Salmo 106
1 ¡Ḻi weꞌlaꞌo X̱ancho Chiozaꞌ!
Ḻi weꞌ X̱ancho Chiozaꞌ yeḻꞌ chox̱ken,
daa nakeꞌ beṉꞌ wen,
naꞌ yeḻꞌ chaki c̱heꞌnaꞌ biga yiyoll yidon.
2 Kono saki weꞌ dillꞌ ka nak yeḻꞌ wak choo yeḻꞌ wak xenkaꞌ chon X̱ancho Chiozaꞌ.
Kono saki weꞌlaweeneꞌ ka chidoḻee shajlawee.
3 Chakomba beṉꞌkaꞌ chon daa nak shḻi,
beṉꞌkaꞌ toshiizi chongakeꞌ wen.
4 Jadingachi nadꞌ,
Chios c̱haꞌ,
goklen nadꞌ katꞌkaꞌ gaklenoꞌ beṉꞌ wlall c̱haꞌki nak lallꞌ noꞌ;
naꞌ bislagach nadꞌ katꞌkaꞌ yisloꞌ ḻegakeꞌ,
5 kwenc̱he lenꞌ siaꞌ banez yeḻꞌ shaoꞌkaꞌ gonoꞌ c̱he beṉꞌkaꞌ mbejoꞌ nakgakeꞌ lallꞌ noꞌ,
naꞌ yiba yizaklenidꞌ beṉꞌkaꞌ nak beṉꞌ yell c̱hoꞌ.
6 Ba bx̱iṉj bḻenntoꞌ,
ka ben dii x̱ozxtoꞌntoꞌkaꞌ.
Ba benntoꞌ daa bi chiyaḻꞌ gonntoꞌ,
naꞌ ba benntoꞌ mal.
7 Kanaꞌ wzoa dii x̱ozxtoꞌntoꞌkaꞌ Egíptonaꞌ,
aga bzoa yic̱hjgakeꞌ yeḻꞌ wak choo yeḻꞌ wak xenkaꞌ benoꞌ;
san goḻ-lallꞌgakeꞌ daa biyeshꞌlalliloꞌ ḻegakeꞌ,
naꞌ ka bllingakeꞌ choꞌa nisdoꞌnaꞌ le Nisdoꞌ Xṉa,
biyec̱hj bibiigakeꞌ liꞌ.
8 Naꞌ Chiozaꞌ bisleꞌ ḻegakeꞌ daa bc̱hebeꞌ gakleneꞌ ḻegakeꞌ,
kwenc̱he bliileꞌ ḻegakeꞌ yeḻꞌ wak c̱heꞌnaꞌ.
9 Naꞌ golleꞌ nisdoꞌnaꞌ le Nisdoꞌ Xṉa gakan c̱hoplə,
naꞌ gchoḻinnaꞌ biyakan yo bill.
Naꞌ bidieꞌ ḻegakeꞌ gchoḻinnaꞌ daa biyak ka to ga bibi chashj chḻeb.
10 Naꞌ bisleꞌ ḻegakeꞌ lo ṉiꞌa naꞌ beṉꞌkaꞌ chllaa ḻegakeꞌ,
beṉꞌkaꞌ chakziꞌ chakzbani ḻegakeꞌ.
11 Naꞌ bkwakw nisdoꞌnaꞌ beṉꞌkaꞌ nḻag ḻegakeꞌ,
naꞌ ni togakeꞌ bi bila.
12 Kanaꞌch wyajḻeꞌgakeꞌ daa bc̱heb Chiozaꞌ goneꞌ c̱hegakeꞌ,
naꞌ beḻ wṉegakeꞌneꞌ.
13 Naꞌ tolbeꞌ goḻ-lallꞌgakeꞌ diikaꞌ ben Chiozaꞌ,
naꞌ bi wlezgakeꞌ ileꞌgakileꞌ daa ngoo Chiozaꞌ xṉezin goneꞌ c̱hegakeꞌ.
14 Latjaꞌ ganaꞌ bibi chashj chḻeb bzoagakeꞌ Chiozaꞌ goneꞌ daa nazan c̱hegakeꞌ.
15 Naꞌ bzoeꞌ xtilleekaꞌ,
biꞌe daa wṉabgakeꞌ,
per bseḻee to yillweꞌ dii betan zangakeꞌ.
16 Naꞌ latjaꞌ ganaꞌ wchengakeꞌ gokxeꞌgakileꞌ llinnaꞌ gok lo naꞌ dii Moisézaꞌ
len dii Aarónnaꞌ,
beenaꞌ bzoa X̱ancho Chiozaꞌ gokeꞌ bx̱oz c̱heꞌ.
17 Naꞌ daan bxaꞌ yell-lionaꞌ wdeban dii Datánnaꞌ,
naꞌ dii Abiramaꞌ len dii beṉꞌkaꞌ bengakeꞌneꞌ txen.
18 Naꞌ bzey yiꞌnaꞌ yogꞌḻoḻ beṉꞌkaꞌ zi shkwen nakgakeꞌ txen.
Naꞌ wyey beṉꞌ malkaꞌ.
19 Naꞌ ganaꞌ zoa yaanaꞌ le Horeb bengakeꞌ to lwaa lsakꞌ meꞌdoꞌ,
naꞌ bengakeꞌb de or naꞌ beꞌlaꞌogakeꞌb.
20 Naꞌ bzoagakeꞌ Chiozaꞌ,
beenaꞌ nak beṉꞌ choo beṉꞌ xen,
kaꞌlə
naꞌ beꞌlaꞌogakeꞌ to lwaa lsakꞌ gooṉ,
ba chao yix.
21 Naꞌ wlej yic̱hjgakeꞌ Chiozaꞌ,
beenaꞌ bisla ḻegakeꞌ,
beenaꞌ ben yeḻꞌ wak choo yeḻꞌ wak xenkaꞌ Egíptonaꞌ,
22 ganaꞌ ḻekzkaꞌ le yell-lio c̱he dii Camaꞌ,
naꞌ ḻoo nisdoꞌnaꞌ le Nisdoꞌ Xṉa.
23 Chiozaꞌ goklallee wlliayee ḻegakeꞌ,
per dii Moisézaꞌ,
beenaꞌ wlejeꞌ goneꞌ xshineꞌnaꞌ,
beꞌleneꞌ ḻeꞌ dillꞌ kwenc̱he bi blliayee ḻegakeꞌ lo yeḻꞌ chllaa c̱heꞌnaꞌ.
24 Naꞌ bi goklallꞌgakeꞌ shoꞌgakeꞌ yell-lio daa nak mbalaz,
daa bi wyajḻeꞌgakeꞌ gaklen Chiozaꞌ ḻegakeꞌ kon ka ba bc̱hebeꞌ goneꞌ c̱hegakeꞌ.
25 Naꞌ ganaꞌ wchengakeꞌ wchell wṉegakeꞌ c̱he X̱ancho Chiozaꞌ,
naꞌ bi bzoagakeꞌ xtilleenaꞌ.
26 Naꞌ bc̱hoglo Chiozaꞌ c̱hegakeꞌ guetgakeꞌ latjaꞌ ganaꞌ bibi chashj chḻeb,
27 naꞌ xiiṉ dia c̱heꞌkaꞌ gakgakeꞌ lo naꞌ beṉꞌkaꞌ bi nx̱enilallꞌgakeꞌneꞌ,
naꞌ wshesh wc̱heeṉeꞌ ḻegakeꞌ ga gazə lljen lill xḻatjgakeꞌ laꞌo lall beṉꞌ.
28 Naꞌ gokgakeꞌ txen beṉꞌkaꞌ choeꞌlaꞌo daa le Baal-peor,
naꞌ weej wdaogakeꞌ bakaꞌ betgakeꞌ ka choeꞌlaꞌogakeꞌ diikaꞌ noni chios c̱hegakeꞌ,
diikaꞌ bi de yeḻꞌ mban c̱heyin.
29 Naꞌ daa bengakeꞌ kaꞌ,
bshaagakeꞌ X̱ancho Chiozaꞌ,
naꞌ bseḻee yeḻꞌ witaꞌ ladjeꞌkaꞌ.
30 Naꞌ beenaꞌ wle Finees,
beteꞌ beenaꞌ bx̱iṉj bḻen,
naꞌ kaꞌ,
wlez yeḻꞌ zakꞌziꞌ daa bseḻꞌ Chiozaꞌ.
31 Naꞌ daa beneꞌ kaꞌ,
Chiozaꞌ bleꞌileꞌneꞌ beṉꞌ wen,
naꞌ lao yogꞌḻoḻ xiiṉ dia c̱he beṉꞌ Israelkaꞌ toshiizi wzeyi c̱heꞌ gokeꞌ beṉꞌ wen.
32 Naꞌ ḻekzkaꞌ ganaꞌ le Meriba,
ganaꞌ gol nisaꞌ ḻee yajaꞌ,
bshaagakeꞌ Chiozaꞌ.
Naꞌ ni c̱hegakeꞌ bi gok wen c̱he dii Moisézaꞌ,
33 naꞌ wṉieꞌ daa bi chiyaḻꞌ iṉieꞌ
daa bshaagakeꞌneꞌ.
34 Naꞌ ḻekzkaꞌ bi blliayiꞌgakeꞌ beṉꞌkaꞌ ben Chiozaꞌ mandad wlliayiꞌgakeꞌ;
35 san bengakeꞌ txen beṉꞌkaꞌ bi nx̱enilallꞌgakeꞌneꞌ,
naꞌ wyoologakeꞌ bengakeꞌ diikaꞌ chon beṉꞌkaꞌ.
36 Naꞌ daa beꞌlaꞌogakeꞌ lwaa lsakꞌ chios c̱heꞌkaꞌ,
wzolo bengakeꞌ txen yogꞌ dii malkaꞌ.
37 Naꞌ bzani xiiṉeꞌkaꞌ,
ka biꞌ byo naꞌ ka biꞌ noolə,
betgakeꞌ ḻegakbꞌ kwenc̱he beꞌlaꞌogakeꞌ dii x̱iwꞌkaꞌ.
38 Blaljgakeꞌ xc̱hen xiiṉeꞌkaꞌ,
ka biꞌ byo naꞌ ka biꞌ noolə,
ḻaꞌkzi bibi ben bdoꞌyeshꞌdoꞌkaꞌ.
Bzangakileꞌ ḻegakbꞌ witgakbꞌ lao lwaa lsakꞌ chios c̱he beṉꞌ Canaánkaꞌ;
naꞌ bx̱iṉjgakeꞌ yell-lionaꞌ daa weejan xc̱hemꞌkaꞌ.
39 Naꞌ wdaꞌ wchengakeꞌ dii malkaꞌ bengakeꞌ,
naꞌ gokgakeꞌ ka nool nḻan yeḻꞌ wda daa bengakeꞌ kaꞌ.
40 Daan,
bllaa X̱ancho Chiozaꞌ beṉꞌkaꞌ nak yell c̱heꞌ,
naꞌ gokzbanileꞌ ḻegakeꞌ.
41 Naꞌ beneꞌ ḻegakeꞌ lallꞌ naꞌ beṉꞌ zitꞌkaꞌ,
beṉꞌkaꞌ chakzbangakileꞌ ḻegakeꞌ,
naꞌ wṉabiaꞌgakeꞌ ḻegakeꞌ,
42 naꞌ bsakꞌziꞌgakeꞌ ḻegakeꞌ,
naꞌ wzoagakeꞌ xṉiꞌekaꞌ.
43 Chiozaꞌ bisleꞌ ḻegakeꞌ dii zan shii,
per ḻegakeꞌ bi bzenaggakeꞌ c̱heꞌ,
san zizikli bx̱iṉj bḻengakeꞌ.
44 Ḻaꞌkzi chiya dii bengakeꞌ,
Chiozaꞌ biyeshꞌlallileꞌ ḻegakeꞌ ka to wxakꞌziꞌgakeꞌ,
naꞌ bzenagueꞌ c̱hegakeꞌ ka wṉabgakileꞌneꞌ gakleneꞌ ḻegakeꞌ.
45 Naꞌ jadinileꞌ daa bc̱hebeꞌ goneꞌ c̱hegakeꞌ,
naꞌ gokleneꞌ ḻegakeꞌ daa napeꞌ to yeḻꞌ chiyeshꞌlallꞌ xen wal.
46 Naꞌ beneꞌ kwenc̱he beṉꞌkaꞌ chṉabiaꞌ ḻegakeꞌ biyeshꞌlallꞌgakileꞌ ḻegakeꞌ.
47 Bislagach netoꞌ,
X̱anntoꞌ Chios.
Bibejgach netoꞌ yellki gani lleꞌntoꞌ,
kwenc̱he weꞌlaꞌontoꞌ liꞌ,
naꞌ yiba yizakintoꞌ koontoꞌ liꞌ balaaṉ.
48 Toshiizi shajlaꞌoshga X̱ancho Chiozaꞌ,
beenaꞌ nak Chios c̱hecho choꞌ beṉꞌ Israel.
Yogꞌḻoḻcho chiyaḻꞌ iṉacho:
“Kanꞌ gakan.”
¡Ḻi weꞌlaꞌo Chiozaꞌ!