Jempl c̱he leej c̱he xilꞌkaꞌ
10
’Dii ḻi niaꞌ leꞌ, beenaꞌ bi choo choꞌa leej c̱he xilꞌkaꞌ san chiyiljlallee choꞌe gan yoblə, beenanꞌ beṉꞌ wbannaꞌ.
2 San beenaꞌ choo choꞌa leejaꞌ, ḻenꞌ ngoo lallꞌ nee chapeꞌ ḻegakb.
Jesús el buen pastor (Juan 10.1-21)
3 Naꞌ beenaꞌ chap choꞌa leej c̱hebkaꞌ chsaljeꞌn kwenc̱he choꞌe, naꞌ xilꞌkaꞌ lii chiyombiaꞌtegakb shiꞌenaꞌ. Naꞌ choꞌe le to tob naꞌ chbejeꞌ ḻegakb ḻoo leej c̱hebkaꞌ.
4 Naꞌ chde chbejeꞌ yogꞌ xilꞌ c̱heꞌnaꞌ naꞌch chbialoeꞌ laobkaꞌ. Naꞌ xilꞌkaꞌ xochi chjanogakb ḻeꞌ daa nombiaꞌgakb shiꞌenaꞌ.
5 Aga willjanogakb beṉꞌ yoblə, san wxoṉjdogakib ḻeꞌ daa bi nombiaꞌgakb shiꞌenaꞌ.
6 Bzoa Jesúzaꞌ jempli kwenc̱he bzajniileꞌ beṉꞌkaꞌ. Per ḻegakeꞌ aga wyajniꞌgakileꞌ bin zeji daa golleꞌ ḻegakeꞌ.
Jesúzaꞌ chapshiꞌe choꞌ ka beṉꞌ chapshiꞌe xilꞌ c̱heꞌ
7 Naꞌch chizeꞌ Jesúzaꞌ ḻegakeꞌ:
―Dii ḻi niaꞌ leꞌ: Nadꞌ nakꞌ ka choꞌa leej c̱he xilꞌkaꞌ.
8 Yogꞌ beṉꞌkaꞌ bid kanaꞌ biṉꞌ yidꞌ, nakgakeꞌ ka beṉꞌ wban. Naꞌ beṉꞌkaꞌ niaꞌ nakgakeꞌ xilꞌ c̱haꞌ bi bzenaggakeꞌ c̱hegakeꞌ.
9 Nadꞌ nakꞌ ka choꞌa leej c̱he xilꞌkaꞌ, naꞌ beenaꞌ gonḻilallee nadꞌ bi kwiayee, san gakeꞌ ka xilaa, banaꞌ mbalaz choob naꞌ chchejb choꞌa leej c̱hebaꞌ naꞌ chllelib dii cheej chaob.
10 ’Ka nak wbannaꞌ, zaꞌzeꞌ kwenc̱he kwaneꞌ naꞌ witeꞌ naꞌ wlliayee ḻegakeꞌ. San nadꞌ, zaa kwenc̱he wiꞌa to yeḻꞌ mban shaoꞌ c̱hegakeꞌ, naꞌ soagakeꞌ mbalaz.
11 Nadꞌ nakꞌ ka to beṉꞌ chapshiꞌe xilꞌ c̱heꞌnaꞌ, beenaꞌ ax̱t chzani yeḻꞌ mban c̱heꞌnaꞌ ni c̱he xilꞌdoꞌkaꞌ napeꞌ.
12 San beenaꞌ chap xilꞌkaꞌ ni c̱he mba laxjeꞌnaꞌ, ka chleꞌileꞌ ba zaꞌ to ba zṉia gaob xilꞌkaꞌ, lii chchooṉlallꞌtieꞌgakb naꞌ chxoṉjeꞌ daa bi nakgakb ba c̱heꞌ. Naꞌch chllin ba zṉianaꞌ chox̱ꞌb xilꞌkaꞌ naꞌ chsheshlesb ḻegakb.
13 Beenaꞌ chziꞌ laxjeꞌnaꞌ chxoṉjtezileꞌ xilꞌkaꞌ, ḻaꞌ daa ikaaz laxjeꞌnanꞌ chibaileꞌ, naꞌ bi chakileꞌ ḻegakb.
14 ’Nadꞌ nakꞌ ka to beṉꞌ chapshiꞌ xilꞌdoꞌ. Naꞌ beṉꞌkaꞌ chonḻilallꞌgakeꞌ nadꞌ nakgakeꞌ ka xilꞌdoꞌ c̱haꞌ. Nadꞌ nombiꞌa ḻegakeꞌ naꞌ ḻegakeꞌ ḻekzkaꞌ nombiaꞌgakeꞌ nadꞌ.
15 Ka chak c̱he X̱aꞌnaꞌ nombiꞌe nadꞌ, naꞌ nadꞌ nombiꞌaneꞌ, kaꞌkzan nadꞌ nombiꞌa ḻegakeꞌ, naꞌ chzanidꞌ yeḻꞌ mban c̱haꞌni ni c̱hegakeꞌ.
16 Naꞌ ḻekzkaꞌ zoach beṉꞌ yoblə, beṉꞌ ziꞌ gonḻilallꞌ nadꞌ, naꞌ ḻekzkaꞌ nakgakeꞌ ka xilꞌ c̱haꞌ, per biṉꞌ gakgakeꞌ txen xilꞌ c̱haꞌkaꞌ. Naꞌ chiyaḻꞌ gaxgakee kwenc̱he wzenaggakeꞌ c̱haꞌ, naꞌ yogꞌgakeꞌ gakgakeꞌ tozə, naꞌ toz nadꞌ gak lallꞌ naꞌgakeꞌ.
17 ’Chaki X̱aꞌnaꞌ nadꞌ daa chzanidꞌ yeḻꞌ mban c̱haꞌni witgakeꞌ nadꞌ, naꞌtech yibanꞌ sto shii.
18 Ni to kono yikaa yeḻꞌ mban c̱haꞌni, san kwinkzaꞌn wiꞌan. Napꞌ yeḻꞌ wṉabiaꞌ kwenc̱he wiꞌa yeḻꞌ mban c̱haꞌni witgakeꞌ nadꞌ, naꞌ ḻekzkaꞌ napꞌ yeḻꞌ wṉabiaꞌ kwenc̱he yibanꞌ. Ḻaꞌ kanꞌ nllia X̱aꞌnaꞌ biaꞌ gonꞌ.
19 Naꞌch dii yoblə beṉꞌ Israelkaꞌ lleꞌ naꞌ gokgakeꞌ c̱hoplə ka bengakileꞌ daa wneꞌ.
20 Zaneꞌ cheꞌgakeꞌ:
―¿Bic̱he chzenagzle c̱he beenaꞌ? Dii x̱iwaan yoꞌe, naꞌ chaktonteꞌn.
21 Naꞌ zi baḻeꞌ cheꞌgakeꞌ:
―Aga choeꞌ beeni dillꞌ ka beṉꞌ yoo dii x̱iwꞌ, ḻaꞌ aga bi yeḻꞌ wak nap dii x̱iwaa yiyonan to beṉꞌ lc̱hoḻ.
Beṉꞌkaꞌ chṉabiaꞌ beṉꞌ Israelkaꞌ bi bzenaggakeꞌ c̱he Jesúzaꞌ
22 Naꞌ do kanaꞌ, goḻꞌ lṉinaꞌ Jerusalénnaꞌ daa chisaꞌlallꞌgakeꞌ llanaꞌ bengakeꞌ lallꞌ naꞌ Chiozaꞌ yoodoꞌnaꞌ, naꞌ nak beoꞌ zag.
Jesús acusado de blasfemia (Juan 10.22-42)
23 Naꞌ chda Jesúzaꞌ ḻoo koridor c̱he dii Salomónnaꞌ daa ze kwit yoodoꞌnaꞌ.
24 Naꞌ beṉꞌkaꞌ chṉabiaꞌ beṉꞌ Israelkaꞌ wyec̱hjyobgakeꞌneꞌ, cheꞌgakeꞌneꞌ:
―¿Ax̱t batrakzə yikwasoꞌ yeḻꞌ chakc̱hoplallꞌ c̱hentoꞌni? Shi liꞌkzan Crístonaꞌ, beenaꞌ chbezntoꞌ wseḻꞌ Chiozaꞌ, lla wnatega netoꞌ kwenc̱he iṉezintoꞌ.
25 Naꞌ cheꞌ Jesúzaꞌ ḻegakeꞌ:
―Ba wniakzꞌ leꞌ kanꞌ, naꞌ bi chajḻeꞌle. Yeḻꞌ wakkaꞌ chonꞌ, chonlenaꞌn yeḻꞌ wṉabiaꞌ c̱he X̱aꞌnaꞌ, naꞌ chliꞌn nan ḻenꞌ bseḻee nadꞌ.
26 Naꞌ leꞌ, bi chajḻeꞌle daa bi nakle txen beṉꞌkaꞌ niaꞌ nakgakeꞌ xilꞌ c̱haꞌ.
27 Nombiꞌa beṉꞌkaꞌ niaꞌ nakgakeꞌ xilꞌ c̱haꞌ, naꞌ ḻegakeꞌ chzenaggakeꞌ xtillaanaꞌ naꞌ nogakeꞌ nadꞌ.
28 Naꞌ choꞌa ḻegakeꞌ yeḻꞌ mban zejḻi kaṉi, naꞌ bi kwiayiꞌgakeꞌ. Naꞌ ni to kono gak yibej ḻegakeꞌ lo ṉiꞌa naꞌni.
29 X̱aꞌnaꞌ ba beneꞌ ḻegakeꞌ lallꞌ naꞌ gapshiigakee, naꞌ ḻenꞌ chṉabiaꞌcheꞌ lao nottez. Naꞌ ni to kono gak yikwas ḻegakeꞌ lo ṉiꞌa neenaꞌ.
30 Ka X̱aꞌnaꞌkz, nadꞌ.
―Dii zan dii wen ba bleꞌile chonlenꞌ yeḻꞌ wak c̱he X̱aꞌnaꞌ. Naꞌ ¿nonnanꞌ bi choolallꞌle daa cheenileꞌ wtakwle nadꞌ yajaꞌ?
33 Naꞌ beṉꞌkaꞌ chṉabiaꞌ beṉꞌ Israelkaꞌ cheꞌgakeꞌneꞌ:
―Aga ni c̱he dii wenkaꞌ ba benonꞌ cheenintoꞌ wtakwntoꞌ liꞌ yajaꞌ, san daa chonz kwinoꞌ ka Chiozanꞌ, ḻaꞌ beṉꞌzə liꞌ.
34 Naꞌch cheꞌ Jesúzaꞌ ḻegakeꞌ:
―Ley c̱helenaꞌ nan, Chiozaꞌ neꞌ: “Nadꞌ wniaꞌ leꞌ nakle chios.”
35 Choꞌa Xtillꞌ Chiozaꞌ toshiizi nakan ka wneꞌ, naꞌ shi choꞌen dillꞌ bsiꞌe “chios” beṉꞌkaꞌ wdix̱jee xtilleenaꞌ,
36 ¿bic̱he nazle nadꞌ chṉiaꞌ c̱he X̱acho Chiozaꞌ daa niaꞌ nakꞌ Xiiṉeꞌ, len ḻenꞌ wlejeꞌ nadꞌ naꞌ bseḻee nadꞌ yell-lioni?
37 Shi bi chonꞌ ka chon X̱aꞌnaꞌ, aga wyajḻeꞌle c̱haꞌ.
38 Naꞌ shi chleꞌile chonꞌ ka diikaꞌ chon X̱aꞌnaꞌ, ḻi shajḻeꞌ c̱he diikaꞌ chonꞌ, ḻaꞌkzi bi cheenile shajḻeꞌle c̱haꞌ, kwenc̱he iṉezyeṉꞌile X̱aꞌnaꞌ zoaleneꞌ nadꞌ naꞌ nadꞌ zoalenee.
39 Naꞌch dii yoblə goklallꞌgakeꞌ gox̱ꞌgakeꞌneꞌ naꞌ beneꞌ gan bileꞌ laweꞌkaꞌ.
40 Naꞌch bizyaj Jesúzaꞌ dii yoblə shḻaa yao Jordánnaꞌ jazoeꞌ latjaꞌ ganaꞌ bchoa Juannaꞌ beṉꞌkaꞌ nisaꞌ kanaꞌ.
41 Naꞌ beṉꞌ zan wyajgakeꞌ ganaꞌ zoeꞌ naꞌ cheꞌgakeꞌ:
―Ḻaꞌkzi bibi yeḻꞌ wak bliꞌ Juannaꞌ, yogꞌ diikaꞌ wneꞌ c̱he beeni nakan dii ḻi.
42 Naꞌ beṉꞌ zan wyajleꞌgakeꞌ c̱he Jesúzaꞌ naꞌ.