Salmo 139
1 Chios c̱haꞌ,
liꞌ ba biya biyiljoꞌ nadꞌ naꞌ nombiꞌo nadꞌ kwasḻoḻ.
2 Ṉez nḻeꞌiloꞌ yogꞌḻoḻ bin chonꞌ;
naꞌ ḻaꞌkzi zoꞌ zitꞌ,
ṉez nḻeꞌkziloꞌ yogꞌḻoḻ daa chzaꞌlallaa.
3 Ṉez nḻeꞌiloꞌ ganaꞌ zoaꞌ naꞌ ganaꞌ zyaa,
naꞌ yogꞌḻoḻ bin chonꞌ.
4 Ziꞌ wx̱aꞌlə choꞌani kwenc̱he wiꞌa dillꞌ,
bakzə ṉeziloꞌ doxen bin iṉiaꞌ,
Chios c̱haꞌ.
5 Gattezə ziaꞌ,
naꞌkzə zoalenoꞌ nadꞌ,
naꞌ chap chwioꞌ nadꞌ kon yeḻꞌ wak c̱hoꞌnaꞌ.
6 Daa nombiꞌo do ka nakꞌ chonan ka chibanidꞌ,
naꞌ nakan to dii bi shajniꞌkzidꞌ.
7 Gattez shaꞌ naꞌkzə zoꞌ.
Aga wak iṉiaꞌ wxoṉj wkwashidꞌ liꞌ.
8 Shi shepꞌ ax̱t xan yabanaꞌ,
naꞌkzə zoꞌ.
Naꞌ shi shaꞌ ax̱t xan yell-lioni,
naꞌkzə zoꞌ.
9 Shi shaꞌ ganaꞌ chlaꞌ wbilldoꞌnaꞌ,
wa lljsoaꞌ ganaꞌ chiyoll chido nisdoꞌnaꞌ,
10 naꞌkzə soalenoꞌ nadꞌ
naꞌ gaklenkzoꞌ nadꞌ.
11 Shi gaklallaa wkwashidꞌ liꞌ lo yel c̱hoḻaꞌ,
wa gaklallaa beeniꞌnaꞌ yiyakan yel c̱hoḻ,
12 ni yel c̱hoḻaꞌ bi so sakin wkwashaꞌn nadꞌ,
daa gak waḻaꞌ ka tella lawoꞌnaꞌ.
Ḻaꞌ yel c̱hoḻaꞌ len beeniꞌnaꞌ,
toz ka nakgakan lawoꞌnaꞌ.
13 Linꞌ bx̱e bsiloꞌ do ka nakꞌ,
naꞌ benoꞌ ka wyaꞌ wbiṉꞌ ḻoo ḻee xṉaꞌnaꞌ.
14 Choeꞌlawaa liꞌ daa chibanidꞌ ka nonoꞌ nadꞌ.
Diikaꞌ chonoꞌ nakgakan dii wen inlleb,
naꞌ ṉezyeṉidꞌ kanꞌ nakan.
15 Bi bgashꞌ kwerp c̱haꞌni lawoꞌnaꞌ kanaꞌ wxe wzilꞌ,
shlak wyaꞌ wbiṉꞌ ḻoo ḻee xṉaꞌnaꞌ.
16 Jalawoꞌnaꞌ bleꞌin nadꞌ ka wzolo wxe wzilꞌ.
Naꞌ ziꞌ galjtiaꞌ,
ḻee libr c̱hoꞌnaꞌ ba choꞌeten dillꞌ c̱he yeḻꞌ mban c̱haꞌni naꞌ c̱he llakaꞌ nllioꞌ biaꞌ soaꞌ.
17 ¡Chios c̱haꞌ,
mbalaz inlleb nak pensarkaꞌ chonoꞌ!
¡Biga llia yiyoll yido ibaban!
18 Shi gaklallaa wlabꞌgakan,
dii zanch nakgakan aga ka yoxaꞌ chiꞌ choꞌa nisdoꞌnaꞌ.
Naꞌ shi illin lla yiyoll wlabꞌgakan ni zoalenkzoꞌ nadꞌ.
19 Chios c̱haꞌ,
bsol bṉitgach yeḻꞌ mban c̱he beṉꞌ malkaꞌ,
naꞌ bkwasgach wen xyakaꞌ lawaꞌni,
20 beṉꞌkaꞌ chbell chṉe c̱hoꞌ
naꞌ chaklallꞌzgakeꞌ yizoshyiꞌgakeꞌ liꞌ.
21 Chios c̱haꞌ,
chwiidꞌ beṉꞌkaꞌ chwiyi liꞌ,
naꞌ chakzbanidꞌ beṉꞌkaꞌ chakzbani liꞌ.
22 Chakziꞌ chakzbanidꞌ ḻegakeꞌ ax̱t ga zeelo,
naꞌ chleꞌidꞌ ḻegakeꞌ ka beṉꞌkaꞌ chwiyi nadꞌ.
23 Chios c̱haꞌ,
biya biyiljgach nadꞌ,
naꞌ bembiaꞌgach yic̱hjlallꞌdawaani.
Bnix̱ bllia nadꞌ,
naꞌ bembiꞌa daa chzaꞌlallaa.
24 Bwiagach shi zyaa lo nez malaꞌ,
naꞌ bigoogach nadꞌ lo nez daa nsaꞌ yeḻꞌ mban zejḻi kaṉi.