Salmo 111
1 ¡Ḻi weꞌlaꞌo X̱ancho Chiozaꞌ!
Do yic̱hj do lallaa weꞌlawaa liꞌ,
Chios c̱haꞌ,
ganaꞌ chdop chllag beṉꞌkaꞌ nak beṉꞌ ḻi beṉꞌ shaoꞌ.
2 Dii choo dii xen inlleb nak diikaꞌ chon X̱ancho Chiozaꞌ,
naꞌ beṉꞌkaꞌ chibain chzegakeꞌn wṉeyi.
3 Diikaꞌ chonleneꞌ yeḻꞌ wak xen c̱heꞌnaꞌ chliꞌn nakeꞌ beṉꞌ choo beṉꞌ xen,
beṉꞌ chidoḻꞌ shoꞌ balaaṉ,
naꞌ toshiizi nakeꞌ beṉꞌ ḻi beṉꞌ shaoꞌ.
4 Beneꞌ ka chjadin chjazaꞌlallꞌ yogꞌ beṉꞌ yeḻꞌ wak choo yeḻꞌ wak xenkaꞌ beneꞌ.
X̱ancho Chiozaꞌ nakeꞌ beṉꞌ wen beṉꞌ shaoꞌ naꞌ beṉꞌ chiyeshꞌlallii.
5 Choꞌe dii cheej chao beṉꞌkaꞌ chall chlleb ḻeꞌ,
naꞌ toshiizi chjadinileꞌ daa bc̱hebeꞌ goneꞌ c̱hegakeꞌ.
6 Ba bliileꞌ beṉꞌkaꞌ nak yell c̱heꞌ yeḻꞌ wakkaꞌ choneꞌ
daa biꞌe ḻegakeꞌ yell-lio c̱he beṉꞌkaꞌ bi nx̱enilallꞌgakeꞌneꞌ.
7 Diikaꞌ choneꞌ nakgakan dii ḻi dii shaoꞌ,
naꞌ wak wx̱enlallꞌcho diikaꞌ nllieꞌ biaꞌ goncho.
8 Ḻaꞌ nakgakan dii gon llin toshiizi,
naꞌ nakgakan dii ḻi dii shaoꞌ.
9 Bisleꞌ beṉꞌkaꞌ nak yell c̱heꞌ,
naꞌ daa bc̱hebeꞌ goneꞌ c̱hegakeꞌ nakan dii gon llin zejḻi kaṉi.
Chiozaꞌ nakeꞌ dowalj beṉꞌ liꞌ beṉꞌ shaoꞌ naꞌ nakeꞌ beṉꞌ chon ka gall illebcho.
10 Beenaꞌ cheeni gak beṉꞌ sinꞌ,
chiyaḻꞌ gall illebeꞌ X̱ancho Chiozaꞌ.
Beṉꞌkaꞌ chzoa xtilleenaꞌ,
ḻegakenꞌ nakgakeꞌ beṉꞌ chajnii.
Shajlaꞌoshga Chiozaꞌ toshiizi.