daa nlliaꞌ biaꞌ gonle, naꞌch gakbeꞌile ḻe chakidꞌ leꞌ, ka chonꞌ nadꞌ, chonꞌ daa nllia X̱aꞌnaꞌ biaꞌ gonꞌ, naꞌ kaꞌ chakbeꞌidꞌ ḻe chakileꞌ nadꞌ.
11 ’Ba wniaꞌ leꞌ kaꞌ kwenc̱he yiba yizaklenileꞌ nadꞌ, naꞌ yiyoll yido soale mbalaz.
12 Naꞌ dgan nlliaꞌ biaꞌ gonle: Gaki ljwell-le ka chakidꞌ leꞌ.
13 Bich bi yeḻꞌ chaki dii xench de ka c̱he beenaꞌ chzani yeḻꞌ mban c̱heꞌnaꞌ gueteꞌ ni c̱he beṉꞌkaꞌ nllaguileꞌ.
14 Lenꞌ nakle beṉꞌkaꞌ nllaguidꞌ shi chonle ka nlliaꞌ biaꞌ gonle.
15 Bich gonꞌ leꞌ ka mos, ḻaꞌ beenaꞌ nak mos aga ṉezileꞌ bin chon x̱aneꞌnaꞌ. San nakle beṉꞌ nllaguidꞌ ḻaꞌ ba bzajniidꞌ leꞌ yogꞌ diikaꞌ wna X̱aꞌnaꞌ nadꞌ.
16 Aga lenꞌ wlejle nadꞌ, san nadaan wlejꞌ leꞌ naꞌ ba bzoaꞌ leꞌ shajle lljenle dii wennaꞌ daa bi te c̱heyi. Naꞌ X̱aꞌnaꞌ goṉeꞌ yogꞌ daa iṉabileneꞌ daa nakle nadꞌ txen.
17 Naꞌ dgan chlliaꞌ biaꞌ gonle: Gaki ljwell-le ganga.
Beṉꞌkaꞌ bi nombiaꞌ Chiozaꞌ gakzbangakileꞌ beṉꞌkaꞌ nak Crístonaꞌ txen
18 ’Bibi gakile shi beṉꞌkaꞌ bi nombiaꞌ Chiozaꞌ gakzbangakileꞌ leꞌ, ḻaꞌ ṉezkzile kaꞌkzan gokzbangakileꞌ nadꞌ.
Jesús advierte sobre la persecución (Juan 15.18-16.4)
19 Sheḻꞌ nakle ḻegakeꞌ txen naꞌch gakgakileꞌ leꞌ, sheḻꞌkaꞌ. Per daa ba wlejꞌ leꞌ kwenc̱he gakle nadꞌ txen, daan chakzbangakileꞌ leꞌ.
20 Ḻi lljadini ka ba wniakzꞌ leꞌ: “Aga iṉacho zakꞌchi to mos ka x̱aneꞌnaꞌ.” Ka ba bsakꞌziꞌgakeꞌ nadꞌ, kaꞌkzan wsakꞌziꞌgakeꞌ leꞌ. Naꞌ shi bzenaggakeꞌ choꞌa xtillaanaꞌ, ḻekzkaꞌ wzenaggakeꞌ c̱hele.
21 Yogꞌ diikin gongakileꞌ leꞌ daa nakle nadꞌ txen, ḻaꞌ bi nombiaꞌgakeꞌ X̱aꞌnaꞌ beenaꞌ bseḻꞌ nadꞌ.
22 ’Beṉꞌkaꞌ bi nombiaꞌ Chiozaꞌ, aga bi doḻꞌ napgakeꞌ sheḻꞌkaꞌ bi bidyeꞌlenꞌ ḻegakeꞌ xtilleenaꞌ. Per daa ba bidyeꞌlenꞌ ḻegakeꞌ xtilleenaꞌ bi gak iṉagakeꞌ bi chakbeꞌgakileꞌ chongakeꞌ dii malaꞌ.
23 Beenaꞌ chakzbanileꞌ nadꞌ lenkz X̱aꞌnanꞌ chakzbanileꞌ.
24 Aga bi doḻꞌ napgakeꞌ sheḻꞌkaꞌ bi bliꞌa yeḻꞌ wakkaꞌ daa konoṉꞌ gon ladjeꞌkaꞌ. Naꞌ ḻaꞌkzi ba bleꞌgakileꞌ diikaꞌ chonꞌ, biaꞌkzə chakzbangakileꞌ nadꞌ naꞌ X̱aꞌnaꞌ.
25 Chak dga kwenc̱he chillinin ka na ley c̱heꞌkaꞌ ganaꞌ nan: “Kon gokziꞌ gokzbangakileꞌ nadꞌ ḻaꞌkzi aga bi benꞌ c̱hegakeꞌ.”