Salmo 115
1 Chios c̱haꞌ,
aga netonꞌ chidoḻꞌntoꞌ shoontoꞌ balaaṉ,
san linꞌ chidoḻoo shoo balaaṉnaꞌ daa napoꞌ yeḻꞌ chakinaꞌ naꞌ daa chonoꞌ daa bc̱heboꞌ gonoꞌ.
2 ¿Berac̱he iṉaz beṉꞌ zitꞌkaꞌ:
“Gaṉi Chios c̱helenaꞌ?”
3 Chios c̱hechonaꞌ zoeꞌ yabanaꞌ;
naꞌ choneꞌ kon da cheenileꞌ.
4 San ḻegakeꞌ nongakeꞌ lwaa lsakꞌ chios c̱heꞌkaꞌ de or naꞌ de plat,
naꞌ nakgakan dii choni ṉiꞌa neekaꞌ.
5 Zoa choꞌagakin per bi chak wshaljgakan,
zoa jalaogakin per bi chleꞌgakin;
6 zoa naggakin per bi chengakin,
naꞌ zoa xinꞌgakin per bi chḻaꞌgakin.
7 Zoa naꞌgakin per bibi chak gox̱ꞌgakan;
zoa ṉiꞌagakin per bi chak saꞌgakan;
¡ni to dillꞌ bi chchej choꞌayinkaꞌ!
8 Ka beenaꞌ choneꞌ ḻegakan,
naꞌ ka beenaꞌ nx̱enilallee ḻegakan,
lebzi bi ntelengakileꞌn.
9 Leꞌ beṉꞌ Israel,
¡ḻi wx̱enilallꞌ X̱ancho Chiozaꞌ!
Ḻenꞌ chakleneꞌ choꞌ naꞌ chap chwieꞌ choꞌ.
10 Leꞌ bx̱oz,
¡ḻi wx̱enilallꞌ X̱ancho Chiozaꞌ!
Ḻenꞌ chakleneꞌ choꞌ naꞌ chap chwieꞌ choꞌ.
11 Leꞌ chaple X̱ancho Chiozaꞌ balaaṉ,
¡ḻi wx̱enilallee!
Ḻenꞌ chakleneꞌ choꞌ naꞌ chap chwieꞌ choꞌ.
12 ¡X̱ancho Chiozaꞌ ba jadinileꞌ choꞌ
naꞌ gonḻeeyeꞌ choꞌ!
Gonḻeeyeꞌ choꞌ beṉꞌ Israel.
Gonḻeeyeꞌ beṉꞌkaꞌ nak xiiṉ dia c̱he dii Aarónnaꞌ.a
13 Gonḻeeyeꞌ beṉꞌkaꞌ chall chlleb ḻeꞌ,
ka beṉꞌ zakii naꞌ ka beṉꞌ bi zakii.
14 ¡X̱ancho Chiozaꞌ wzesh wzaneꞌ dia c̱helekaꞌ naꞌ xiiṉ dia c̱he xiiṉ c̱helekaꞌ!
15 ¡X̱ancho Chiozaꞌ,
beenaꞌ bx̱e bsil yabanaꞌ naꞌ yell-lioni,
gonḻeeyshgueꞌ leꞌ!
16 Yabanaꞌ nakan lill xḻatj X̱ancho Chiozaꞌ,
naꞌ yell-lioni beneꞌn lall naꞌ beṉec̱haꞌ.
17 Beṉꞌkaꞌ ba wit naꞌ ba billingake latjaꞌ ganaꞌ lleꞌ beṉꞌ wetkaꞌ,
bich gak weꞌlaꞌogakeꞌ X̱ancho Chiozaꞌ.
18 San choꞌ weꞌlaꞌocho X̱ancho Chiozaꞌ
ṉaa naꞌ toshiizi.
¡Ḻi weꞌlaꞌo X̱ancho Chiozaꞌ!