Salmo 116
1 Ḻe chakidꞌ X̱ancho Chiozaꞌ daa ba bzenagueꞌ daa wṉabidee.
2 Daa ba bzenagueꞌ c̱haꞌ,
shnon mbanꞌ iṉabidee gakleneꞌ nadꞌ.
3 Yeḻꞌ witaꞌ wyec̱hj wbiin nadꞌ
naꞌ gokyeshidꞌ daa ba zoa shoꞌa ḻoo banaꞌ,
naꞌ yeḻꞌ chllebaꞌ len yeḻꞌ zakꞌziꞌnaꞌ btakw bc̱hejgakan nadꞌ.
4 Naꞌch wṉabꞌ yeḻꞌ goklen c̱he X̱ancho Chiozaꞌ,
gotꞌyoidee yisleꞌ yeḻꞌ mban c̱haꞌni.
5 X̱ancho Chiozaꞌ nakeꞌ beṉꞌ ḻi beṉꞌ shaoꞌ naꞌ beṉꞌ chiyeshꞌlallii.
Chios c̱hechonaꞌ naklikzeꞌ beṉꞌ wen inlleb.
6 X̱ancho Chiozaꞌ chap chwieꞌ beṉꞌkaꞌ kono zoa gaklen ḻegakeꞌ.
Kanaꞌ bi chak wen c̱haꞌ,
ḻeꞌ gokleneꞌ nadꞌ.
7 Naꞌ ṉaa ba bizoaꞌ mbalaz,
ḻaꞌ X̱ancho Chiozaꞌ ba beneꞌ wen c̱haꞌ.
8 Daa ba bisleꞌ nadꞌ lao yeḻꞌ witaꞌ,
naꞌ bi biꞌe latj bi gak c̱haꞌ,
bich chbellyeshaa.
9 Naꞌ gakꞌ beṉꞌ wizoa dillꞌ lao X̱ancho Chiozaꞌ
shlak de yeḻꞌ mban c̱haꞌ lo yell-lioni.
10 Nadꞌ benḻilallaa Chiozaꞌ,
ḻaꞌkzi gokidꞌ
dii xen nak yeḻꞌ zakꞌziꞌ c̱haꞌnaꞌ.
11 Lo yeḻꞌ chakshejlallii c̱haꞌnaꞌ wniaꞌ:
“Yogꞌḻoḻ beṉꞌ nakgakeꞌ beṉꞌ wxiyeꞌ.”
12 ¿Naktgui gonꞌ c̱hixjꞌ yogꞌ dii wenkaꞌ
ben X̱ancho Chiozaꞌ c̱haꞌ?
13 Daa ba bisleꞌ nadꞌ,
wwazjꞌ vinonaꞌ lawi daa chzanidꞌ wiꞌaneꞌ,
naꞌ wiꞌaneꞌ yeḻꞌ chox̱ken.
14 Naꞌ gonꞌ diikaꞌ ba bc̱hebꞌ lao X̱ancho Chiozaꞌ
lao lkweꞌ yogꞌ beṉꞌ yell c̱heꞌkaꞌ.
15 Ḻe chjeḻi X̱ancho Chiozaꞌ
katꞌ chet beṉꞌkaꞌ nak lallꞌ nee.
16 Chios c̱haꞌ,
nadꞌ chonꞌ ka cheeniloꞌ.
Nadꞌ nak xiiṉ noolaꞌ chon ka cheeniloꞌ.
Linꞌ ba bxoxj btinoꞌ diikaꞌ btakw bc̱hej nadꞌ.
17 Naꞌ witꞌ bayix̱ꞌkaꞌ lawoꞌnaꞌ katꞌ goṉꞌ liꞌ yeḻꞌ chox̱ken,
naꞌ weꞌlawaa liꞌ,
Chios c̱haꞌ.
18 Naꞌ gonꞌ diikaꞌ ba bc̱hebꞌ lao X̱ancho Chiozaꞌ,
lao lkweꞌ beṉꞌkaꞌ nak yell c̱heꞌ
19 leshꞌ lill xḻatjeꞌnaꞌ
daa zoa yell Jerusalénnaꞌ.
¡Ḻi weꞌlaꞌo X̱ancho Chiozaꞌ!