Salmo 104
1 ¡Do yic̱hj do lallaa weꞌlawaa X̱ancho Chiozaꞌ!
¡Chios c̱haꞌ,
linꞌ nakoꞌ ḻiizelozi beṉꞌ choo beṉꞌ xen!
Chliꞌo yeḻꞌ zakii c̱hoꞌnaꞌ naꞌ balaaṉ xen c̱hoꞌnaꞌ;
2 naꞌ yeḻꞌ chey cheeniꞌ c̱hoꞌnaꞌ nec̱hjan liꞌ.
Linꞌ bshiljoꞌ yabanaꞌ ka beṉꞌ chshilj to lechꞌ.
3 Liꞌ benoꞌ ganaꞌ zoꞌ kollꞌ yabanaꞌ,
naꞌ bejkaꞌ ze xan yabanaꞌ chc̱hingakoꞌn ka karret katꞌ chgoo nez;
naꞌ chlag beꞌnaꞌ ḻen naꞌ chdoꞌ lo llazə.
4 Beꞌnaꞌ chjwaꞌn choꞌa xtilloonaꞌ,
naꞌ yiꞌ wziwaa chonan daa chiꞌon.
5 Bx̱e bsiloꞌ yell-lioni lo leninnaꞌ
kwenc̱he bi illaa xishnaꞌinnaꞌ.
6 Naꞌ bwakwoꞌ nisdoꞌnaꞌ yell-lioni ka xalaanin,
naꞌ bkwashaꞌn yaakaꞌ.
7 Naꞌ ka golloꞌ nisdoꞌnaꞌ yiyon c̱helin,
lii biyonte c̱helin.
Kon ka benin shiꞌonaꞌ,
daa nen ka ga chashj chtin,
8 naꞌ biyetjan lo yaakaꞌ naꞌ billinan leshꞌkaꞌ ganaꞌ bllioꞌ biaꞌ illiljan.
9 Naꞌ bllioꞌ biaꞌ ganaꞌ bich gak ten,
kwenc̱he bich illiljan wkwashaan yell-lioni.
10 Liꞌ chonoꞌ kwenc̱he nisaꞌ chal lo yell-lioni chiyakan yao naꞌ chden ladj yaakaꞌ.
11 Naꞌ ḻennanꞌ cheej bayix̱ꞌdoꞌkaꞌ lleꞌ yaa yaokaꞌ;
naꞌ ḻekzkaꞌ ḻennanꞌ cheej burrkaꞌ lleꞌ yaa yaokaꞌ katꞌ chbiḻgakib.
12 Naꞌ choꞌa yaokaꞌ chllia lill byiṉdoꞌkaꞌ chda xan yabanaꞌ;
naꞌ choḻ chx̱aoꞌgakb lliagakb lo xozꞌ yagkaꞌ.
13 Linꞌ chyililoꞌ yaa yaokaꞌ nis yejaꞌ daa chseḻoo yabanaꞌ ganaꞌ zoatioꞌ.
Naꞌ nisaꞌ chxop xan yabanaꞌ chzaallin yell-lioni.
14 Naꞌ chonoꞌ ka chiyashj chiḻeb yix̱ꞌdoꞌkaꞌ gao bayix̱ꞌkaꞌ,
naꞌ chgolə daa chaz chaaṉ beṉꞌ yell-lionaꞌ,
kwenc̱he yiziꞌ yilapeꞌ daa yeej gaweꞌ,
15 kwenc̱he gatꞌ vinonaꞌ daa gonan ka yibaileꞌ,
naꞌ set daa c̱hebeꞌ choꞌalaweꞌnaꞌ,
naꞌ dii gaweꞌ daa weꞌn fuerz c̱heꞌnaꞌ.
16 Chiyaalli xan yagkaꞌ,
yag cedrokaꞌ lleꞌ ganaꞌ mbani Líbanonaꞌ,
diikaꞌ goz X̱ancho Chiozaꞌ.
17 Naꞌ lawinkaꞌ llia lill byiṉdoꞌkaꞌ,
naꞌ lo yag yechkaꞌ non lill garzkaꞌ.
18 Lo yaa yeḻkaꞌ lleꞌ shib yix̱ꞌkaꞌ,
naꞌ ḻee yajkaꞌ non lill bxillꞌkaꞌ.
19 Naꞌ benoꞌ beoꞌdoꞌnaꞌ kwenc̱he gatꞌbiaꞌ yillaꞌ lla yelkaꞌ;
naꞌ wbilldoꞌnaꞌ ba ṉezin bat chiyaḻꞌ x̱oan.
20 Naꞌ chonoꞌ ka chaḻ,
naꞌ chak shgasj shc̱hoḻ,
naꞌch chchej bayix̱ꞌkaꞌ lleꞌ ḻoo yix̱ꞌ dinkaꞌ.
21 Naꞌ bellkaꞌ chosyaagakb chyiljgakb banaꞌ gaogakb;
naꞌ chṉabgakib Chiozaꞌ wiꞌe daa gaogakb.
22 Naꞌ ka chlaꞌ wbilldoꞌnaꞌ chiyajgakb ganaꞌ zoa blej c̱hebkaꞌ chjatesgakb.
23 Naꞌch chchej beṉꞌ yell-lionaꞌ chjeneꞌ llin c̱heꞌnaꞌ,
ax̱t nika chlleꞌyi.
24 ¡Dii be dii zil nak diikaꞌ benoꞌ,
Chios c̱haꞌ!
Yogꞌḻoḻten benoꞌ kon yeḻꞌ sinꞌ c̱hoꞌnaꞌ,
naꞌ yell-lioni nakan tollaꞌ diikaꞌ benoꞌ.
25 Naꞌ de nisdoꞌnaꞌ,
nakan dii choo dii xen,
ganaꞌ lleꞌ ba be ba zil,
ka badoꞌ ka ba yeḻə.
26 Naꞌ chda barkwkaꞌ lawinnaꞌ;
naꞌ naꞌ yoo Leviatánnaꞌ,
banaꞌ benoꞌ kwenc̱he chyitjb ḻoo nisdoꞌnaꞌ.
27 Naꞌ yogꞌḻoḻ ba lleꞌ lo yell-lioni naꞌ ḻoo nisdoꞌnaꞌ nongakb lez wiꞌo dii gaogakb katꞌ ba chdongakb.
28 Liꞌ ngoo daa cheej chaogakb,
naꞌ ḻegakb chyiljgakbaꞌn.
Chzaniloꞌ dii wenkaꞌ choeꞌgakoob,
naꞌ cheej chaogakb ka chelj chllaꞌgakib.
29 Shi bi yiyeshꞌlallꞌgakiloꞌb,
naꞌ gakshejlallꞌgakb.
Shi yikoo bishbe c̱hebkaꞌ,
naꞌ guetgakb
naꞌ yiyakgakb bishte yell-lio.
30 San shi weꞌgakoꞌb bishbe c̱hoꞌnaꞌ daa nsaꞌ yeḻꞌ mban,
naꞌ ibangakb,
naꞌ shesh shangakb yell-lioni.
31 ¡Shoꞌshga X̱ancho Chiozaꞌ balaaṉ toshiizi!
Naꞌ yiba yizakshgaileꞌ ni c̱heyi diikaꞌ bx̱e bsileꞌ.
32 Katꞌ chwieꞌ yell-lioni,
chxoꞌ chṉiban;
naꞌ yaakaꞌ chchejgakan llen katꞌ chdiꞌe ḻegakan.
33 Shlak mbanꞌ yell-lioni,
goḻ iṉiaꞌ X̱ancho Chiozaꞌ.
Shlak ni de bishbe c̱haꞌni,
goḻ iṉiaꞌ weꞌlawaaneꞌ.
34 Gakshga daa ziaꞌ wṉeyi dii c̱hazlallꞌ X̱ancho Chiozaꞌ,
ḻaꞌ tozenꞌ choneꞌ ka chiba chizakidꞌ.
35 ¡Yinitloshga beṉꞌ saaxyakaꞌ lo yell-lioni,
naꞌ bich soashga beṉꞌ malkaꞌ!
¡Do yic̱hj do lallaa weꞌlawaa X̱ancho Chiozaꞌ!
¡Ḻi weꞌlaꞌo X̱ancho Chiozaꞌ!