Salmo 138
1 Chios c̱haꞌ,
do yic̱hj do lallaa weꞌlawaa liꞌ,
naꞌ chwiate yogꞌ chioskaꞌ choeꞌlaꞌo beṉꞌ,
goḻꞌ to dii koon liꞌ balaaṉ.
2 Wc̱hekꞌ xibaꞌni naꞌ wwiaꞌ ka de ganaꞌ zoalə lill xḻatjoꞌnaꞌ,
kwenc̱he goṉꞌ liꞌ yeḻꞌ chox̱ken ni c̱he yeḻꞌ chaki c̱hoꞌnaꞌ naꞌ daa chonoꞌ ka chc̱heboꞌ gonoꞌ.
Ḻaꞌ ba bliꞌo nakoꞌ beṉꞌ llialote naꞌ dii llialote choꞌa xtilloonaꞌ lao yogꞌḻoḻ dii de.
3 Ka wṉiaꞌ liꞌ,
naꞌ goklenoꞌ nadꞌ,
naꞌ bitipoꞌ lallaa.
4 Yogꞌ beṉꞌ wṉabiaꞌkaꞌ lleꞌ yell-lioni weꞌlaꞌogakeꞌ liꞌ
ka yengakileꞌ choꞌa xtilloonaꞌ.
5 Weꞌlaꞌogakeꞌ X̱ancho Chiozaꞌ ni c̱he diikaꞌ choneꞌ,
ḻaꞌ ḻe zeyi c̱heꞌ nakeꞌ beṉꞌ choo beṉꞌ xen.
6 Ḻaꞌkzi X̱ancho Chiozaꞌ zoeꞌ yabanaꞌte
chakleneꞌ beṉꞌkaꞌ nak gax̱jlallꞌ,
per bi chleꞌshiileꞌ beṉꞌkaꞌ chep chaꞌlallꞌ.
7 Katꞌ zoaꞌ lao to dii nxoll,
liꞌ chaklenoꞌ nadꞌ;
naꞌ chliꞌo yeḻꞌ wak c̱hoꞌnaꞌ katꞌ chisloꞌ nadꞌ
lao yeḻꞌ chllaa chlok c̱he beṉꞌkaꞌ chakziꞌ chakzbani nadꞌ.
8 X̱ancho Chiozaꞌ gonkzeꞌ daa cheenileꞌ goneꞌ c̱haꞌ.
Chios c̱haꞌ,
yeḻꞌ chaki c̱hoꞌnaꞌ den zejḻi kaṉi;
bi kwej yic̱hjoꞌ netoꞌ bx̱e bsiloꞌ.