Salmo 108
1 Chios c̱haꞌ,
toshiizi zoac̱hec̱hꞌ nx̱enilallaa liꞌ,
naꞌ do yic̱hj do lallaa goḻꞌ dii koon liꞌ balaaṉ.
2 Chiyaḻꞌ se kwaslenꞌ árpanaꞌ len saltérionaꞌ
naꞌ ka ba chzoa xenaꞌ,
soloaꞌ goḻ iṉelengakaꞌn liꞌ.
3 Naꞌ ladj beṉꞌkaꞌ lleꞌ yogꞌte yellkaꞌ
weꞌlawaa liꞌ naꞌ goḻ iṉiaꞌ liꞌ,
Chios c̱haꞌ.
4 Ḻaꞌ yeḻꞌ chaki c̱hoꞌnaꞌ naꞌ daa toshiizi chonoꞌ yogꞌ diikaꞌ chc̱heboꞌ,
Chios c̱haꞌ,
nakgakan dii xen inlleb ka yabanaꞌ daa bi nakbiaꞌ gate chiyoll chidon.
5 ¡Shajlaꞌoshgoꞌ yabanaꞌ ganaꞌ zoꞌ,
Chios c̱haꞌ!
Naꞌ ¡Doxen zbii zkaaṉ yell-lioni shoꞌshgoꞌ balaaṉ!
6 Bisla netoꞌ kon yeḻꞌ wak c̱hoꞌnaꞌ
kwenc̱he yiyell yilaꞌ beṉꞌkaꞌ ḻe chakiloꞌ.
¡Goklen netoꞌ!
7 Chiozaꞌ wṉieꞌ ganaꞌ nak lill xḻatjeꞌ,
wneꞌ:
“Ax̱t yiba yizakidꞌ gonꞌ lallꞌ naꞌle yell-lio c̱he beṉꞌ Siquemkaꞌ,
naꞌ ḻekzkaꞌ gonꞌ lallꞌ naꞌle leshꞌ daa le Sucot.
8 Ganaꞌ mbani Galaadaꞌ nakan c̱haꞌ,
naꞌ ḻekzkaꞌ yell-lio c̱he dii Manasézaꞌ.
Yell-lio c̱he dii Efraínnaꞌ nakan ka to dii chkweejan yic̱hjaa,
naꞌ yell-lio c̱he dii Judánaꞌ nakan ka yag bar c̱haꞌnaꞌ daa chṉabiaꞌlenꞌ.
9 Yell-lio c̱he beṉꞌ Moabkaꞌ nakan ka shaꞌ ganaꞌ yoll nisaꞌ chnaa,
naꞌ lo yell-lio c̱he beṉꞌ Edomkaꞌ wzaḻaa xelꞌkaꞌ,
naꞌ yiba yizakidꞌ daa benꞌ gan lao beṉꞌ filisteokaꞌ.”
10 ¿Non wc̱heꞌ nadꞌ naꞌ gakleneꞌ nadꞌ tiḻ-lenꞌ beṉꞌkaꞌ lleꞌ yellaꞌ nec̱hj zee walaꞌ?
¿Non wc̱heꞌ nadꞌ shaꞌ Edomaꞌ?
11 Linꞌ wc̱hiꞌo netoꞌ,
sheḻꞌkaꞌ Chios c̱haꞌ,
per ba wchooṉlalloo netoꞌ,
naꞌ bich chaklenoꞌ beṉꞌ wen wdiḻ c̱hentoꞌkaꞌ.
12 Bislagach netoꞌ lao beṉꞌkaꞌ chdiḻ-len netoꞌ,
ḻaꞌ aga bi de gon yeḻꞌ goklen c̱he beṉꞌ yell-lioni.
13 Daa gaklen Chiozaꞌ chonꞌ goncho gan lao beṉꞌkaꞌ chdiḻ-len choꞌ,
naꞌ ḻeꞌ wsol wṉiteꞌ ḻegakeꞌ.