Salmo 143
1 Chios c̱haꞌ,
bzenaggach dga niaꞌ liꞌ;
bengach ka chṉabidꞌ liꞌ.
Goklengach nadꞌ,
ḻaꞌ liꞌ nakoꞌ beṉꞌ ḻi beṉꞌ shaoꞌ naꞌ chonoꞌ ka chc̱heboꞌ.
2 Bi wc̱hoglogachoꞌ c̱haꞌ,
ḻaꞌ kono nak beṉꞌ wen lawoꞌnaꞌ.
3 Beṉꞌkaꞌ chakziꞌ chakzbani nadꞌ chlagdogakeꞌ nadꞌ;
ba bengakileꞌ nadꞌ ka beṉꞌ blej bshoshjeꞌ
naꞌ zi latꞌz ki betgakeꞌ nadꞌ.
Ni c̱heyi daa chongakileꞌ nadꞌ chak c̱haꞌ ka beṉꞌ ba wit,
beṉꞌ ba de ganaꞌ nak shgashj shc̱hoḻ.
4 Nyeshꞌ inlleb zoaꞌ,
naꞌ chakshejlallꞌchgayi yic̱hjlallꞌdawaani.
5 Chjadinidꞌ llakaꞌ ba wde,
naꞌ chziaꞌ wṉeyi c̱he yogꞌ diikaꞌ ba benoꞌ.
6 Chḻis naꞌki lawoꞌnaꞌ,
Chios c̱haꞌ,
ḻaꞌ yic̱hjlallꞌdawaani chzelallꞌchgain liꞌ,
ka yo billaꞌ daa chyalljchgayi nisaꞌ.
7 Chios c̱haꞌ,
¡bi shagachiloꞌ gaklenoꞌ nadꞌ,
ḻaꞌ ba chde c̱haꞌ!
Bi wllongachiloꞌ nadꞌ yeḻꞌ goklen c̱hoꞌnaꞌ,
kwenc̱he ki guetꞌ.
8 Bengach ka ileꞌidꞌ yeḻꞌ chaki c̱hoꞌnaꞌ ka chzolo llanaꞌ,
ḻaꞌ linꞌ ba nx̱enilallaa.
Bliyi nadꞌ nakan chiyaḻꞌ wsaꞌ c̱haꞌ,
ḻaꞌ linꞌ choeꞌḻwillꞌ.
9 Chios c̱haꞌ,
bislagach nadꞌ lo ṉiꞌa naꞌ beṉꞌkaꞌ chakziꞌ chakzbani nadꞌ,
ḻaꞌ linꞌ nonꞌ lez wkwashꞌ wkweejoꞌ nadꞌ.
10 Bsedi nadꞌ gonꞌ ka cheeniloꞌ,
ḻaꞌ linꞌ nakoꞌ Chios c̱haꞌ.
Naꞌ Espíritu c̱hoꞌnaꞌ kooshgueꞌ nadꞌ
lo nez ḻi c̱hoꞌnaꞌ.
11 Chios c̱haꞌ,
ben ka gatꞌch yeḻꞌ mbanꞌ c̱haꞌ,
ka ba bc̱heboꞌ gonoꞌ.
Daa nakoꞌ beṉꞌ ḻi beṉꞌ shaoꞌ bibejgach nadꞌ lo yeḻꞌ zakꞌziꞌni.
12 Daa chonoꞌ ka chc̱heboꞌ,
blliayiꞌgach beṉꞌkaꞌ chakziꞌ chakzbani nadꞌ.
Blliayiꞌgach yogꞌḻoḻte beṉꞌkaꞌ chakziꞌ chakzbani nadꞌ,
daa chonꞌ ka cheeniloꞌ.