Biyon Jesúzaꞌ to beṉꞌ lc̱hoḻ
9
Ka zej Jesúzaꞌ naꞌ bleꞌileꞌ to beṉꞌ byo beṉꞌ goljeꞌ nc̱hoḻeꞌ.
2 Naꞌ beṉꞌkaꞌ nakgakeꞌneꞌ txen cheꞌgakeꞌneꞌ:
―Maestro, ¿berac̱he golj beeni nc̱hoḻeꞌ, lla? ¿Anc̱hoḻeꞌ ni c̱he saaxya c̱heꞌnaꞌ, anti ni c̱he saaxya c̱he x̱axṉeekanꞌ, lla?
Jesús cura a un ciego (Juan 9.1-41)
3 Naꞌ cheꞌ Jesúzaꞌ ḻegakeꞌ:
―Aga ni c̱he saaxya c̱heꞌnanꞌ ni aga ni c̱he saaxya c̱he x̱axṉeekanꞌ, san kwenc̱he wliꞌlawi yeḻꞌ wak c̱he Chiozaꞌ lo yeḻꞌ mban c̱heꞌnanꞌ nakeꞌ kaꞌ.
4 Shlak ṉaa ni de latj, chiyaḻꞌ goncho xshin beenaꞌ bseḻꞌ nadꞌ. Ḻaꞌ wllin lla katꞌ kochno bi gak gon.
5 Shlak ni zoaꞌ yell-lioni nakꞌ beeniꞌ c̱he beṉꞌ yell-lioni.
6 Naꞌ ka biyoll wna Jesúzaꞌ kaꞌ, naꞌch blleꞌ x̱eneenaꞌ lo yonaꞌ naꞌ beneꞌ latꞌ beṉj kon x̱eneenaꞌ, naꞌch wdebeꞌn jalao beṉꞌ lc̱hoḻaꞌ.
7 Naꞌ chiꞌeneꞌ:
―Wyaj jadib jalawoꞌnaꞌ choꞌa tangaꞌ daa le Siloé ―naꞌ Siloé zejin Beṉꞌ Nseḻee.
Naꞌch wyaj beṉꞌ lc̱hoḻaꞌ jadib jalaweꞌnaꞌ, naꞌ ka bizee naꞌ, ba chleꞌileꞌ.
8 Naꞌch beṉꞌ wlill c̱heꞌkaꞌ naꞌ beṉꞌkaꞌ bleꞌgakileꞌneꞌ kanaꞌ nc̱hoḻeꞌ cheꞌgakeꞌ:
―¿Aaga beenin chbiꞌe chṉabeꞌ mechaꞌ?
9 Naꞌ baḻeꞌ cheꞌ:
―Awe, ḻenꞌ.
Naꞌ zi baḻeꞌ cheꞌ:
―Aga ḻenꞌ, per kaꞌtekzə nakeꞌ.
Naꞌ beenaꞌ chiꞌe:
―Nadꞌkzanꞌ.
10 Naꞌch wṉabgakileꞌneꞌ:
―¿Nakra gok ba chleꞌiloꞌ?
11 Naꞌ chiꞌe ḻegakeꞌ:
―To beṉꞌ le Jesús beneꞌ beṉjaꞌ naꞌ wdebeꞌn jalawꞌki naꞌch wneꞌ nadꞌ: “Wyaj ganaꞌ llia tangaꞌ daa le Siloé naꞌ jadib jalawoꞌnaꞌ.” Naꞌch wyaa naꞌ ka biyibaꞌn, naꞌ gok bleꞌidꞌ.
12 Naꞌch cheꞌgakeꞌneꞌ:
―¿Garaṉ beenaꞌ noꞌ kaꞌ?
Naꞌ chiꞌe ḻegakeꞌ:
―Bi ṉezidꞌ.
Wṉabyolli fariseokaꞌ nak gok bleꞌi beṉꞌ lc̱hoḻaꞌ
13 Naꞌch jwaꞌgakeꞌ beenaꞌ gok beṉꞌ lc̱hoḻ lao fariseokaꞌ.
14 Naꞌ llanaꞌ wdeb Jesúzaꞌ beṉjaꞌ jalao beenaꞌ kwenc̱he bleꞌileꞌ nakan lla chombaaṉgakeꞌ.
15 Naꞌch fariseokaꞌ ḻekzkaꞌ wṉabgakileꞌneꞌ nak gok chleꞌileꞌ. Naꞌ chiꞌe ḻegakeꞌ:
―Beenaꞌ biyoneꞌ nadꞌ wdebeꞌ beṉjaꞌ jalawꞌki, naꞌ ka biyibaꞌn gok bleꞌidꞌ.
16 Naꞌch baḻ fariseokaꞌ cheꞌgakeꞌ:
―Aga Chiozanꞌ bseḻee beenaꞌ, ḻaꞌ choneꞌ daa bi chiyaḻꞌ goncho llani chombaaṉcho.
Naꞌ zi baḻeꞌ cheꞌgakeꞌ:
―¿Nakra gon to beṉꞌ saaxya goneꞌ yeḻꞌ wak ka diiki chon beeni?
―¿Shera liꞌ? ¿Bi iṉoꞌ c̱he beenaꞌ ben ka chleꞌiloꞌ?
Naꞌ chiꞌe ḻegakeꞌ:
―Nadꞌ niaꞌ nakeꞌ to beṉꞌ chyix̱jee daa cheꞌ Chiozaꞌneꞌ.
18 Naꞌ beṉꞌkaꞌ chṉabiaꞌ beṉꞌ Israelkaꞌ bi wyajḻeꞌgakeꞌ shi dii ḻi gok beenaꞌ beṉꞌ lc̱hoḻ naꞌ ṉaa ba chleꞌileꞌ. Naꞌch goxgakeꞌ x̱axṉeenaꞌ,
19 naꞌ wṉabgakileꞌ ḻegakeꞌ:
―¿Abeenin xiiṉlenaꞌ, beenaꞌ nale nc̱hoḻeꞌ ka goljeꞌ? Naꞌ ¿nakra gok ba chleꞌileꞌ ṉaa, shkaꞌ?
20 Naꞌ x̱axṉeenaꞌ billiigakeꞌ xtilleekaꞌ:
―Ṉezintoꞌ beenin xiiṉntoꞌnaꞌ naꞌ goljeꞌ nc̱hoḻeꞌ.
21 Per aga ṉezintoꞌ nak gok chleꞌileꞌ ṉaa, ni bi ṉezintoꞌ non biyon ḻeꞌ. Ḻi iṉabileꞌ, ḻaꞌ aga nakeꞌ biꞌdoꞌ iṉacho bi gak iṉeꞌ non biyon ḻeꞌ.
22 Goll x̱axṉeenaꞌ kaꞌ daa chllebgakeꞌ beṉꞌkaꞌ chṉabiaꞌ beṉꞌ Israelkaꞌ, ḻaꞌ ba bgaaṉgakeꞌ dillꞌ nottezə beṉꞌ iṉeꞌ Jesúzaꞌ nakeꞌ Crístonaꞌ bi wlebgakeꞌneꞌ ganaꞌ chdop chllaggakeꞌ choeꞌḻwillgakeꞌ Chiozaꞌ.
23 Daan golltezə x̱axṉeenaꞌ: “Ḻi iṉabileꞌ, ḻaꞌ aga nakeꞌ biꞌdoꞌ iṉacho bi gak iṉeꞌ non biyon ḻeꞌ.”
24 Naꞌch dii yoblə goxgakeꞌ beenaꞌ gok beṉꞌ lc̱hoḻ, cheꞌgakeꞌneꞌ:
―Bzoashki Chiozaꞌ de tasc̱hiw shi leiloꞌ choo dillꞌ ḻi, ḻaꞌ ṉezintoꞌ beenaꞌ biyon liꞌ nakeꞌ beṉꞌ saaxya.
25 Naꞌch golleꞌ ḻegakeꞌ:
―Bi ṉezidꞌ shi nak beenaꞌ beṉꞌ saaxya. Ḻete dii ṉezidꞌ, goljꞌ nc̱hoḻꞌ naꞌ ṉaa ba chleꞌidꞌ.
26 Naꞌch cheꞌgakeꞌneꞌ:
―¿Beran benileꞌ liꞌ? ¿Nak beneꞌ kwenc̱he chleꞌiloꞌ?
27 Naꞌ chiꞌe ḻegakeꞌ:
―Ba wniakzꞌ leꞌ, naꞌ bi chziꞌle choꞌa xtillaanaꞌ. ¿Bic̱he cheenzile iṉiaꞌn dii yoblə? ¿Anti ḻekzkaꞌ lenle ba cheenile gonleneꞌ txen?
28 Naꞌch wṉegakeꞌneꞌ zibiaꞌ, cheꞌgakeꞌneꞌ:
―Linꞌ nakoꞌ beenaꞌ txen, san netoꞌ Moisézanꞌ nakntoꞌ txen.
29 Ṉezintoꞌ Chiozaꞌ wṉieꞌ Moisézaꞌ, san beenaꞌ, ni bi ṉezintoꞌ ga zee.
30 Naꞌch beenaꞌ gok beṉꞌ lc̱hoḻ chiꞌe ḻegakeꞌ:
―¡Nakkzan dii yibanicho daa bi ṉezile ga zaꞌ beenaꞌ naꞌ ba beneꞌ ka chleꞌidꞌ!
31 Ṉezkzicho aga chzenag Chiozaꞌ c̱he beṉꞌ saaxyakaꞌ, san chzenagueꞌ c̱he beṉꞌkaꞌ choeꞌlaꞌogakeꞌneꞌ naꞌ chongakeꞌ daa chazlallee.
32 Dezd ka wxe wzil yell-lioni biṉꞌ yenicho shi zoa beṉꞌ chak choneꞌ ka chleꞌi to beṉꞌ goljeꞌ nc̱hoḻeꞌ.
33 Sheḻꞌ beeni bi nakeꞌ to beṉꞌ bseḻꞌ Chiozaꞌ, ni to yeḻꞌ wak bi gak goneꞌ, sheḻꞌkaꞌ.
34 Naꞌch cheꞌgakeꞌneꞌ:
―Dezd ka goljoꞌ nakoꞌ beṉꞌ saaxya. ¿Anaꞌ chakiloꞌ wliꞌ wsediloꞌ netoꞌ?
Naꞌch bibejgakeꞌneꞌ ladjeꞌkaꞌ.
Beṉꞌkaꞌ nc̱hoḻ nniti yic̱hjlallꞌdoꞌekaꞌ
35 Naꞌ wṉezi Jesúzaꞌ bibej fariseokaꞌ beenaꞌ gok beṉꞌ lc̱hoḻ ladjeꞌkaꞌ, naꞌ ka billagueꞌneꞌ naꞌch chiꞌeneꞌ:
―¿Achonḻilalloo Beenaꞌ Bseḻꞌ Chiozaꞌ Yell-lioni?
36 Naꞌ beenaꞌ chiꞌeneꞌ:
―Beṉꞌdoꞌ, wnashki nadꞌ nora beenaꞌ kwenc̱he gonḻilallaaneꞌ.
37 Naꞌ cheꞌ Jesúzaꞌneꞌ:
―Ba bleꞌkziloꞌneꞌ, naꞌ ḻekzenꞌ chshaljlenoꞌ ṉaa.
38 Naꞌch lii bc̱hekꞌte xibeꞌnaꞌ lao Jesúzaꞌ, naꞌ chiꞌeneꞌ:
―Chonḻilallaa liꞌ, X̱anꞌ ―naꞌch beꞌlaweeneꞌ.
39 Naꞌch cheꞌ Jesúzaꞌ:
―Ba bidꞌ yell-lioni kwenc̱he wc̱hogloaꞌ c̱he beṉꞌ yell-lioni. Zaa kwenc̱he beṉꞌkaꞌ nak ka beṉꞌ lc̱hoḻ ileꞌgakileꞌ, naꞌ beṉꞌkaꞌ chakgakileꞌ chleꞌgakileꞌ yiyakgakeꞌ ka beṉꞌ lc̱hoḻ.
40 Naꞌch baḻ fariseokaꞌ lleꞌ naꞌ, ka bengakileꞌ chiꞌe kaꞌ, cheꞌgakeꞌneꞌ:
―¿Achakiloꞌ lenntonꞌ nakntoꞌ beṉꞌ lc̱hoḻ?
41 Naꞌch cheꞌ Jesúzaꞌ ḻegakeꞌ:
―Sheḻꞌ nakle beṉꞌ lc̱hoḻ, aga bi xtoḻꞌle de, sheḻꞌkaꞌ. Per daa nale chleꞌile, daan de xtoḻꞌle.