Salmo 112
1 ¡Ḻi weꞌlaꞌo X̱ancho Chiozaꞌ!
Chakomba beenaꞌ chall chllebeꞌ X̱ancho Chiozaꞌ,
naꞌ ḻe chibaileꞌ choneꞌ daa nllieꞌ biaꞌ goneꞌ.
2 Xiiṉ dia c̱heꞌnaꞌ iṉabiaꞌgakeꞌ yell-lionaꞌ ganaꞌ mbangakileꞌ,
naꞌ Chiozaꞌ goneꞌ ka gak wen c̱hegakeꞌ.
3 Ḻoo yoo llilleꞌnaꞌ zoayaa zoallin yeḻꞌ wniaꞌnaꞌ,
naꞌ toshiizi chibayi Chiozaꞌ ka nsaꞌ c̱heꞌ.
4 Beṉꞌkaꞌ chall chllebgakeꞌ X̱ancho Chiozaꞌ nakgakeꞌ beṉ wen,
beṉꞌ chiyeshꞌlallii naꞌ beṉꞌ ḻi beṉ shaoꞌ.
Naꞌ nakgakeꞌ ka to beeniꞌ daa chzeeniꞌ lo yel c̱holaꞌ.
5 Beṉꞌ wennaꞌ do yic̱hj do lallee chbejeꞌ shloll bi dii chṉabi beṉꞌ ḻeꞌ,
naꞌ chitꞌ chdieꞌ ka chiyaḻi.
6 Naꞌ daan,
biga gak kaꞌzə daa choneꞌ.
¡Beṉꞌ ḻi beṉꞌ shawaa toshiizi lljadini beṉꞌ ḻeꞌ!
7 Naꞌ bi gall illebeꞌ katꞌ yenileꞌ zaꞌ to dii nxoll;
ḻaꞌ do yic̱hj do lallee zoac̱hec̱heꞌ nx̱enilallee X̱ancho Chiozaꞌ.
8 Naꞌ bibi de dii wzen ḻeꞌ wṉeyi,
ni bibi wwall wsheban ḻeꞌ,
naꞌ ileꞌteileꞌ kwiayiꞌ beṉꞌkaꞌ chakziꞌ chakzbangakileꞌneꞌ.
9 Naꞌ choꞌe beṉꞌ yeshꞌdoꞌkaꞌ daa chyallj chc̱hingakileꞌ,
naꞌ dii wennaꞌ daa choneꞌ biga llia te c̱heyin.
Naꞌ daa choneꞌ kaꞌ,
chgoo beṉꞌ ḻeꞌ balaaṉ.
10 Naꞌ beṉꞌ malkaꞌ chllaa chlokgakeꞌ katꞌ chleꞌgakileꞌneꞌ,
naꞌ zeelo chaoyaax̱ax̱j ḻeyeꞌkaꞌ daa bibi chak gongakileꞌneꞌ.
Naꞌ daa zelallꞌ beṉꞌ malkaꞌ gongakeꞌ bi gakan.