Salmo 147
1 ¡Ḻi weꞌlaꞌo X̱ancho Chiozaꞌ!
¡Ḻe wen naꞌ ḻe mbalaz nakan goḻcho diikaꞌ koogakan X̱ancho Chiozaꞌ balaaṉ!
Ḻaꞌ ḻenꞌ chidoḻee goḻ iṉechoneꞌ.
2 X̱ancho Chiozaꞌ chix̱e chisileꞌ yell Jerusalénnaꞌ sto shii,
naꞌ chitiꞌa chishagueꞌ beṉꞌ Israelkaꞌ nesles.
3 Ḻenꞌ chizoeꞌ mbalaz beṉꞌkaꞌ chakyeshii yic̱hjlallꞌdoꞌekaꞌ,
naꞌ chizoeꞌ ḻegakeꞌ shiꞌa shaoꞌ.
4 Ḻenꞌ bllieꞌ biaꞌ kaꞌkꞌ beljdoꞌkanꞌ kwia
naꞌ mbejeꞌ le to togakan.
5 Beṉꞌ choo beṉꞌ xen nak Chios c̱hechonaꞌ,
naꞌ napeꞌ yeḻꞌ wak xen,
naꞌ yeḻꞌ sinꞌ c̱heꞌnaꞌ biga yiyoll yidon.
6 X̱ancho Chiozaꞌ chakleneꞌ beṉꞌkaꞌ nak beṉꞌ gax̱jlallꞌ,
naꞌ choneꞌ ka siꞌ beṉꞌ malkaꞌ yeḻꞌ ztoꞌ ax̱t ga zeelo.
7 Ḻi goḻ iṉe X̱ancho Chiozaꞌ naꞌ ḻi wiꞌe yeḻꞌ chox̱ken.
Ḻi goḻ-len diikaꞌ llia kwerd c̱heyin to dii koon X̱ancho Chiozaꞌ balaaṉ.
8 Ḻenꞌ chitop chishagueꞌ bejkaꞌ xan yabanaꞌ,
naꞌ chseḻee yejaꞌ lo yell-lioni,
naꞌ choneꞌ ka chiyashj yix̱ꞌkaꞌ yaa yaokaꞌ.
9 Chweej chwaweꞌ bayix̱ꞌkaꞌ
len xiiṉ bec̱hjkaꞌ katꞌ chosyaagakb.
10 Aga yeḻꞌ wal c̱he kabaykanꞌ
ni aga yeḻꞌ wal c̱he beṉꞌ yell-lionin chazlallꞌ Chiozaꞌ.
11 San beṉꞌkaꞌ chall chlleb ḻenꞌ chazlallee,
beṉꞌkaꞌ nx̱enilallꞌ yeḻꞌ chaki c̱heꞌnaꞌ.
12 Leꞌ beṉꞌ Jerusalén,
ḻi weꞌlaꞌo X̱ancho Chiozaꞌ.
Ḻi weꞌlaꞌo Chios c̱helenaꞌ,
leꞌ beṉꞌ yell Sión.
13 Ḻaꞌ ḻenꞌ nzoac̱hec̱heꞌ daa chsej puert c̱he zeenaꞌ daa nec̱hj yell c̱helenaꞌ,
naꞌ chonḻeeyeꞌ xiiṉlekaꞌ lleꞌ naꞌ.
14 Ḻenꞌ chkweejeꞌ leꞌ lao beṉꞌ zitꞌkaꞌ,
naꞌ chzesh chzeljileꞌ leꞌ daa chwaweꞌ leꞌ trígonaꞌ daa zeelo nakch wen.
15 Chseḻee choꞌa xtilleenaꞌ yell-lioni
naꞌ ḻobeꞌdoꞌ chlliljan.
16 Ḻenꞌ chḻetjeꞌ beyaa naꞌ chlliljan ka yishꞌ xa xilꞌ ba llyish,
naꞌ chḻetjeꞌ xelj zagaꞌ ka beṉꞌ chis de.
17 Ḻenꞌ chḻetjeꞌ yaj yabanaꞌ daa nak ka yaj bixj;
naꞌ dii zagaꞌ chseḻee chiyonan nisaꞌ beyꞌ.
18 Naꞌ ka chṉieꞌ,
chiyakan nis sto shii.
Choneꞌ ka chze beꞌnaꞌ naꞌ nisaꞌ chixoṉjan.
19 Ḻenꞌ bzajniileꞌ beṉꞌ Israelkaꞌ,
beṉꞌkaꞌ nak xiiṉ dia c̱he dii Jacobaꞌ,
choꞌa xtilleenaꞌ,
naꞌ biꞌe ḻegakeꞌ diikaꞌ bllieꞌ biaꞌ gongakeꞌ.
20 Naꞌ ni tlishꞌ beṉꞌ yell zitꞌkaꞌ bi beneꞌ c̱hegakeꞌ kaꞌ,
ni bigaṉꞌ gombiaꞌgakeꞌ diikaꞌ bllieꞌ biaꞌ.
¡Ḻi weꞌlaꞌo X̱ancho Chiozaꞌ!