Salmo 146
1 ¡Ḻi weꞌlaꞌo X̱ancho Chiozaꞌ!
Weꞌlawaa X̱ancho Chiozaꞌ do yic̱hjꞌ do lallaa.
2 Weꞌlawaa X̱ancho Chiozaꞌ shnon mbanꞌ.
Shlak de yeḻꞌ mban c̱haꞌni goḻꞌ diikaꞌ chgoogakan X̱ancho Chiozaꞌ balaaṉ.
3 Bi wx̱enilallꞌzle beṉꞌkaꞌ nak beṉꞌ zakii,
ni nottez beṉꞌ yell-lioni,
beṉꞌkaꞌ bi gak yisla leꞌ.
4 Ḻaꞌ katꞌ chetgakeꞌ chiyakgakeꞌ bishte yell-lio,
naꞌ llanaꞌ chetgakeꞌ chde c̱heyi daa wloo yic̱hjgakeꞌ gongakeꞌ.
5 Chakomba beenaꞌ chaklen X̱ancho Chiozaꞌneꞌ.
Chakomba beenaꞌ noneꞌ lez Chios,
beenaꞌ beꞌlaꞌo dii Jacobaꞌ.
6 Ḻenꞌ beneꞌ yabanaꞌ,
yell-lioni naꞌ nisdoꞌnaꞌ,
naꞌ yogꞌ daa de lawinkaꞌ,
naꞌ toshiizi choneꞌ ka neꞌ.
7 Choneꞌ yeḻꞌ josc̱his c̱he beṉꞌkaꞌ chzakꞌziꞌ,
naꞌ choꞌe daa yeej gao beṉꞌkaꞌ chbiḻ chdon.
X̱ancho Chiozaꞌ chisell chiḻee beṉꞌkaꞌ nak lallꞌ naꞌ beṉꞌ zitꞌkaꞌ.
8 X̱ancho Chiozaꞌ choneꞌ ka chileꞌi beṉꞌ lc̱hoḻkaꞌ.
X̱ancho Chiozaꞌ chakleneꞌ beṉꞌkaꞌ bi chak wen c̱heyin.
X̱ancho Chiozaꞌ ḻe chakileꞌ beṉꞌ ḻi beṉꞌ shaoꞌkaꞌ.
9 X̱ancho Chiozaꞌ chap chwieꞌ beṉꞌ zitꞌkaꞌ zoa lall lill beṉꞌ,
naꞌ chweej chwaweꞌ biꞌ wizebkaꞌ naꞌ nool wizebkaꞌ.
Per choneꞌ ka bi ikaa xṉezi daa ngoo yic̱hj beṉꞌ malkaꞌ gongakeꞌ.
10 Leꞌ beṉꞌ yell Jerusalén,
Chios c̱helenaꞌ iṉabiꞌe toshiizi.
X̱ancho Chiozaꞌ,
iṉabiꞌe zejḻi kaṉi.
¡Ḻi weꞌlaꞌo X̱ancho Chiozaꞌ!