Salmo 140
1 Chios c̱haꞌ,
bislagach nadꞌ lao beṉꞌ malkaꞌ;
bi weꞌgachoꞌ latj bi goni beṉꞌ zeshꞌ beṉꞌ zbankaꞌ nadꞌ,
2 beṉꞌkaꞌ chiyiljlallꞌgakeꞌ naklə gongakeꞌ mal,
naꞌ toshiizi chdiḻ-lengakeꞌ beṉꞌ.
3 Choꞌa ḻolleekaꞌ nakan ka c̱he beḻaꞌ,
banaꞌ chyiṉyaa;
naꞌ dillꞌkaꞌ chchej choꞌa ḻolleekaꞌ nakan ka yierb c̱hebaꞌ.
4 Chios c̱haꞌ,
bislagach nadꞌ lao beṉꞌ malkaꞌ;
bi weꞌgachoꞌ latj bi goni beṉꞌ zeshꞌ beṉꞌ zbankaꞌ nadꞌ,
beṉꞌkaꞌ chgoo xṉezin wlliayiꞌgakeꞌ nadꞌ.
5 Beṉꞌkaꞌ chep chaꞌlallꞌ ba chiꞌnogakeꞌ nadꞌ yawi nezaꞌ ganaꞌ chaj chdiaꞌ.
Ba chiꞌgakeꞌ xṉezaꞌ kwenc̱he wzapgakeꞌ nadꞌ.
6 Ba goshꞌ X̱ancho Chiozaꞌ:
“Linꞌ nakoꞌ Chios c̱haꞌ,
bzenaggach dga chṉabidꞌ liꞌ.
7 Chios c̱haꞌ,
linꞌ chisloꞌ nadꞌ kon yeḻꞌ wak choo yeḻꞌ wak xen c̱hoꞌnaꞌ.
Linꞌ chap chwioꞌ nadꞌ lo wdiḻaꞌ.”
8 Chios c̱haꞌ,
bi weꞌgachoꞌ latj gak ka chzelallꞌ beṉꞌ malkaꞌ;
bi weꞌgachoꞌ latj ikaa xṉezi daa ba wlekniꞌagakeꞌ,
kwenc̱he ki shep shaꞌlallꞌgakeꞌ.
9 Naꞌ ka nak beṉꞌkaꞌ doxenz chinaḻꞌ chinogakeꞌ nadꞌ,
yidobshgagakileꞌ diikaꞌ chbell chṉe choꞌa ḻolleekaꞌ.
10 Ixopshga yiꞌ galjaꞌ wzeyan ḻegakeꞌ.
Ixopshgagakeꞌ ḻoo yech zitjkaꞌ ganaꞌ bich gak yichejgakeꞌ.
11 Bi weꞌgachoꞌ latj idia beenaꞌ chbell chṉe c̱he beṉꞌ lo yell-lioni;
gaḻꞌ ṉoshga dii malaꞌ beenaꞌ nak beṉꞌ zeshꞌ beṉꞌ zban naꞌ wlliayiꞌn ḻeꞌ.
12 Nadꞌ ṉezidꞌ X̱ancho Chiozaꞌ choneꞌ yeḻꞌ josc̱his c̱he beṉꞌ yeshꞌkaꞌ,
naꞌ chakleneꞌ beenaꞌ chyallj chc̱hini.
13 Beṉꞌ ḻi beṉꞌ shaoꞌkaꞌ weꞌlaꞌogakeꞌ liꞌ;
naꞌ beṉꞌkaꞌ chon ka cheeniloꞌ soagakeꞌ ganaꞌ zoꞌ.