Salmo 129
1 Leꞌ beṉꞌ Israel,
ḻi weꞌ dillꞌ
c̱he yogꞌ yeḻꞌ zakꞌziꞌkaꞌ ba ben bleꞌi yell c̱hechoni
dezd ka wxe wzilten.
2 Yeḻꞌ zakꞌziꞌ zan ba ben bleꞌi yell c̱hechoni dezd ka wxe wzilten,
per ni ton bi gok wlliayiꞌn daa.
3 Blliayiꞌ blliadegakeꞌ diikaꞌ de lawinnaꞌ;
naꞌ daa bengakileꞌn kaꞌ,
gok c̱heyin ka chak c̱he to beṉꞌ chit chyineꞌ kolleenaꞌ naꞌ chyaljan weꞌ.
4 Per X̱ancho Chiozaꞌ nakeꞌ beṉꞌ wen beṉꞌ shaoꞌ,
bisleꞌ nadꞌ lo ṉiꞌa naꞌ beṉꞌ malkaꞌ.
5 Beṉꞌkaꞌ chakziꞌ chakzbani beṉꞌkaꞌ lleꞌ lo yaa Siónnaꞌ,
siꞌshgagakeꞌ yeḻꞌ ztoꞌ naꞌ yixoṉjgakeꞌ.
6 Gakshga c̱hegakeꞌ ka chak c̱he yix̱aa daa chlaꞌ yic̱hj yookaꞌ,
daa tolbeꞌdo chbill,
7 yix̱aa daa kono chitopə,
ni kono chonan x̱oṉj wej.
8 Naꞌ beṉꞌkaꞌ te ganaꞌ lleꞌgakeꞌ ni bi yeꞌgakeꞌ:
“Gonḻeeyshga X̱ancho Chiozaꞌ leꞌ.
Chṉabintoꞌ X̱ancho Chiozaꞌ goneꞌ ka gak wen c̱hele.”