Salmo 119
1 Chakomba beṉꞌkaꞌ bibi doḻꞌ c̱hegakeꞌ de,
naꞌ chongakeꞌ daa nllia X̱ancho Chiozaꞌ biaꞌ gongakeꞌ.
2 Chakomba beṉꞌkaꞌ chzoa dillꞌ c̱he daa nllieꞌ biaꞌ gongakeꞌ,
naꞌ chiyiljgakeꞌneꞌ do yic̱hj do lallꞌgakeꞌ.
3 Biga chongakeꞌ daa nak mal,
san chdagakeꞌ lo xṉez Chiozaꞌ.
4 Liꞌ ba bllioꞌ biaꞌ daa gongakeꞌ
kwenc̱he gongakeꞌn kon ka cheeniloꞌ.
5 ¡Zelallꞌchgaidꞌ soac̱hec̱hꞌ
gonꞌ diikaꞌ nllioꞌ biaꞌ gonntoꞌ!
6 Naꞌ bibi gatꞌ dii wsiꞌn nadꞌ yeḻꞌ ztoꞌ
katꞌ ba chonꞌ yogꞌ diikaꞌ nllioꞌ biaꞌ.
7 Naꞌ weꞌlawaa liꞌ do yic̱hj do lallaa
katꞌ ba wyajniidꞌ nan chc̱hogbiꞌo c̱he beṉꞌ kon ka chiyaḻꞌ gak c̱heꞌ.
8 ¡Gonꞌ diikaꞌ nllioꞌ biaꞌ gonntoꞌ!
¡Bi wsanlallꞌgachoꞌ nadꞌ!
9 ¿Naktgui gon biꞌ wewaa kwenc̱he bibi xtoḻꞌbꞌ gatꞌ,
lla?
Kon daa soabꞌ gomꞌ ka na choꞌa xtilloonanꞌ.
10 Nadꞌ chiyiljꞌ liꞌ do yic̱hj do lallaa;
bi wiꞌo latj wḻaalawaa diikaꞌ nllioꞌ biaꞌ gonntoꞌ.
11 Ba ngooshawaa choꞌa xtilloonaꞌ ḻoo yic̱hjlallꞌdawaani
kwenc̱he bi wx̱iṉj wḻenꞌ lawoꞌnaꞌ.
12 ¡Choeꞌlawaa liꞌ,
Chios c̱haꞌ!
Bzajnii nadꞌ diikaꞌ ba nllioꞌ biaꞌ gonntoꞌ.
13 Choꞌa ḻollaani weꞌlenaꞌn dillꞌ
yogꞌḻoḻte diikaꞌ iṉoꞌ gonntoꞌ.
14 Chiba chizakchidꞌ chonꞌ diikaꞌ na choꞌa xtilloonaꞌ,
aga ka to yeḻꞌ wniꞌa xen wal.
15 Siaꞌ wṉeyi diikaꞌ nllioꞌ biaꞌ gonntoꞌ,
naꞌ gonꞌ to dii byen ṉoaꞌ nez c̱hoꞌnaꞌ.
16 Yibachgaidꞌ gonꞌ diikaꞌ nllioꞌ biaꞌ gonntoꞌ,
naꞌ bi kwej yic̱hjꞌ choꞌa xtilloonaꞌ.
17 Ben ka gak wen c̱haꞌ kwenc̱he ibanchꞌ
naꞌ gonꞌ ka na choꞌa xtilloonaꞌ.
18 Ben ka gakbeꞌidꞌ
ka wen inlleb nak diikaꞌ nllioꞌ biaꞌ gonntoꞌ.
19 Nadꞌ nakꞌ ka beṉꞌ zitꞌ lo yell-lioni;
bzajnii nadꞌ diikaꞌ nllioꞌ biaꞌ gonntoꞌ.
20 Toshiizi chak c̱haꞌ ka beṉꞌ chzakꞌziꞌ
ni c̱heyi daa chzelallꞌchgaꞌ gonꞌ diikaꞌ nllioꞌ biaꞌ gonntoꞌ.
21 Liꞌ chsheshlenoꞌ beṉꞌkaꞌ chep chaꞌlallꞌ,
beṉꞌkaꞌ chḻaꞌlaꞌo diikaꞌ nllioꞌ biaꞌ gonntoꞌ,
naꞌ ba nakten kwiayiꞌgakeꞌ.
22 Bi wiꞌo latj kwell iṉegakeꞌ zban c̱haꞌ,
naꞌ gongakileꞌ nadꞌ nakzi,
ḻaꞌ ba benꞌ ka nllioꞌ biaꞌ gonntoꞌ.
23 Ḻaꞌkzi beṉꞌkaꞌ ḻe zakii chgoogakeꞌ xṉezin gongakeꞌ mal c̱haꞌ,
nadꞌ siaꞌ wṉeyi c̱heyi diikaꞌ nllioꞌ biaꞌ gonntoꞌ.
24 Naꞌ chibaidꞌ diikaꞌ nllioꞌ biaꞌ gonntoꞌ,
ḻaꞌ ḻegakannanꞌ chzajniꞌgakin nadꞌ.
25 Ba zoa gaoshosh guetꞌ,
¡beṉgach nadꞌ yeḻꞌ mbannaꞌ ka ba bc̱heboꞌ gonoꞌ!
26 Ba bix̱oadoḻaa lawoꞌnaꞌ naꞌ liꞌ ba chaklenoꞌ nadꞌ.
Bzajniꞌchi nadꞌ diikaꞌ ba nllioꞌ biaꞌ gonntoꞌ.
27 Ben ka shajniidꞌ bi zeji diikaꞌ nllioꞌ biaꞌ gonntoꞌ,
ḻaꞌ cheenidꞌ siaꞌ wṉeyi c̱he diikaꞌ chonoꞌ daa chon ka chibani beṉꞌ.
28 Ḻe chakyeshidꞌ.
Goklen nadꞌ gakꞌ wal,
kon ka ba bc̱heboꞌ gonoꞌ.
29 Bi wiꞌo latj gakꞌ beṉꞌ wxiyeꞌ;
naꞌ lo yeḻꞌ beṉꞌ wen c̱hoꞌnaꞌ bliꞌ bsedi nadꞌ diikaꞌ chiyaḻꞌ gonntoꞌ.
30 Ba bc̱hoglallaa ṉoaꞌ nez ḻi c̱hoꞌnaꞌ
naꞌ chzelallaa gonꞌ diikaꞌ nllioꞌ biaꞌ gonntoꞌ.
31 Chios c̱haꞌ,
nadꞌ toshiizi chonꞌ diikaꞌ na choꞌa xtilloonaꞌ;
¡Bi wsiꞌo nadꞌ yeḻꞌ ztoꞌ!
32 Chonꞌ to dii byen chonꞌ diikaꞌ nllioꞌ biaꞌ gonntoꞌ,
ḻaꞌ linꞌ chonoꞌ ka chiba chizaki yic̱hjlallꞌdawaani.
33 Chios c̱haꞌ,
bliꞌ bsedi nadꞌ gonꞌ diikaꞌ nllioꞌ biaꞌ gonntoꞌ,
ḻaꞌ cheenidꞌ gongakaꞌn shnon mbanꞌ.
34 Ben ka shajniidꞌ kwenc̱he gonꞌ diikaꞌ nllioꞌ biaꞌ gonntoꞌ,
naꞌ gongakaꞌn do yic̱hj do lallaa.
35 Ben ka wzenagꞌ c̱he diikaꞌ nllioꞌ biaꞌ gonntoꞌ,
ḻaꞌ ḻegakannanꞌ chzoagakan nadꞌ mbalaz.
36 Bengach ka yibachidꞌ diikaꞌ nllioꞌ biaꞌ gonntoꞌ,
aga ka yeḻꞌ wniꞌanaꞌ.
37 Bi wiꞌo latj koo yic̱hjꞌ diikaꞌ bibi zakii.
Beṉ nadꞌ yeḻꞌ mbannaꞌ kon ka ba bc̱heboꞌ gonoꞌ.
38 Bengach daa ba bc̱heboꞌ gonoꞌ c̱haꞌ
ka chonoꞌ c̱he yogꞌ beṉꞌkaꞌ chall chlleb liꞌ.
39 Bkwasgach yeḻꞌ ztoꞌnaꞌ daa bi cheenidꞌ gak c̱haꞌ,
ḻaꞌ diikaꞌ nllioꞌ biaꞌ gonntoꞌ nakgakan wen.
40 Nadꞌ ba wzelallaa diikaꞌ nllioꞌ biaꞌ gonntoꞌ.
Beṉ nadꞌ yeḻꞌ mbannaꞌ,
ḻaꞌ linꞌ nakoꞌ beṉꞌ liꞌ beṉꞌ shaoꞌ.
41 Chios c̱haꞌ,
bliꞌgachi nadꞌ yeḻꞌ chaki c̱hoꞌnaꞌ naꞌ bislagach nadꞌ,
kon ka bc̱heboꞌ gonoꞌ c̱haꞌ.
42 Naꞌ daa nx̱enilallaa choꞌa xtilloonanꞌ,
gak yilliꞌa choꞌa xtillꞌ beṉꞌkaꞌ choni nadꞌ nakzi.
43 Bi wkwasgachoꞌ dillꞌ ḻi c̱hoꞌkaꞌ choꞌa ḻollaani,
ḻaꞌ ba nonꞌ lez diikaꞌ nllioꞌ biaꞌ gonntoꞌ.
44 Toshiizi,
naꞌ zejḻi kaṉi
cheenidꞌ gonꞌ diikaꞌ nllioꞌ biaꞌ gonntoꞌ.
45 Naꞌ kono gak wsej wllon soaꞌ mbalaz,
daa ba chonꞌ diikaꞌ nllioꞌ biaꞌ gonntoꞌ.
46 Naꞌ weꞌlenꞌ beṉꞌ wṉabiaꞌkaꞌ dillꞌ c̱he diikaꞌ nllioꞌ biaꞌ gonntoꞌ
naꞌ bi yiyii yidoꞌidꞌ.
47 Ḻaꞌ daa ḻe chakidꞌ diikaꞌ nllioꞌ biaꞌ gonntoꞌ,
chiba chizakidꞌ gongakaꞌn.
48 Ḻe zelallaa naꞌ ḻe chakidꞌ diikaꞌ nllioꞌ biaꞌ gonntoꞌ,
naꞌ ḻe wṉeyi ziaꞌ c̱hegakin.
49 Jadini daa ba bc̱heboꞌ gonoꞌ c̱haꞌ,
ḻaꞌ ba bx̱enoꞌ lallaa gonoꞌn.
50 Daa nc̱heboꞌ gaklenoꞌ nadꞌ,
choṉan yeḻꞌ mban c̱haꞌ,
naꞌ ḻen chiyonxenlalliin nadꞌ katꞌ chakyeshidꞌ.
51 Beṉꞌkaꞌ chep chaꞌlallꞌ,
tlizi ḻe chtitj chtangakileꞌ nadꞌ,
per nadꞌ bi chḻaꞌlawaa diikaꞌ nllioꞌ biaꞌ gonntoꞌ.
52 Chjadinidꞌ diikaꞌ nllioꞌ biaꞌ gonntoꞌ daa ba zeji,
naꞌ ḻennanꞌ chiyonxenlalliin nadꞌ,
Chios c̱haꞌ.
53 Chllaachga yic̱hjꞌ ni c̱he beṉꞌ malꞌkaꞌ
daa chchooṉlallꞌgakeꞌ diikaꞌ nllioꞌ biaꞌ gonntoꞌ.
54 Choḻ chṉeidꞌ diikaꞌ nllioꞌ biaꞌ gonntoꞌ
lo yell-lioni gani zoaꞌ ḻega beṉꞌ zitꞌ.
55 Chios c̱haꞌ,
waḻkaꞌ chjadinidꞌ liꞌ,
naꞌ cheenidꞌ gonꞌ diikaꞌ nllioꞌ biaꞌ gonntoꞌ.
56 Dgan chidoḻaa gonꞌ:
wzoaꞌ dillꞌ c̱heyi diikaꞌ nllioꞌ biaꞌ gonntoꞌ.
57 Kochno zoa c̱haꞌ,
zeelo linꞌ,
Chios c̱haꞌ.
Ba bc̱hebꞌ gonꞌ diikaꞌ na choꞌa xtilloonaꞌ.
58 Do yic̱hj do lallaa chonꞌ ka chazlalloo.
Biyeshꞌlallꞌgachi nadꞌ kon ka bc̱heboꞌ gonoꞌ c̱haꞌ.
59 Ba wziaꞌ wṉeyi kwasḻoḻ nakan nsaꞌ c̱haꞌ
naꞌ ba chonchꞌ to dii byen chonꞌ daa nllioꞌ biaꞌ gonntoꞌ.
60 Ba btalallaa
benꞌ diikaꞌ nllioꞌ biaꞌ gonntoꞌ.
61 Beṉꞌ malkaꞌ nec̱hjyobgakeꞌ nadꞌ kwenc̱he wzapgakeꞌ nadꞌ,
per bi chsanlallaa diikaꞌ nllioꞌ biaꞌ gonntoꞌ.
62 Waḻ chel chasꞌ choṉꞌ liꞌ yeḻꞌ chox̱ken
c̱heyi dii ḻi dii shaoꞌkaꞌ nllioꞌ biaꞌ gonntoꞌ.
63 Nadꞌ nllaguidꞌ yogꞌ beṉꞌkaꞌ chall chlleb liꞌ,
beṉꞌkaꞌ chon diikaꞌ nllioꞌ biaꞌ gonntoꞌ.
64 Chios c̱haꞌ,
doxen lo yell-lioni chliꞌlao yeḻꞌ chaki c̱hoꞌnaꞌ.
Bzajniꞌchi nadꞌ diikaꞌ ba nllioꞌ biaꞌ gonntoꞌ.
65 Chios c̱haꞌ,
liꞌ ba benoꞌ wen c̱haꞌ,
kon ka bc̱heboꞌ gonoꞌ c̱haꞌ.
66 Bliꞌ bsedi nadꞌ gakꞌ to beṉꞌ nteyi naꞌ beṉ nadꞌ yeḻꞌ sinꞌ c̱hoꞌnaꞌ,
ḻaꞌ nx̱enilallaa diikaꞌ nllioꞌ biaꞌ gonntoꞌ.
67 Kanaꞌ ziꞌ gonoꞌ ka yex̱jlallaa,
bi bzenagꞌ c̱hoꞌ,
san ṉaa,
ba chonꞌ ka na choꞌa xtilloonaꞌ.
68 Liꞌ nakoꞌ beṉꞌ wen naꞌ chonoꞌ daa nak wen;
bzajnii nadꞌ diikaꞌ nllioꞌ biaꞌ gonntoꞌ.
69 Beṉꞌkaꞌ chep chaꞌlallꞌ chyilj chzangakeꞌ choꞌa xtillaa,
per nadꞌ do yic̱hj do lallaa chonꞌ diikaꞌ nllioꞌ biaꞌ gonntoꞌ.
70 Ḻegakeꞌ nakgakeꞌ beṉꞌ bi nteyi,
per nadꞌ,
chibaidꞌ ka nak diikaꞌ nllioꞌ biaꞌ gonntoꞌ.
71 Ḻe wen gok c̱haꞌ daa wxakꞌziꞌa,
kwenc̱he wyajniidꞌ diikaꞌ nllioꞌ biaꞌ gonntoꞌ.
72 Zakꞌchi diikaꞌ nllioꞌ biaꞌ gonntoꞌ
aga ka daa zoayaa zoallin mech de or naꞌ de plat.
73 Linꞌ bx̱e bsiloꞌ nadꞌ.
Linꞌ benoꞌ ka wya wbiṉꞌ.
Beṉ nadꞌ yeḻꞌ sinꞌ c̱hoꞌnaꞌ kwenc̱he shajniidꞌ diikaꞌ nllioꞌ biaꞌ gonntoꞌ.
74 Beṉꞌkaꞌ chall chlleb liꞌ yibagakileꞌ ileꞌgakileꞌ ka chaklenoꞌ nadꞌ
daa nonꞌ lez choꞌa xtilloonaꞌ.
75 Chios c̱haꞌ,
ṉezidꞌ diikaꞌ nllioꞌ biaꞌ gonntoꞌ nakgakan dii ḻi dii shaoꞌ,
naꞌ daa bsakꞌziꞌo nadꞌ,
ka chiyaḻꞌkz gak c̱hanꞌ.
76 Bengach ka yiyonxenlallꞌ yeḻꞌ chaki c̱hoꞌnaꞌ nadꞌ,
kon ka bc̱heboꞌ gonoꞌ c̱haꞌ.
77 Bliꞌgachi nadꞌ yeḻꞌ chiyeshꞌlallii c̱hoꞌnaꞌ kwenc̱he gatꞌch yeḻꞌ mban c̱haꞌ,
ḻaꞌ chibaidꞌ gonꞌ diikaꞌ nllioꞌ biaꞌ gonntoꞌ.
78 Siꞌgach beṉꞌkaꞌ chep chaꞌlallꞌ yeḻꞌ ztoꞌ,
ḻaꞌ aga bi benꞌ c̱hegakeꞌ naꞌ chbell chṉezgakeꞌ c̱haꞌ;
san nadꞌ,
cheenidꞌ siaꞌ wṉeyi diikaꞌ nllioꞌ biaꞌ gonntoꞌ.
79 Beṉꞌkaꞌ chall chlleb liꞌ naꞌ nombiaꞌgakeꞌ diikaꞌ nllioꞌ biaꞌ gonntoꞌ,
gonshgagakeꞌ nadꞌ txen.
80 Gonshgaꞌ do yic̱hj do lallaa diikaꞌ nllioꞌ biaꞌ
kwenc̱he bi siꞌa yeḻꞌ ztoꞌ.
81 Shlak chbezꞌ yidsloꞌ nadꞌ zej chde c̱haꞌ,
per nonꞌ lez choꞌa xtilloonaꞌ.
82 Zej chde c̱haꞌ shlak chbezꞌ gonoꞌ daa ba bc̱heboꞌ gonoꞌ c̱haꞌ.
Naꞌ niaꞌ:
“¿Bat yidoꞌ yidyenxenlalloo nadꞌ?”
83 Ḻaꞌkzi ba nakꞌ to beṉꞌ ba wde c̱heyin,
bi chsanlallaa diikaꞌ nllioꞌ biaꞌ gonntoꞌ.
84 ¿Zi kaꞌkꞌ chiyaḻꞌ kwezꞌ gaklenoꞌ nadꞌ?
¿Bat wc̱hogbiꞌo c̱he beṉꞌkaꞌ chsakꞌziꞌ nadꞌ?
85 Beṉꞌkaꞌ chep chaꞌlallꞌ,
beṉꞌkaꞌ bi chon txen diikaꞌ nllioꞌ biaꞌ gonntoꞌ,
ba wdengakeꞌ yechkaꞌ lo nezaꞌ ganaꞌ zyaa kwenc̱he ibix̱ꞌ ḻoꞌinkaꞌ.
86 Diikaꞌ nllioꞌ biaꞌ gonntoꞌ nakgakan dii gak wx̱enlallꞌntoꞌ.
Goklengach nadꞌ,
ḻaꞌ chiꞌnoz beṉꞌki nadꞌ ḻaꞌkzi aga bi chonꞌ c̱hegakeꞌ.
87 Zi latꞌzə ki chongakeꞌ gan wlliayiꞌgakeꞌ nadꞌ,
per bi chsanlallaa diikaꞌ nllioꞌ biaꞌ gonntoꞌ.
88 Beṉgach nadꞌ yeḻꞌ mban daa nakoꞌ beṉꞌ chiyeshꞌlallii,
naꞌ gonꞌ diikaꞌ wnoꞌ gonntoꞌ.
89 Chios c̱haꞌ,
choꞌa xtilloonaꞌ den zejḻi kaṉi
naꞌ tlizi den yabanaꞌ.
90 Toshiizi chonoꞌ daa nc̱heboꞌ gonoꞌ;
linꞌ bx̱e bsiloꞌ yell-lioni naꞌ zoan toshiizi.
91 Yogꞌte diikaꞌ benoꞌ ni degakan kon ka bllioꞌ biaꞌ c̱hegakin,
naꞌ yogꞌtegakan chongakan ka cheeniloꞌ.
92 Sheḻꞌ daa nllioꞌ biaꞌ gonntoꞌ bi chonan ka yibaidꞌ
yeḻꞌ chakyeshiinaꞌ ba blliayiꞌn nadꞌ,
sheḻꞌkaꞌ.
93 Ṉezganz kwej yic̱hjꞌ diikaꞌ nllioꞌ biaꞌ gonntoꞌ,
ḻaꞌ ni c̱heyinnanꞌ noṉoꞌ nadꞌ yeḻꞌ mbannaꞌ.
94 Bislagach nadꞌ,
ḻaꞌ lallꞌ nonꞌ nakꞌ
naꞌ ba wnoaꞌ diikaꞌ nllioꞌ biaꞌ gonntoꞌ.
95 Beṉꞌ malkaꞌ chinogakeꞌ bat gatꞌ latj wlliayiꞌgakeꞌ nadꞌ,
per nadꞌ ziaꞌ wṉeyi c̱he diikaꞌ nllioꞌ biaꞌ gonntoꞌ.
96 Ba gokbeꞌidꞌ yogꞌ diikaꞌ de kwiayiꞌgakan,
per diikaꞌ nllioꞌ biaꞌ gonntoꞌ biga llia te c̱hegakin.
97 Chakchgaidꞌ daa nllioꞌ biaꞌ gonntoꞌ.
Do lla ziaꞌn wṉeyi.
98 Diikaꞌ nllioꞌ biaꞌ gonntoꞌ nonan nadꞌ beṉꞌ sinꞌch aga ka beṉꞌkaꞌ chakziꞌ chakzbani nadꞌ,
ḻaꞌ toshiizi ziaꞌn wṉeyi.
99 Chajniꞌtechidꞌ aga ka beṉꞌkaꞌ chliꞌ chsedi nadꞌ
daa ḻe wṉeyi ziaꞌ c̱he daa nllioꞌ biaꞌ gonntoꞌ.
100 Chajniꞌchidꞌ aga ka beṉꞌ golkaꞌ
daa chzoa dillꞌ c̱heyi daa nllioꞌ biaꞌ gonntoꞌ.
101 Ba biḻaalawaa yogꞌte nez malkaꞌ
kwenc̱he gonꞌ ka na choꞌa xtilloonaꞌ.
102 Bigaṉꞌ wḻaalawaa diikaꞌ nllioꞌ biaꞌ gonntoꞌ,
ḻaꞌ kwinoꞌ chliꞌ chsediloꞌn nadꞌ.
103 Choꞌa xtilloonaꞌ chakchidaꞌn zix̱ siach
aga ka shinꞌ baseraꞌ.
104 Diikaꞌ nllioꞌ biaꞌ gonntoꞌ ba nonan nadꞌ beṉꞌ chajnii,
daan,
chakziꞌ chakzbanidꞌ yogꞌ daa nak de wxiyeꞌ.
105 Choꞌa xtilloonaꞌ nakan ka to beeniꞌ
dii chzeeniꞌ lo nezaꞌ ganaꞌ chiyaḻꞌ shaa.
106 De to dii bc̱hebꞌ,
naꞌ chiyaḻꞌ gonan:
chiyaḻꞌ gonꞌ diikaꞌ bllioꞌ biaꞌ gonntoꞌ,
diikaꞌ nak dii ḻi dii shaoꞌ.
107 Chios c̱haꞌ,
ḻe nyeshꞌchga zoaꞌ;
beṉgach nadꞌ yeḻꞌ mbannaꞌ,
kon ka bc̱heboꞌ gonoꞌ c̱haꞌ.
108 Chios c̱haꞌ,
ixiꞌ ilebgach diiki choḻ chṉiaꞌ liꞌ,
naꞌ bliꞌ bsedgachi nadꞌ daa nllioꞌ biaꞌ gonntoꞌ.
109 Toshiizi zoaꞌ dii nxoll lao yeḻꞌ witaꞌ,
per bi chsanlallaa diikaꞌ nllioꞌ biaꞌ gonntoꞌ.
110 Beṉꞌ malkaꞌ chyiljlallꞌgakeꞌ nak gongakeꞌ wchix̱gakeꞌ nadꞌ,
per nadꞌ,
bi chḻaꞌlawaa diikaꞌ nllioꞌ biaꞌ gonntoꞌ.
111 Diikaꞌ nllioꞌ biaꞌ gonntoꞌ nakan dii bkwaaṉꞌlenoꞌ nadꞌ toshiizi,
naꞌ chzoagakan yic̱hjlallꞌdawaani mbalaz.
112 Ba bc̱hoglallaa shnon mbanꞌ gonꞌ diikaꞌ nllioꞌ biaꞌ.
113 Chakzbanchgaidꞌ beṉꞌ wxiyeꞌkaꞌ,
san chakidꞌ diikaꞌ nllioꞌ biaꞌ gonntoꞌ.
114 Linꞌ chkwashꞌ chkweejoꞌ nadꞌ lao bittez dii nxoll,
naꞌ nonꞌ lez choꞌa xtilloonaꞌ.
115 Ḻi kwas kaꞌlə,
leꞌ beṉꞌ mal,
ḻaꞌ cheenidꞌ gonꞌ daa bllia Chios c̱haꞌnaꞌ biaꞌ gonntoꞌ.
116 Goklengach nadꞌ kon ka bc̱heboꞌ gonoꞌ c̱haꞌ,
naꞌ gatꞌ yeḻꞌ mban c̱haꞌ.
Bat siaꞌ yeḻꞌ ztoꞌ daa ba nonꞌ liꞌ lez.
117 Goklen nadꞌ yilaꞌ lao dii nxollkaꞌ,
naꞌ toshiizi gonꞌ diikaꞌ nllioꞌ biaꞌ gonntoꞌ.
118 Liꞌ chbej yic̱hjoꞌ beṉꞌkaꞌ chiḻaalaꞌo diikaꞌ nllioꞌ biaꞌ gonntoꞌ,
ḻaꞌ lillinzi chiyiljlallꞌgakeꞌ de wxiyeꞌkaꞌ.
119 Beṉꞌ malkaꞌ lleꞌ lo yell-lioni nakgakeꞌ ka yix beb lawoꞌnaꞌ,
daan,
ḻe chakidꞌ diikaꞌ nllioꞌ biaꞌ gonntoꞌ.
120 Beli chen c̱haꞌni chxizan daa chall chlleban liꞌ,
chapꞌ balaaṉ diikaꞌ nllioꞌ biaꞌ gonntoꞌ.
121 Toshiizi chonꞌ daa nak dii ḻi dii shaoꞌ;
bi wsanlalloꞌ nadꞌ gakꞌ lo naꞌ beṉꞌkaꞌ chsakꞌziꞌ nadꞌ.
122 Bengach ka gak wen c̱haꞌ;
bi wiꞌo latj c̱he beṉꞌkaꞌ chep chaꞌlallꞌ wsakꞌziꞌgakeꞌ nadꞌ.
123 Ba zej chde c̱haꞌ shlak chbezꞌ yisloꞌ nadꞌ
naꞌ gonoꞌ daa bc̱heboꞌ gonoꞌ c̱haꞌ.
124 Daa nakoꞌ beṉꞌ chiyeshꞌlallii,
bengach ka gak wen c̱haꞌ;
bliꞌ bsedgachi nadꞌ diikaꞌ nllioꞌ biaꞌ gonntoꞌ.
125 Nadꞌ chonꞌ ka cheeniloꞌ.
Beṉ nadꞌ yeḻꞌ sinꞌnaꞌ
ḻaꞌ cheenidꞌ shajniꞌchidꞌ diikaꞌ nllioꞌ biaꞌ gonntoꞌ.
126 Chios c̱haꞌ,
ba goḻꞌ wsakꞌziꞌlatoo
beṉꞌkaꞌ ba wdishj diikaꞌ nllioꞌ biaꞌ gonntoꞌ.
127 Daan,
ḻe chakidꞌ diikaꞌ nllioꞌ biaꞌ gonntoꞌ;
chakchgakidaꞌn aga ka oraꞌ daa zeelo nakch wen.
128 Daan,
noaꞌ yogꞌ diikaꞌ nllioꞌ biaꞌ gonntoꞌ
naꞌ chakzbanidꞌ yogꞌ diikaꞌ nak de wxiyeꞌ.
129 Diikaꞌ nllioꞌ biaꞌ gonntoꞌ nakgakan dii wen inlleb;
daan,
chonꞌ ka nagakan.
130 Katꞌ chzajniiloꞌ netoꞌ choꞌa xtilloonaꞌ nakan ka to beeniꞌ,
naꞌ ax̱t beenaꞌ bi chajnii chonan ḻeꞌ beṉꞌ sinꞌ.
131 Ḻe chzelallꞌchgaꞌ diikaꞌ nllioꞌ biaꞌ gonntoꞌ.
132 Bwiagach nadꞌ,
naꞌ biyeshꞌlallii nadꞌ,
ka chonoꞌ c̱he beṉꞌkaꞌ ḻe chaki liꞌ.
133 Ben ka gonꞌ kon ka na choꞌa xtilloonaꞌ;
naꞌ bi wiꞌo latj iṉabiaꞌ dii malaꞌ nadꞌ.
134 Bisla nadꞌ lo yeḻꞌ zeshꞌ yeḻꞌ zban c̱he beṉꞌ yell-lioni,
ḻaꞌ cheenidꞌ gonꞌ diikaꞌ nllioꞌ biaꞌ gonntoꞌ.
135 Bleꞌshiigachi nadꞌ,
naꞌ bliꞌ bsedi nadꞌ diikaꞌ nllioꞌ biaꞌ gonntoꞌ.
136 Ka to yao ba gok nis xc̱hell c̱haꞌni chchej jalawꞌki
daa kono chon diikaꞌ nllioꞌ biaꞌ gonntoꞌ.
137 Chios c̱haꞌ,
linꞌ nakoꞌ beṉꞌ ḻi beṉꞌ shaoꞌ,
naꞌ dii wen dii shaoꞌ nak diikaꞌ nllioꞌ biaꞌ gonntoꞌ.
138 Yogꞌte diikaꞌ nllioꞌ biaꞌ gonntoꞌ
nakgakan dii wen dii shaoꞌ naꞌ dii wx̱enlallꞌntoꞌ.
139 Chao chdiachga yeḻꞌ chllaanaꞌ nadꞌ
ḻaꞌ beṉꞌkaꞌ chakziꞌ chakzbani nadꞌ ba wlej yic̱hjgakeꞌ choꞌa xtilloonaꞌ.
140 Choꞌa xtillookaꞌ chliꞌlawin nakan dowalj dii ḻi,
daan,
ḻe chakidaꞌn.
141 Nadꞌ nakꞌ beṉꞌ yeshꞌdoꞌ naꞌ choni beṉꞌ nadꞌ nakzi,
per bi chsanlallaa gonꞌ diikaꞌ nllioꞌ biaꞌ gonntoꞌ.
142 Toshiizi nakoꞌ beṉꞌ ḻi beṉꞌ shaoꞌ,
naꞌ diikaꞌ nllioꞌ biaꞌ gonntoꞌ nakan dii ḻi.
143 Chakyeshꞌchgaidꞌ naꞌ chzakꞌziꞌchgaꞌ,
per chibaidꞌ gonꞌ diikaꞌ nllioꞌ biaꞌ gonntoꞌ.
144 Diikaꞌ nllioꞌ biaꞌ gonntoꞌ toshiizi nakgakan dii ḻi dii shaoꞌ.
¡Beṉ nadꞌ yeḻꞌ sinꞌnaꞌ kwenc̱he gatꞌ yeḻꞌ mban c̱haꞌ!
145 Chios c̱haꞌ,
do yic̱hj do lallaa chṉiaꞌ ḻi;
goklengach nadꞌ,
naꞌ gonꞌ diikaꞌ nllioꞌ biaꞌ gonntoꞌ.
146 Chṉabidꞌ liꞌ yisloꞌ nadꞌ,
naꞌ gonꞌ diikaꞌ nllioꞌ biaꞌ gonntoꞌ.
147 Ka ba chzoa xenaꞌ,
chasꞌ naꞌ chṉabidꞌ liꞌ gaklenoꞌ nadꞌ,
naꞌ ba nonꞌ lez choꞌa xtilloonaꞌ.
148 Do yel bi chesꞌ
daa cheenidꞌ siaꞌ wṉeyi c̱he choꞌa xtilloonaꞌ.
149 Chios c̱haꞌ,
bzenaggach c̱haꞌ daa nakoꞌ beṉꞌ chiyeshꞌlallii.
Beṉgach yeḻꞌ mban c̱haꞌ daa nakoꞌ beṉꞌ ḻi beṉꞌ shaoꞌ.
150 Gaoshosh ba no beṉꞌkaꞌ cheeni wsakꞌziꞌ nadꞌ,
naꞌ ba wlej yic̱hjgakeꞌ diikaꞌ nllioꞌ biaꞌ gonntoꞌ.
151 Gaḻꞌ gllin zoꞌ liꞌ,
Chios c̱haꞌ,
naꞌ yogꞌ diikaꞌ nllioꞌ biaꞌ nakan dii ḻi.
152 Ba wlla nombiꞌa diikaꞌ nllioꞌ biaꞌ gonntoꞌ,
diikaꞌ bzoꞌ gon llin zejḻi kaṉi.
153 Bwiagach ka chzakꞌziꞌa naꞌ bisla nadꞌ,
ḻaꞌ biṉꞌ gaḻ-lallaa gonꞌ diikaꞌ nllioꞌ biaꞌ gonntoꞌ.
154 Goklen nadꞌ lawi dga chak c̱haꞌ naꞌ bisla nadꞌ.
Beṉgach nadꞌ yeḻꞌ mbannaꞌ,
ka bc̱heboꞌ gonoꞌ c̱haꞌ.
155 Biga yisloꞌ beṉꞌ malkaꞌ,
daa bi chongakeꞌ ka nllioꞌ biaꞌ gonntoꞌ.
156 Chios c̱haꞌ,
beṉꞌ chiyeshꞌlallii nlleb nakoꞌ;
beṉ yeḻꞌ mban c̱haꞌ daa nakoꞌ beṉꞌ ḻi beṉꞌ shaoꞌ.
157 Beṉꞌ zan nak beṉꞌkaꞌ chwiyi nadꞌ naꞌ beṉꞌkaꞌ chsakꞌziꞌ nadꞌ,
per nadꞌ bi chḻaꞌlawaa diikaꞌ nllioꞌ biaꞌ gonntoꞌ.
158 Ni latꞌ bi cheenidꞌ yen ileꞌidꞌ beṉꞌkaꞌ bi chzenag c̱hoꞌ,
ḻaꞌ bi chongakeꞌ ka na choꞌa xtilloonaꞌ.
159 Chios c̱haꞌ,
bwiakachi ka chakchgaidꞌ diikaꞌ nllioꞌ biaꞌ gonntoꞌ.
Daa nakoꞌ beṉꞌ chiyeshꞌlallii,
beṉgach nadꞌ yeḻꞌ mban.
160 Doxente choꞌa xtilloonaꞌ nakan dii ḻi;
naꞌ diikaꞌ nllioꞌ biaꞌ gonntoꞌ nakan dii ḻi dii shaoꞌ naꞌ gonan llin zejḻi kaṉi.
161 Beṉꞌ wṉabiaꞌkaꞌ chbeꞌnogakeꞌ nadꞌ ḻaꞌkzi aga bi benꞌ c̱hegakeꞌ,
per chllebchꞌ choꞌa xtilloonaꞌ aga ka ḻegakeꞌ.
162 Ḻe mbalaz zoaꞌ daa ṉezidꞌ nc̱heboꞌ gonoꞌ wen c̱haꞌ,
naꞌ chibaidꞌ ka chibayi to beṉꞌ chilleli to dii ḻe zakii.
163 Chakzbanidꞌ yeḻꞌ wxiyeꞌnaꞌ,
naꞌ chwichgaidaan,
san chakidꞌ diikaꞌ nllioꞌ biaꞌ gonntoꞌ.
164 Gall shii choeꞌlawaa liꞌ yogꞌ lla
ni c̱heyi dii ḻi dii shaoꞌkaꞌ nllioꞌ biaꞌ gonntoꞌ.
165 Ḻe mbalaz zoa beṉꞌkaꞌ chaki diikaꞌ nllioꞌ biaꞌ gonntoꞌ,
naꞌ aga bi de dii wchix̱an ḻegakeꞌ.
166 Chios c̱haꞌ,
chbezꞌ yidsloꞌ nadꞌ,
ḻaꞌ ba chonꞌ ka bllioꞌ biaꞌ gonntoꞌ.
167 Nadꞌ chonꞌ diikaꞌ nllioꞌ biaꞌ gonntoꞌ
naꞌ ḻe chakchgaidꞌgakan.
168 Chonꞌ ka nllioꞌ biaꞌ gonntoꞌ naꞌ ka na choꞌa xtilloonaꞌ,
ḻaꞌ ṉez ṉleꞌiloꞌ yogꞌ diikaꞌ chonꞌ.
169 Ilaꞌgach lawoꞌnaꞌ dga chṉabidꞌ liꞌ,
Chios c̱haꞌ.
Beṉ nadꞌ yeḻꞌ chajniinaꞌ,
kon ka na choꞌa xtilloonaꞌ gonoꞌ c̱haꞌ.
170 Ilaꞌgach dga chṉabidꞌ liꞌ lawoꞌnaꞌ.
Bislagach nadꞌ,
kon ka nc̱heboꞌ gonoꞌ c̱haꞌ.
171 Choꞌa ḻollaani weꞌlawaꞌn liꞌ,
ḻaꞌ linꞌ chliꞌ chsediloꞌ nadꞌ diikaꞌ nllioꞌ biaꞌ gonntoꞌ.
172 Choꞌa ḻollaani weꞌn dillꞌ c̱hoꞌnaꞌ,
ḻaꞌ yogꞌte diikaꞌ nllioꞌ biaꞌ gonntoꞌ nakgakan dii ḻi dii shaoꞌ.
173 Wzegach wṉeyi gaklenoꞌ nadꞌ,
daa wyazlallaa gonꞌ diikaꞌ bllioꞌ biaꞌ gonntoꞌ.
174 Chios c̱haꞌ,
zelallaa yidsloꞌ nadꞌ,
naꞌ chibaidꞌ gonꞌ diikaꞌ nllioꞌ biaꞌ gonntoꞌ.
175 Bengach ka gatꞌ yeḻꞌ mban c̱haꞌ kwenc̱he weꞌlawaa liꞌ,
naꞌ diikaꞌ nllioꞌ biaꞌ gonntoꞌ gaklenshgagakan nadꞌ.
176 Ba gok c̱haꞌ ka chak c̱he to xilꞌdoꞌ ba wnit.
Biyiljgach nadꞌ,
ḻaꞌ biṉꞌ kwej yic̱hjꞌ gonꞌ diikaꞌ nllioꞌ biaꞌ gonntoꞌ.