Salmo 103
1 Do yic̱hj do lallaa weꞌlawaa X̱ancho Chiozaꞌ,
do ka nakꞌ weꞌlawaa beenaꞌ nak dowalj beṉꞌ ḻi beṉꞌ shaoꞌ.
2 Do yic̱hj do lallaa weꞌlawaa X̱ancho Chiozaꞌ;
naꞌ bi gaḻ-lallaa ni to dii wenkaꞌ choneꞌ c̱haꞌ.
3 Ḻenꞌ chiziꞌxeneꞌ yogꞌḻoḻ dii malkaꞌ chonꞌ,
naꞌ ḻenꞌ chiyoneꞌ bittezə yillweꞌ dii cheꞌidꞌ.
4 Ḻenꞌ chisleꞌ nadꞌ lao yeḻꞌ witaꞌ,
naꞌ dii xen wal chakileꞌ nadꞌ naꞌ chiyeshꞌlallileꞌ nadꞌ.
5 Ḻenꞌ choṉeꞌ nadꞌ dii wen dii shaoꞌkaꞌ shnon mbanꞌ,
naꞌ chikobeꞌ yeḻꞌ mban c̱haꞌni
kwenc̱he ibanꞌ ssha,
ka chak c̱he to bsia chbam ssha.
6 X̱ancho Chiozaꞌ choneꞌ yeḻꞌ josc̱his c̱he beṉꞌdoꞌkaꞌ chc̱hiꞌ chsakꞌ beṉꞌ,
naꞌ choneꞌn ka chiyaḻꞌ gakan.
7 Bliileꞌ dii Moisézaꞌ diikaꞌ ba ngwee xṉezin gak,
naꞌ bliileꞌ beṉꞌ Israelkaꞌ yeḻꞌ wakkaꞌ beneꞌ.
8 X̱ancho Chiozaꞌ nakeꞌ beṉꞌ wen beṉꞌ shaoꞌ naꞌ beṉꞌ chiyeshꞌlallii.
Beṉꞌ yeḻꞌ chxenlallꞌ xen wal nakeꞌ,
naꞌ naplikzeꞌ yeḻꞌ chaki.
9 Aga toshiizi gaweꞌ xya c̱hecho,
ni aga toshiizi koolallee choꞌ.
10 Bi chonileꞌ choꞌ ka chiyaḻꞌ gak c̱hecho ni c̱he dii malkaꞌ choncho;
ni bi chsakꞌziꞌe choꞌ ka chiyaḻꞌ gak c̱hecho ni c̱he saaxya c̱hechokaꞌ.
11 Ka to nḻaa yell-lioni yabanaꞌ,
kaꞌtꞌkzan dii xen inlleb nak yeḻꞌ chaki c̱heꞌnaꞌ daa napeꞌ c̱he beṉꞌkaꞌ chall chlleb ḻeꞌ.
12 Naꞌ ka to nḻaa ganaꞌ chlaꞌ wbillaꞌ ganaꞌ chxoaten,
kaꞌtꞌkzan ba biḻee choꞌ zitꞌ wal dii malkaꞌ ba bencho.
13 Ka chon beenaꞌ chisgol chischoo,
chiyeshꞌlallileꞌ xiiṉeꞌkaꞌ,
kaꞌkzan chon Chiozaꞌ,
chiyeshꞌlallileꞌ beṉꞌkaꞌ chall chlleb ḻeꞌ,
14 daa ṉezileꞌ bishte yell-lionaꞌzan wyaa wbiṉicho.
15 Yeḻꞌ mban c̱he beṉꞌ yell-lioni nakan toldezə
ka to yix̱ꞌ kwandoꞌ wa ka to yejdoꞌ dii chyalj lyix̱aa.
16 Naꞌ chde beꞌnaꞌ chshiban daa,
naꞌ chbiayiꞌn,
ni bich nakbiaꞌ ganaꞌ wllian.
17 San zejḻi kaṉi chaki X̱ancho Chiozaꞌ beṉꞌkaꞌ chall chlleb ḻeꞌ.
Naꞌ yeḻꞌ beṉꞌ wen c̱heꞌnaꞌ biga yiyoll yidon lao dia c̱heꞌkaꞌ,
18 beṉꞌkaꞌ chon kon ka bc̱hebgakeꞌ laweꞌnaꞌ,
naꞌ zegakeꞌ wṉeyi gongakeꞌ yogꞌ diikaꞌ nc̱hogbiꞌe goncho.
19 X̱ancho Chiozaꞌ zoeꞌ yabanaꞌ ganaꞌ chṉabiꞌe,
naꞌ chṉabiꞌe lao yogꞌḻoḻ dii de.
20 ¡Ḻi weꞌlaꞌo X̱ancho Chiozaꞌ,
leꞌ nakle anjl c̱heꞌ,
naꞌ naple yeḻꞌ wak xen,
leꞌ chzoale xtilleenaꞌ naꞌ chonle ka neꞌ!
21 Ḻi weꞌlaꞌo X̱ancho Chiozaꞌ,
yogꞌḻoḻ-le anjl,
leꞌ nakle ka beṉꞌ wen wdiḻ c̱heꞌ,
naꞌ nakle wizoa dillꞌ c̱heꞌ naꞌ chonle ka cheenileꞌ.
22 Yogꞌḻoḻ daa bx̱e bsil X̱ancho Chiozaꞌ daa de doxen gani chṉabiꞌe
chiyaḻꞌ weꞌlaꞌogakan ḻeꞌ.
Do yic̱hj do lallaa weꞌlawaa X̱ancho Chiozaꞌ.