Salmo 130
1 Choeꞌḻwillꞌ liꞌ,
Chios c̱haꞌ,
daa chakshejlallꞌchgaidꞌ naꞌ chakyeshꞌchgaidꞌ ni c̱he dga chak c̱haꞌ.
2 Bzenaggach dga niaꞌ liꞌ,
Chios c̱haꞌ.
Bzegach nagoꞌ dga chṉabidꞌ liꞌ.
3 Chios c̱haꞌ,
sheḻꞌ liꞌ bi chiziꞌxenoꞌ saaxyakaꞌ,
kochno beṉꞌ mban,
sheḻꞌkaꞌ.
4 Per liꞌ chiziꞌxenoꞌ c̱hentoꞌ,
naꞌ daan chiyaḻꞌ gall illebntoꞌ liꞌ.
5 Lez choo lez xen nonꞌ X̱ancho Chiozaꞌ,
naꞌ nx̱enilallaa choꞌa xtilleenaꞌ.
6 Nadꞌ zechꞌ wṉeyi chbezꞌ X̱ancho Chiozaꞌ,
aga ka beṉꞌkaꞌ chap yellaꞌ waḻaꞌ chbezgakeꞌ sheeniꞌ.
Zechꞌ wṉeyi chbezꞌ liꞌ aga ka beṉꞌkaꞌ chap yellaꞌ waḻaꞌ chbezgakeꞌ sheeniꞌ.
7 Ḻekzkaꞌ leꞌ,
beṉꞌ Israel,
ḻi gon lez X̱ancho Chiozaꞌ.
Ḻaꞌ ḻeꞌ napeꞌ yeḻꞌ chaki,
naꞌ napeꞌ yeḻꞌ wak yisell yiḻee choꞌ lao saaxyanaꞌ.
8 Ḻeꞌ yisell yiḻee choꞌ,
choꞌ beṉꞌ Israel,
lao yogꞌḻoḻte saaxya c̱hechokaꞌ.