Salmo 118
1 Ḻi weꞌlaꞌo X̱ancho Chiozaꞌ daa nakeꞌ beṉꞌ wen,
ḻaꞌ yeḻꞌ chaki c̱heꞌnaꞌ biga llia te c̱heyin.
2 Leꞌ beṉꞌ Israel,
ḻi iṉa:
“Yeḻꞌ chaki c̱heꞌnaꞌ biga llia te c̱heyin.”
3 Leꞌ nakle xiiṉ dia c̱he dii Aarónnaꞌ,
ḻi iṉa:
“Yeḻꞌ chaki c̱heꞌnaꞌ biga llia te c̱heyin.”
4 Leꞌ chall chlleble X̱ancho Chiozaꞌ,
ḻi iṉa:
“Yeḻꞌ chaki c̱heꞌnaꞌ biga llia te c̱heyin.”
5 Ka wzoa nyeshꞌ,
beꞌḻwillꞌ X̱ancho Chiozaꞌ;
naꞌ bzenagueꞌ c̱haꞌ naꞌ bisleꞌ nadꞌ lawi daa gok c̱haꞌ.
6 X̱ancho Chiozaꞌ zoaleneꞌ nadꞌ,
naꞌ bi gall illebꞌ
shi bi goni beṉꞌ nadꞌ.
7 X̱ancho Chiozaꞌ zoaleneꞌ nadꞌ,
naꞌ chakleneꞌ nadꞌ.
Daan,
ileꞌteidꞌ wlliayee beṉꞌkaꞌ chakziꞌ chakzbani nadꞌ.
8 Wenchlan wx̱enilallꞌcho X̱ancho Chiozaꞌ
aga ka daa wx̱enilallꞌcho beṉꞌ yell-lioni.
9 Wenchlan wx̱enilallꞌcho X̱ancho Chiozaꞌ
aga ka daa wx̱enilallꞌcho no beṉꞌ wṉabiaꞌ.
10 Beṉꞌkaꞌ lleꞌ yogꞌ yellkaꞌ wcheꞌnaḻꞌ wcheꞌnogakeꞌ nadꞌ,
per kon yeḻꞌ wak c̱he X̱ancho Chiozaꞌ blliayaagakeꞌ.
11 Wyec̱hjyobgakeꞌ nadꞌ,
per kon yeḻꞌ wak c̱he X̱ancho Chiozaꞌ blliayaagakeꞌ.
12 Wllagdiagakeꞌ nadꞌ ka baser,
per yeḻꞌ zṉia c̱heꞌkaꞌ ḻobeꞌ biyol binitan ka chak c̱he xis yeshꞌ dii chaḻꞌ toldez lo yiꞌnaꞌ.
Ḻaꞌ kon yeḻꞌ wak c̱he X̱ancho Chiozanꞌ blliayiꞌgakee.
13 Bengakileꞌ nadꞌ zibiaꞌ naꞌ goklallꞌgakeꞌ wlliayiꞌgakeꞌ nadꞌ,
per X̱ancho Chiozaꞌ gokleneꞌ nadꞌ.
14 Choḻꞌ chṉiaꞌ X̱ancho Chiozaꞌ,
daa choneꞌ nadꞌ beṉꞌ wal.
Naꞌ ḻenꞌ ba bisleꞌ nadꞌ laweꞌkaꞌ.
15 Ḻoo yoo lill beṉꞌ ḻi beṉꞌ shaoꞌkaꞌ de yeḻꞌ chiba chizaki daa ba bengakeꞌ gan,
naꞌ ax̱t chosyaagakileꞌ nagakeꞌ:
“Kon yeḻꞌ wak choo yeḻꞌ wak xen c̱he X̱ancho Chiozaꞌ ba bisleꞌ choꞌ.
16 Yeḻꞌ wak c̱he X̱ancho Chiozaꞌ nakan yeḻꞌ wak choo yeḻꞌ xen.
Kon yeḻꞌ wak choo yeḻꞌ wak xen c̱he X̱ancho Chiozaꞌ ba bisleꞌ choꞌ.”
17 Bi beꞌ X̱ancho Chiozaꞌ latj guetꞌ,
san beṉcheꞌ yeḻꞌ mban c̱haꞌ kwenc̱he wiꞌa dillꞌ daa ba beneꞌ.
18 X̱ancho Chiozaꞌ ḻe ba bsakꞌziꞌe nadꞌ,
per biṉꞌ wiꞌe latj guetꞌ.
19 Ḻi wsalj choꞌa puert c̱he leshꞌ lill xḻatj X̱ancho Chiozaꞌ,
kwenc̱he shoꞌa wiꞌaneꞌ yeḻꞌ chox̱ken.
20 Dgan puert c̱he leshꞌ lill xḻatj X̱ancho Chiozaꞌ,
ganaꞌ shoꞌ beṉꞌkaꞌ nak beṉꞌ ḻi beṉꞌ shaoꞌ.
21 Choṉꞌ liꞌ yeḻꞌ chox̱ken,
Chios c̱haꞌ,
ḻaꞌ ba bzenagoꞌ c̱haꞌ naꞌ ba bisloꞌ nadꞌ.
22 Yajaꞌ daa bi wyoolallꞌ wen yookaꞌ,
ḻeyeṉꞌlannanꞌ yajaꞌ daa ba nc̱hejcha yoonaꞌ.
23 Dga ben X̱ancho Chiozaꞌ
nakan to dii chibanicho.
24 Llani zoacho ṉaa ba goklen X̱ancho Chiozaꞌ choꞌ,
naꞌ chiyaḻꞌ yiba yizakicho.
25 Ben goklen,
Chios c̱haꞌ,
bislagach netoꞌ.
Ben goklen,
Chios c̱haꞌ,
ben ka gak wen c̱hentoꞌ.
26 ¡Gonḻeeyshga X̱ancho Chiozaꞌ beeni bseḻee!
Ḻoo lill xḻatj X̱ancho Chiozi chṉabntoꞌ gonḻeeyeꞌ leꞌ.
27 X̱anchonaꞌ nakeꞌ Chios,
naꞌ ba gokleneꞌ choꞌ.
Ḻi gak toz,
ḻi gox̱ꞌ zinkaꞌ shajlenle laweꞌnaꞌ ax̱t ganaꞌ chzeygakeꞌ bayix̱ꞌkaꞌ.
28 Linꞌ nakoꞌ Chios c̱haꞌ,
naꞌ weꞌlawaa liꞌ.
Linꞌ nakoꞌ Chios c̱haꞌ,
naꞌ wiꞌa dillꞌ nakoꞌ beṉꞌ choo beṉꞌ xen.
29 Ḻi weꞌlaꞌo X̱ancho Chiozaꞌ daa nakeꞌ beṉꞌ wen,
ḻaꞌ yeḻꞌ chaki c̱heꞌnaꞌ biga llia te c̱heyin.