Salmo 109
1 Chios c̱haꞌ,
linꞌ choeꞌlawaa,
bi wdegongachoꞌ dga chṉabidꞌ liꞌ.
2 Beṉꞌ wxiyeꞌkaꞌ naꞌ beṉꞌ malkaꞌ
chbell chṉegakeꞌ zban c̱haꞌ,
naꞌ yogꞌ diikaꞌ nagakeꞌ c̱haꞌ nakgakan de wxiyeꞌ.
3 Naꞌ diikaꞌ chbell chṉegakeꞌ c̱haꞌ ax̱t nakgakan ka dii nec̱hji nadꞌ,
ḻaꞌkzi bibi benꞌ c̱hegakeꞌ.
4 Nadꞌ chongakidee wen,
naꞌ ḻegakeꞌ chdiḻ-lenləgakeꞌ nadꞌ.
Per nadꞌ choeꞌḻwillꞌ liꞌ gonoꞌ wen c̱hegakeꞌ.
5 Lwaa dii nan yiyongakileꞌ nadꞌ wen ka ba benꞌ c̱hegakeꞌ,
chṉit chdeləgakeꞌ nadꞌ.
Chongakidee wen,
per ḻegakeꞌ chakzbanləgakileꞌ nadꞌ.
6 Bzoa tlishꞌ beṉꞌ mal ka ḻeꞌ,
wc̱hogloeꞌ c̱heꞌ,
naꞌ wide dillꞌ c̱heꞌnaꞌtez gaweꞌ xya c̱heꞌ.
7 Katꞌ yiyiljniꞌagakeꞌ daa choneꞌ gakbeꞌshgagakileꞌ napeꞌ doḻꞌ.
Naꞌ dillꞌkaꞌ wiꞌe zizikli wx̱ejshgagakan ḻeꞌ.
8 Ibanshgueꞌ shlollzə,
naꞌ beṉꞌ yoblə yiyakshga lo nee daa nan gok lo nee goneꞌ.
9 Yigaaṉshga x̱iineꞌkaꞌ wizeb
naꞌ ḻekzkaꞌ xooleꞌnaꞌ.
10 ¡Tashga xiiṉeꞌkaꞌ kaꞌz naꞌ iṉabgakeꞌ yiyeshii beṉꞌ ḻegakeꞌ!
Naꞌ wlagshgagakeꞌ ḻegakeꞌ ganaꞌ byiṉj lilleꞌkaꞌ.
11 Yikaashga beenaꞌ biꞌe ḻeꞌ mechaꞌ
yogꞌ diikaꞌ naki c̱heꞌ.
Naꞌ nola beṉꞌ yiziꞌ yilap
yogꞌ diikaꞌ goz wlekeꞌ.
12 Kono yiyeshꞌlallꞌkzi ḻeꞌ,
naꞌ xiiṉeꞌkaꞌ,
biꞌkaꞌ yigaaṉ wizeb,
ḻekzkaꞌ kono yiyeshꞌlallii ḻegakbꞌ.
13 Yiyol yinitshga xiiṉ dia c̱heꞌnaꞌ
naꞌ koch no lljadini lieꞌkaꞌ.
14 Lljadinshgayi X̱ancho Chiozaꞌ dii malkaꞌ ben x̱eꞌkaꞌ,
naꞌ biga yisol yiṉiteꞌ dii malkaꞌ beṉꞌ xṉeekaꞌ.
15 Toshiizi lljadinshgayi X̱ancho Chiozaꞌ dii malkaꞌ bengakeꞌ
naꞌ gonshgueꞌ ka kochno lljadini ḻegakeꞌ lo yell-lioni.
16 Ḻaꞌ biga wyoo yic̱hjeꞌ yiyeshꞌlallileꞌ beṉꞌ,
san bsakꞌziꞌe beṉꞌ bi chak wen c̱heyin,
beṉꞌ yeshꞌdoꞌkaꞌ,
naꞌ beṉꞌkaꞌ kono zoa gaklen ḻegakeꞌ.
Bsakꞌziꞌe ḻegakeꞌ ax̱t ki wxenlallee beteꞌ ḻegakeꞌ.
17 Naꞌ daa ḻe bibaileꞌ wdishjeꞌ biaꞌ blagꞌ c̱he beṉꞌ,
kaꞌ yiyakshga c̱heꞌ.
Daa bi bibaile iṉabileꞌ Chiozaꞌ gak wen c̱he beṉꞌ,
kaꞌkz kono iṉab gak wen c̱heꞌ.
18 Biaꞌ blagkaꞌ wdishjeꞌ c̱he beṉꞌ,
ḻekzeꞌ yidobileꞌn
naꞌ yiyeej yiyebeꞌn,
naꞌ gakshgan ka set daa chyebeꞌ daa chaz ax̱t ḻoo llitaꞌ.
19 Naꞌ idobshgan ḻeꞌ ka beṉꞌ ndob to lechꞌ,
naꞌ gox̱ꞌ wc̱hejan ḻeꞌ toshiizi ka beṉꞌ nc̱heḻ to bachḻee.
20 Kaꞌ gonshgayi X̱ancho Chiozaꞌ beṉꞌkaꞌ chakziꞌ chakzbani nadꞌ,
naꞌ beṉꞌkaꞌ chbell chṉe c̱haꞌ.
21 Per liꞌ,
Chios c̱haꞌ,
bengach wen c̱haꞌ kwenc̱he shoo balaaṉ.
Bislagach nadꞌ daa nakoꞌ beṉꞌ wen naꞌ beṉꞌ chiyeshꞌlallii.
22 Ḻaꞌ dii ḻicha nakꞌ beṉꞌ yeshꞌ,
naꞌ bi chak wen c̱haꞌ,
naꞌ yic̱hjlallꞌdawaani bi zoan wen.
23 Chak c̱haꞌ ka chak c̱he xolaꞌ chinitlon katꞌ chxoa wbillaꞌ,
naꞌ ka chak c̱he bishꞌzonaꞌ,
banaꞌ choaꞌ beꞌnaꞌ.
24 Daa bi cheej chawꞌ ax̱t ba chxiz ṉiꞌaki,
naꞌ ba chillit chilozꞌ.
25 Chtitj chtani beṉꞌ nadꞌ.
Naꞌ ka chleꞌgakileꞌ nadꞌ,
chta yic̱hjeꞌkaꞌ chxillgakileꞌ nadꞌ.
26 Goklen nadꞌ,
Chios c̱haꞌ,
ḻaꞌ linꞌ nakoꞌ X̱anꞌ.
Bisla nadꞌ daa nakoꞌ beṉꞌ chiyeshꞌlallii.
27 Naꞌ iṉezgakileꞌ nan linꞌ,
Chios c̱haꞌ,
ba goklenoꞌ nadꞌ kon yeḻꞌ wak c̱hoꞌnaꞌ.
28 Bibi gakidꞌ c̱hishjgakeꞌ biaꞌ blagꞌ c̱haꞌ,
kon shi liꞌ gonḻeeyoꞌ nadꞌ.
Beṉꞌkaꞌ chsakꞌziꞌ nadꞌ siꞌshgagakeꞌ yeḻꞌ ztoꞌ,
san nadꞌ,
yiba yizakidꞌ.
29 Naꞌ beṉꞌkaꞌ chakziꞌ chakzbani nadꞌ siꞌshgagakeꞌ yeḻꞌ ztoꞌ,
naꞌ toshiizi yiyii yidoshgagakileꞌ.
30 Kon choꞌa ḻollaani wiꞌa X̱ancho Chiozaꞌ yeḻꞌ chox̱ken toshiizi.
Weꞌlawaaneꞌ ladj lkweꞌ beṉꞌ zan,
31 daa chakleneꞌ beṉꞌ yeshꞌkaꞌ
naꞌ chisleꞌ ḻegakeꞌ lo ṉiꞌa naꞌ beṉꞌkaꞌ chc̱hoglo c̱hegakeꞌ guetgakeꞌ.