Salmo 144
1 Choeꞌlawaa X̱ancho Chiozaꞌ,
beenaꞌ nak ka to yaj xen dii chkweejan nadꞌ.
Ḻenꞌ chsedileꞌ nadꞌ tiḻ-lenꞌ beṉꞌkaꞌ chwiyi nadꞌ.
2 Ḻenꞌ Chios c̱haꞌnaꞌ,
beenaꞌ ḻe chaki nadꞌ,
naꞌ chkwashꞌ chkweejeꞌ nadꞌ ka to yoo dii nak c̱hec̱h ganaꞌ chkwashaa kwenc̱he kono bi goni nadꞌ.
Ḻenꞌ chakleneꞌ nadꞌ naꞌ chisleꞌ nadꞌ.
Ḻenꞌ chkweejeꞌ nadꞌ,
naꞌ nonꞌ lez gap wwieꞌ nadꞌ.
Ḻenꞌ choneꞌ kwenc̱he doxen ganaꞌ chṉabiꞌa chongakeꞌ daa chepgakee.
3 Chios c̱haꞌ,
¿nora nakntoꞌ netoꞌ beṉꞌ yell-lio,
chiꞌ yic̱hjzoꞌ netoꞌ,
naꞌ zezoꞌ wṉeyi c̱he netoꞌ nakntoꞌ xiiṉ beṉec̱h?
4 Beṉꞌ yell-lioni nakeꞌ ka beꞌ dii chde toldezə,
naꞌ lla yel c̱heꞌnaꞌ nakan ka xol daa chinitlo.
5 Chios c̱haꞌ,
bsalj xan yaba c̱hoꞌnaꞌ naꞌ betjgach;
bdiꞌgach yaaꞌka kwenc̱he soagakan llen.
6 Bengach ka gashj itin yiꞌ wziwꞌ c̱hoꞌkaꞌ,
diikaꞌ chc̱hinoꞌ ka xiskaꞌ chchooṉ xis wix̱itaa,
naꞌ bshesh bc̱heeṉ beṉꞌkaꞌ chakziꞌ chakzbani liꞌ.
7 Goklengach nadꞌ ganaꞌ lliatioꞌ,
naꞌ bisla nadꞌ lawi dii lalljkaꞌ nak ka to yao xen.
Bislagach nadꞌ lo naꞌ beṉꞌ zitꞌkaꞌ,
8 beṉꞌkaꞌ choeꞌ dillꞌ wxiyeꞌ
naꞌ ax̱t chc̱hebgakeꞌ nan dillꞌ ḻin choeꞌgakeꞌ katꞌ chziyeꞌgakeꞌ.
9 Chios c̱haꞌ,
goḻꞌ to dii kob dii koon liꞌ balaaṉ,
naꞌ goḻ iṉeidꞌ liꞌ kon daa lliaꞌ kwerd c̱heyin.
10 Linꞌ chonoꞌ kwenc̱he beṉꞌ wṉabiaꞌkaꞌ chongakeꞌ gan lo wdiḻkaꞌ.
Linꞌ chisloꞌ nadꞌ lao yesyakaꞌ.
11 Bislagach nadꞌ lo naꞌ beṉꞌ zitꞌkaꞌ,
beṉꞌkaꞌ choeꞌ dillꞌ wxiyeꞌ,
naꞌ ax̱t chc̱hebgakeꞌ nan dillꞌ ḻin choeꞌgakeꞌ katꞌ chziyeꞌgakeꞌ.
12 Igolshga biꞌ byo c̱hentoꞌkaꞌ ka yagdoꞌkaꞌ chonshiigakeꞌ;
naꞌ biꞌ nool c̱hentoꞌkaꞌ gakshgagakbꞌ xochi ka yajaꞌ daa chpaagakeꞌ
naꞌ chḻiꞌn xochi lill xḻatj beṉꞌ wṉabiaꞌnaꞌ.
13 Ganaꞌ chillaantoꞌ diikaꞌ chiziꞌ chilapntoꞌ gakshgan tollaꞌ;
soayaa soallinshgan yogꞌ kwen dii cheej chaontoꞌ.
Shesh shanshga bayix̱ꞌ c̱hentoꞌkaꞌ lleꞌ lyix̱ꞌ c̱hentoꞌnaꞌ.
14 Naꞌ bayix̱ꞌ c̱hentoꞌkaꞌ gakshgagakb ba wal kwenc̱he sogakib diikaꞌ wwaꞌntoꞌgakb.
Bat yid beṉꞌkaꞌ wc̱hiṉjgakeꞌ zeenaꞌ nec̱hj yell c̱hentoꞌni naꞌ shoꞌgakeꞌ tiḻ-lengakeꞌ netoꞌ.
15 ¡Chakomba yellaꞌ chleꞌi yogꞌ dii wenki!
¡Chakomba beṉꞌkaꞌ noni X̱angakeꞌ Chios c̱hechonaꞌ!