Salmo 107
Libr de gayii
(Salmos 107—150)
1 Ḻi weꞌlaꞌo X̱ancho Chiozaꞌ daa nakeꞌ beṉꞌ wen,
naꞌ yeḻꞌ chaki c̱heꞌnaꞌ biga yiyoll yidon.
2 Kanꞌ ḻi iṉa yogꞌḻoḻ-le leꞌ ba bisla X̱ancho Chiozaꞌ,
leꞌ ba bisleꞌ lo naꞌ beṉꞌkaꞌ chakzbani leꞌ,
3 leꞌ ba jsoale yellkaꞌ lleꞌ tap ḻaate yell-lioni
naꞌ ba bitop bishagueꞌ leꞌ tozga.
4 Dii x̱ozxtoꞌchokaꞌ wdagakeꞌ ganaꞌ bibi chashj chḻeb,
naꞌ bi billelgakileꞌ galə yiziꞌ yikaagakeꞌ lljayen lill xḻatjeꞌkaꞌ.
5 Naꞌ wbiḻ wdongakeꞌ,
ziꞌ latꞌzə ki witgakeꞌ.
6 Naꞌ lo yeḻꞌ zakꞌziꞌnaꞌ bllaglogakeꞌ
wṉabgakeꞌ gaklen X̱ancho Chiozaꞌ ḻegakeꞌ,
naꞌ bisleꞌ ḻegakeꞌ.
7 Naꞌ bigwee ḻegakeꞌ lo nez wennaꞌ,
kwenc̱he biyoogakeꞌ yellaꞌ ganaꞌ jazoagakeꞌ.
8 Ḻi weꞌlaꞌo X̱ancho Chiozaꞌ daa chakileꞌ choꞌ beṉec̱h,
naꞌ daa choneꞌ yeḻꞌ wakkaꞌ kwenc̱he chakleneꞌ choꞌ beṉꞌ yell-lio.
9 Ḻaꞌ ḻenꞌ choꞌe daa cheej beenaꞌ chbiḻ chdeyi,
naꞌ choneꞌ ka yelj shaꞌyi beenaꞌ chdon.
10 Baḻgakeꞌ bc̱hejgakeꞌ gdenkaꞌ naꞌ bsejgakeꞌ ḻegakeꞌ.
Naꞌ daa ḻe gokyeshꞌgakileꞌ gok c̱hegakeꞌ ka beṉꞌ nej ga nak shgasj shc̱hoḻ,
11 daa bi bzoagakeꞌ xtillꞌ Chiozaꞌ,
beenaꞌ nak ḻiizelozi beṉꞌ choo beṉꞌ xen,
naꞌ daa bi bzenaggakeꞌ daa goklallee gongakeꞌ.
12 Naꞌ Chiozaꞌ beneꞌ ka bllaglogakeꞌ bengakeꞌ llin daa nak dii lallj nlleb,
dii bich nan so sakgakileꞌ;
naꞌ wzoagakeꞌ nyeshꞌ,
naꞌ aga no wzoa gaklen ḻegakeꞌ.
13 Naꞌ lo yeḻꞌ zakꞌziꞌnaꞌ bllaglaogakeꞌ
wṉabgakeꞌ gaklen X̱ancho Chiozaꞌ ḻegakeꞌ,
naꞌ bisleꞌ ḻegakeꞌ.
14 Naꞌ bibejeꞌ ḻegakeꞌ ganaꞌ nak shgasj shc̱hoḻ,
naꞌ bisell biḻee ḻegakeꞌ gdenkaꞌ nchejgakeꞌ.
15 Ḻi weꞌlaꞌo X̱ancho Chiozaꞌ daa ḻe chakileꞌ choꞌ beṉec̱h,
naꞌ daa choneꞌ yeḻꞌ wakkaꞌ kwenc̱he chakleneꞌ choꞌ beṉꞌ yell-lio.
16 Ḻeꞌ bxoxj btineꞌ puert de yakaꞌ,
naꞌ bxoxj btineꞌ yakaꞌ ndegakeꞌ ḻeꞌinkaꞌ.
17 Gokgakeꞌ beṉꞌ bi nteyi naꞌ wxakꞌziꞌgakeꞌ
ni c̱he yeḻꞌ widenag c̱heꞌkaꞌ naꞌ dii malkaꞌ bengakeꞌ.
18 Bich bi wxinꞌ yeej gaogakeꞌ,
naꞌ ba nongakeꞌ lez guetgakeꞌ.
19 Naꞌ lo yeḻꞌ zakꞌziꞌnaꞌ bllaglaogakeꞌ
wṉabgakeꞌ gaklen X̱ancho Chiozaꞌ ḻegakeꞌ,
naꞌ bisleꞌ ḻegakeꞌ.
20 Naꞌ beneꞌ mandad yiyakgakileꞌ;
naꞌ bisleꞌ ḻegakeꞌ lao yeḻꞌ witaꞌ.
21 Ḻi weꞌlaꞌo X̱ancho Chiozaꞌ daa ḻe chakileꞌ choꞌ beṉec̱h,
naꞌ daa choneꞌ yeḻꞌ wakkaꞌ kwenc̱he chakleneꞌ choꞌ beṉꞌ yell-lio.
22 Ḻi wit bayix̱ꞌkaꞌ laweꞌnaꞌ kwenc̱he weꞌleneꞌ yeḻꞌ chox̱ken.
Ḻi yiba yizaki,
ḻi weꞌ dillꞌ c̱heyi diikaꞌ choneꞌ.
23 Beṉꞌkaꞌ chdalen barkw c̱heꞌkaꞌ lo nisdoꞌnaꞌ
chdagakeꞌ doxen lawinnaꞌ chitꞌ chdegakeꞌ bi de c̱hegakeꞌ;
24 naꞌ lo nisdoꞌnaꞌ ben bleꞌgakileꞌ
daa ben Chiozaꞌ daa chon ka chibanicho.
25 Ḻaꞌ to ka wṉez Chiozaꞌ wze to yejpeꞌ xen wal,
naꞌ wzolo chas chatꞌ nisdoꞌnaꞌ.
26 Naꞌ bsollaꞌn barkwkaꞌ chaꞌ chaꞌ,
naꞌ jacheꞌtegakan lawinnaꞌ sto shii.
Naꞌ bich bengakeꞌ lez yilagakeꞌ.
27 Naꞌ gokyaḻgakeꞌ ka weezo,
naꞌ ḻaꞌkzi nzedgakileꞌ chsaꞌgakeꞌ barkwaꞌ,
ni latꞌ bi goklenan ḻegakeꞌ.
28 Naꞌ lo yeḻꞌ zakꞌziꞌnaꞌ bllaglaogakeꞌ
wṉabgakeꞌ gaklen X̱ancho Chiozaꞌ ḻegakeꞌ,
naꞌ bisleꞌ ḻegakeꞌ.
29 Naꞌ biyoneꞌ yejpeꞌ xennaꞌ beꞌḻesdoꞌ,
naꞌ biyatꞌlli nisdoꞌnaꞌ.
30 Ka biyatꞌlli nisdoꞌnaꞌ ḻe bibagakileꞌ,
naꞌ beꞌ Chiozaꞌ latj bllingakeꞌ ganaꞌ chaklallꞌgakeꞌ illin barkw c̱heꞌkaꞌ.
31 Ḻi weꞌlaꞌo X̱ancho Chiozaꞌ daa ḻe chakileꞌ choꞌ beṉec̱h,
naꞌ daa choneꞌ yeḻꞌ wakkaꞌ kwenc̱he chakleneꞌ choꞌ beṉꞌ yell-lio.
32 Ḻi koo X̱ancho Chiozaꞌ balaaṉ katꞌ chdiꞌa chllagle choeꞌlaꞌoleneꞌ.
Naꞌ leꞌ beṉꞌ gol,
leꞌ nakle beṉꞌ chṉabiaꞌ,
ḻi weꞌlawee katꞌ chdiꞌa chllagle.
33 Chiozaꞌ chzeejeꞌ yaokaꞌ len bejkaꞌ ganaꞌ chal niskaꞌ,
naꞌ chiyakgakan yo bill.
34 Naꞌ chiyoneꞌ yell-lio wenkaꞌ yell-lio dii bibi chashj chḻeb,
ni c̱he dii malkaꞌ chon beṉꞌkaꞌ lleꞌ lawinnaꞌ.
35 Naꞌ ganaꞌ bibi chashj chḻeb chiyoneꞌn ga chbia yel,
naꞌ yo billkaꞌ chiyoneꞌn yell-lio ga chal nis.
36 Naꞌ chzoeꞌ lawinnaꞌ beṉꞌkaꞌ bibi de yeej gaogakeꞌ,
naꞌ naꞌ chx̱e chsil lalleꞌkaꞌ ganaꞌ soagakeꞌ.
37 Chaz chbekgakeꞌ lo yell-lio c̱heꞌkaꞌ,
naꞌ chaz chbekgakeꞌ uvakaꞌ,
naꞌ chiziꞌ chilapgakeꞌ dii xen.
38 Chonḻeeyeꞌ ḻegakeꞌ,
naꞌ choneꞌ ka chesh changakeꞌ,
naꞌ ḻekzkaꞌ choneꞌ ka chesh chan bayix̱ꞌ c̱heꞌkaꞌ.
39 Naꞌtech zej chiyeshꞌgakeꞌ naꞌ ḻe nyeshꞌ gok c̱hegakeꞌ
ni c̱he beṉꞌkaꞌ chsakꞌziꞌ ḻegakeꞌ naꞌ dii lalljkaꞌ chen chleꞌgakileꞌ.
40 Chiozaꞌ chwiileꞌ beṉꞌkaꞌ chsakꞌziꞌ beṉꞌ,
naꞌ chteꞌ ḻegakeꞌ ganaꞌ bibi chashj chḻeb
ganaꞌ ni nez bi xoa galə siꞌ ikaagakeꞌ.
41 Naꞌ chibejeꞌ beṉꞌ yeshꞌkaꞌ lo yeḻꞌ ziꞌ yeḻꞌ yeshaa,
naꞌ chzesh chzaneꞌ xiiṉ c̱heꞌkaꞌ ka chesh chan xilꞌdoꞌ.
42 Naꞌ beṉꞌ wenkaꞌ chiba chizakꞌgakileꞌ ka chleꞌgakileꞌ ka choneꞌ,
naꞌ beṉꞌ malkaꞌ bibi de iṉagakeꞌ.
43 Beenaꞌ nak beṉꞌ sinꞌ chiyaḻꞌ koo yic̱hjeꞌ diiki,
naꞌ shajniileꞌ ka nak yeḻꞌ chaki c̱he X̱ancho Chiozaꞌ.