Salmo 145
1 Chios c̱haꞌ,
liꞌ nakoꞌ beṉꞌ wṉabiaꞌ c̱haꞌ,
naꞌ wiꞌa dillꞌ nakoꞌ beṉꞌ choo beṉꞌ xen,
naꞌ toshiizi weꞌlawaa liꞌ,
2 Lla kon lla goḻ iṉiaꞌ liꞌ,
naꞌ zejḻi kaṉi naꞌ toshiizi weꞌlawaa liꞌ.
3 X̱ancho Chiozaꞌ nakeꞌ ḻiizelozi beṉꞌ choo beṉꞌ xen
naꞌ chidoḻee koochoneꞌ balaaṉ xen.
¡Ni to kono illin shajnii doxen ka nak yeḻꞌ beṉꞌ choo beṉꞌ xen c̱heꞌnaꞌ!
4 Yogꞌḻoḻte dia c̱he beṉꞌkaꞌ lleꞌ yell-lioni weꞌgakeꞌ dillꞌ c̱he yogꞌ diikaꞌ chonoꞌ;
weꞌgakeꞌ dillꞌ c̱he diikaꞌ chonlenoꞌ yeḻꞌ wak xen c̱hoꞌnaꞌ.
5 Naꞌ weꞌgakeꞌ dillꞌ c̱he yeḻꞌ zakii c̱hoꞌnaꞌ daa nak dii xen inlleb,
naꞌ nadꞌ siaꞌ wṉeyi c̱heyi diikaꞌ benlenoꞌ yeḻꞌ wak choo yeḻꞌ wak xen c̱hoꞌnaꞌ.
6 Weꞌgakeꞌ dillꞌ c̱he diikaꞌ chonlenoꞌ yeḻꞌ wak choo yeḻꞌ wak xen c̱hoꞌnaꞌ,
naꞌ nadꞌ wiꞌa dillꞌ nakoꞌ ḻiizelozi beṉꞌ choo beṉꞌ xen.
7 Naꞌ weꞌgakeꞌ dillꞌ dii yisaꞌn lallꞌ beṉꞌ daa naklikzoꞌ beṉꞌ wen inlleb,
naꞌ goḻ iṉegakeꞌ liꞌ iṉagakeꞌ nakoꞌ beṉꞌ ḻi beṉꞌ shaoꞌ.
8 X̱ancho Chiozaꞌ nakeꞌ beṉꞌ wen beṉꞌ shaoꞌ naꞌ beṉꞌ chiyeshꞌlallii.
Beṉꞌ yeḻꞌ chxenlallꞌ xen wal nakeꞌ,
naꞌ naplikzeꞌ yeḻꞌ chaki.
9 X̱ancho Chiozaꞌ choneꞌ wen c̱he yogꞌḻoḻ beṉꞌ,
naꞌ chiyeshꞌlallileꞌ yogꞌḻoḻte diikaꞌ bx̱e bsileꞌ.
10 Yogꞌ diikaꞌ benoꞌ weꞌlaꞌogakan liꞌ,
Chios c̱haꞌ;
naꞌ beṉꞌkaꞌ nak lallꞌ noꞌ koogakeꞌ liꞌ balaaṉ.
11 Naꞌ weꞌgakeꞌ dillꞌ c̱he yeḻꞌ wṉabiaꞌ xen c̱hoꞌnaꞌ,
naꞌ c̱he yeḻꞌ wak choo yeḻꞌ wak xen c̱hoꞌnaꞌ,
12 kwenc̱he iṉezi yogꞌḻoḻte beṉꞌ ka nak yeḻꞌ wak choo yeḻꞌ wak xenkaꞌ ba benoꞌ,
len yeḻꞌ wṉabiaꞌ xen c̱hoꞌnaꞌ.
13 Yeḻꞌ wṉabiaꞌ c̱hoꞌnaꞌ biga llia te c̱heyin;
naꞌ zejḻi kaṉi iṉabiꞌo.
14 X̱ancho Chiozaꞌ chakleneꞌ beṉꞌkaꞌ bi chak wen c̱heyin,
naꞌ chiyeshꞌlallileꞌ beṉꞌkaꞌ zoa nyeshꞌ.
15 Yogꞌḻoḻ bayix̱ꞌ naꞌ yogꞌḻoḻ beṉꞌ nongakeꞌ liꞌ lez,
naꞌ katꞌ chbiḻ chdongakeꞌ,
chweej chwawoꞌ ḻegakeꞌ.
16 Chonoꞌn ax̱t chc̱hoc̱h chlalj,
naꞌ chelj chllaꞌi yogꞌḻoḻ beṉꞌ naꞌ yogꞌḻoḻ bayix̱ꞌ.
17 X̱ancho Chiozaꞌ toshiizi choneꞌ daa nak shḻi,
naꞌ yogꞌ daa choneꞌ,
choneꞌn kon yeḻꞌ chiyeshꞌlallii.
18 X̱ancho Chiozaꞌ zieꞌ gaḻꞌ gllin chzenagueꞌ c̱he yogꞌ beṉꞌkaꞌ chṉabgakeꞌ yeḻꞌ goklen c̱heꞌnaꞌ,
beṉꞌkaꞌ do yic̱hj do lallꞌgakeꞌ chṉabgakeꞌn.
19 Choneꞌ ka gak diikaꞌ chzelallꞌ beṉꞌkaꞌ chall chlleb ḻeꞌ,
naꞌ katꞌ chṉabgakeꞌ gakleneꞌ ḻegakeꞌ,
chisleꞌ ḻegakeꞌ.
20 X̱ancho Chiozaꞌ chap chwieꞌ yogꞌ beṉꞌkaꞌ chaki ḻeꞌ,
san wlliayee yogꞌ beṉꞌ malkaꞌ.
21 Nadꞌ goḻ iṉiaꞌ X̱ancho Chiozaꞌ.
¡Kooshga yogꞌḻoḻ beṉꞌ ḻeꞌ balaaṉ zejḻi kaṉi naꞌ toshiizi!