Salmo 110
1 X̱ancho Chiozaꞌ golleꞌ X̱anꞌnaꞌ:
“Wcheꞌ kwitꞌ de shḻini,a
shlak wzoaꞌ xṉiꞌonaꞌ beṉꞌkaꞌ chakzbani liꞌ.”
2 X̱ancho Chiozaꞌ goneꞌ kwenc̱he iṉabiaꞌlenoꞌ yeḻꞌ wak xen c̱hoꞌnaꞌ,
aga to ganaꞌ mbanzi yaa Siónnaꞌzə,
san len beṉꞌkaꞌ chleꞌzbani liꞌ iṉabiꞌo.
3 Beṉꞌ wlall c̱hoꞌkaꞌ,
gongakeꞌ liꞌ txen llanaꞌ shajoꞌ lo wdiḻaꞌ.
Naꞌ ka chleꞌicho xelj zagaꞌ daa chbia lo yix̱ꞌdoꞌkaꞌ shzilaꞌ,
kaꞌkzan ileꞌiloꞌ ibigꞌ beṉꞌ xkwidꞌ wewꞌkaꞌ lawoꞌnaꞌ lo yaakaꞌ ganaꞌ nak latj c̱he Chiozaꞌ.
4 Dga ba bc̱heb Chiozaꞌ naꞌ aga wishaa choꞌa xtilleenaꞌ daa wneꞌ:
“Liꞌ nakoꞌ bx̱oz zejḻi kaṉi,
ka nak bx̱oz Melquisedecaꞌ.”
5 X̱ancho Chiozaꞌ zieꞌ kwitoꞌ de shḻinaꞌ chakleneꞌ liꞌ,
naꞌ wlliayee beṉꞌ wṉabiaꞌkaꞌ llanaꞌ wseḻee yeḻꞌ zakꞌziꞌ c̱heꞌnaꞌ.
6 Naꞌ wc̱hogloeꞌ c̱he beṉꞌkaꞌ lleꞌ yogꞌ yellkaꞌ llia yell-lioni
naꞌ wzoles wzollineꞌ beṉꞌ wetkaꞌ,
naꞌ wlliayee yogꞌḻoḻ beṉꞌ wṉabiaꞌkaꞌ lleꞌ doxente yell-lioni.
7 Naꞌ beenaꞌ bzoꞌ chṉabiꞌe ka ngwee nez,
illineꞌ to choꞌa yao,
naꞌ yeejeꞌ nisaꞌ naꞌ yiyakshaoꞌlallee.