Salmo 141
1 Chios c̱haꞌ,
linꞌ chṉabidꞌ yeḻꞌ goklennaꞌ,
¡bi shagachiloꞌ yidyaklenoꞌ nadꞌ!
Bzenaggach c̱haꞌ katꞌ chṉabidꞌ liꞌ gaklenoꞌ nadꞌ.
2 Dillꞌki niaꞌ liꞌ gakshgan ka llen yal lawoꞌnaꞌ,
naꞌ daa chḻisꞌ naꞌni gakshgan ka daa chongakeꞌ katꞌ chzeygakeꞌ bayix̱ꞌkaꞌ lawoꞌnaꞌ shlleꞌkaꞌ.
3 Chios c̱haꞌ,
ben ka gak gox̱ꞌ choꞌa ḻollaani;
bi wiꞌo latj kwell iṉiaꞌ ka nḻaꞌ ka nte.
4 Bi weꞌgachoꞌ latj saꞌlallaa dii malkaꞌ,
kwenc̱he ki gonlenꞌ beṉꞌ malkaꞌ diikaꞌ chongakeꞌ,
ni bi lljengakee txen yeej gaolenꞌgakee lo lṉi c̱heꞌkaꞌ.
5 Naklan to goklen daa wsakꞌziꞌ beenaꞌ nsaꞌ c̱heyin wen nadꞌ;
naꞌ daa wsheshleneꞌ nadꞌ goneꞌ ka yiyakbeꞌidꞌ dii malaꞌ chonꞌ
naꞌ gakan ka to set zix̱ dii chwazjeꞌ yic̱hjaa naꞌ bat gakzbanidaꞌn.
Ḻaꞌkzi wzoaziꞌyaan nadꞌ,
weꞌḻwillkzꞌ Chiozaꞌ.
6 Beṉꞌkaꞌ chṉabiaꞌ beṉꞌ malkaꞌ gakgakeꞌ ka beṉꞌ chxop to choꞌa bdiṉj,
naꞌ yiyakbeꞌgakileꞌ choꞌa xtillaanaꞌ nakan dillꞌ ḻi.
7 Naꞌ guesles llit wet c̱heꞌkaꞌ choꞌa ba c̱heꞌkaꞌ,
ka chesles bc̱hekw yonaꞌ katꞌ chaaṉ gooṉaꞌ.
8 Chios c̱haꞌ,
linꞌ nx̱enilallaa.
Linꞌ nonꞌ lez gap wwioꞌ nadꞌ.
Bi c̱hooṉlallꞌgachoꞌ nadꞌ.
9 Bislagach nadꞌ lao dii nxollkaꞌ diikaꞌ ba ngoo beṉꞌ malkaꞌ xṉezin gongakeꞌ c̱haꞌ.
10 Yidobshgayi beṉꞌ malkaꞌ daa cheengakileꞌ gongakeꞌ c̱haꞌ,
shlak nadꞌ bibi gak c̱haꞌ.