Salmo 102
1 Chios c̱haꞌ,
bzenaggach dga choeꞌḻwillꞌ liꞌ,
beꞌgach latj ilaꞌ dga niaꞌ liꞌ lawoꞌnaꞌ.
2 Bi wlloniloꞌ nadꞌ yeḻꞌ goklen c̱hoꞌnaꞌ
katꞌ zaꞌ diikaꞌ chsakꞌziꞌgakan nadꞌ.
Bzenaggach c̱haꞌ,
naꞌ btagach lalloo gaklenoꞌ nadꞌ katꞌ chṉiaꞌ liꞌ.
3 Ḻaꞌ ba chiyol chinit yeḻꞌ mban c̱haꞌni ka chinit llennaꞌ,
naꞌ yiꞌzidꞌ dii ḻanaꞌ.
4 Yic̱hjlallꞌdawaani chakyeshiin daa bi chak wen c̱haꞌ,
naꞌ chak c̱haꞌ ka to yix̱ꞌ kwan dii ba chbill;
ni bich nan yeej gawꞌ.
5 Naꞌ ax̱t ba billit bilozꞌ daa chbellyeshaa.
6 Chak c̱haꞌ ka chak c̱he bedkokaꞌ,
banaꞌ chda ganaꞌ bibi chashj chḻeb,
naꞌ ka damaꞌ,
banaꞌ chda ga kono beṉꞌ lleꞌ.
7 Bi chak guesꞌ.
Naꞌ chak c̱haꞌ ka to byiṉ ba chda tlishꞌ tyaj naꞌ chjshiab kollꞌ dexkaꞌ.
8 Beṉꞌkaꞌ chakziꞌ chakzbani nadꞌ bi chsangakeꞌ wtitjgakileꞌ nadꞌ,
naꞌ chzetjgakeꞌ nadꞌ katꞌ chyishjgakeꞌ biaꞌ blagꞌ c̱he beṉꞌ.
9 Lwaa dii nan yeej gawꞌ,
ḻoo de nilə chiꞌa.
Naꞌ daa chbellꞌ lla yel,
nis xc̱hell c̱haꞌni chllonan ḻoo nisaꞌ cheejꞌ.
10 Daa chlloo nadꞌ ba wdoyoꞌ nadꞌ bzaḻoo nadꞌ kaꞌlə.
11 Lla yelkaꞌ chdiaꞌ nakan ka to xol dii chinit;
naꞌ ba chde c̱haꞌ ka yix̱ꞌ kwan dii chbill.
12 San liꞌ,
Chios c̱haꞌ,
chṉabiꞌo toshiizi;
naꞌ toshiizi lljadin lljazaꞌlallꞌ beṉꞌ liꞌ.
13 Segachoꞌ wṉeyi yiyeshꞌlalliloꞌ beṉꞌkaꞌ lleꞌ yell Siónnaꞌ,
ḻaꞌ ba bllinkz lla yiyeshꞌlalliloꞌ ḻegakeꞌ;
ba bllin llanaꞌ yiziꞌxenoꞌ c̱hegakeꞌ.
14 Ḻaꞌ beṉꞌkaꞌ chzoa xtilloonaꞌ chakyeshꞌgakileꞌ
ka chwiagakeꞌ yajkaꞌ byiṉj c̱he yell c̱hoꞌnaꞌ.
15 Beṉꞌkaꞌ lleꞌ yogꞌḻoḻ yellkaꞌ gall illebgakeꞌ X̱ancho Chiozaꞌ,
naꞌ yogꞌḻoḻ beṉꞌ wṉabiaꞌ c̱heꞌkaꞌ gakbeꞌgakileꞌ nakeꞌ beṉꞌ beṉꞌ choo beṉꞌ xen.
16 Katꞌ yix̱e yisileꞌ yell Jerusalénnaꞌ sto shii,
naꞌ wliꞌe nakeꞌ ḻiizelozi beṉꞌ choo beṉꞌ xen.
17 Naꞌ wzenagueꞌ c̱he beṉꞌkaꞌ kono zoa gaklen ḻegakeꞌ katꞌkaꞌ weꞌḻwillgakeꞌ ḻeꞌ,
naꞌ bi wdegoneꞌ katꞌ iṉabgakileꞌneꞌ gakleneꞌ ḻegakeꞌ.
18 Naꞌ dga chiyaḻꞌ gakan yish kwenc̱he yogꞌ beṉꞌ ziꞌ zaꞌ iṉezgakileꞌn,
naꞌ beṉꞌkaꞌ ziꞌ galj weꞌlaꞌogakeꞌ X̱ancho Chiozaꞌ.
19 Ax̱t yabanaꞌ ganaꞌ chajlaꞌo X̱ancho Chiozaꞌ,
bwieꞌ beṉꞌkaꞌ lleꞌ yell-lioni,
20 kwenc̱he gakleneꞌ beṉꞌkaꞌ chakyeshii,
beṉꞌkaꞌ nak lo naꞌ beṉꞌkaꞌ chwiyi ḻegakeꞌ,
naꞌ yisleꞌ beṉꞌkaꞌ ba nchogbiaꞌ guetgakeꞌ.
21 Naꞌch weꞌgakeꞌ dillꞌ c̱he X̱ancho Chiozaꞌ
naꞌ goḻ iṉegakeꞌneꞌ yell Jerusalénnaꞌ
22 katꞌ yidop yillag beṉꞌkaꞌ zaꞌ yogꞌ yellkaꞌ kwenc̱he weꞌlaꞌogakeꞌneꞌ.
23 To gchoḻchga zoaꞌ lo yell-lioni ba bzex̱jeꞌ fuerz c̱haꞌni;
naꞌ ba bzeshee yiz c̱he yeḻꞌ mban c̱haꞌni.
24 Naꞌ wniaꞌ:
“Chios c̱haꞌ,
bi yikoo yeḻꞌ mban c̱haꞌni ṉaa ni nakꞌ beṉꞌ xkwidꞌ.”
Ḻaꞌ zejḻi kaṉi zoꞌ liꞌ.
25 Linꞌ bx̱e bsiloꞌ yell-lioni ka wzolon,
naꞌ liꞌkzan bx̱e bsiloꞌ yabanaꞌ.
26 Yogꞌ diikaꞌ te c̱hegakin,
san liꞌ zoakzoꞌ zejḻi kaṉi.
Naꞌ yogꞌ diikaꞌ yiyigakan ka chiyi to xalaan beṉꞌ,
naꞌ chaljeꞌn naꞌ chchooṉeꞌn.
27 San liꞌ,
toz ka zoꞌ zejḻi kaṉi;
naꞌ biga llia te c̱hoꞌ.
28 Naꞌ netoꞌ chzoantoꞌ xtilloonaꞌ,
gap wwioꞌ xiiṉntoꞌkaꞌ
naꞌ soalenoꞌ xiiṉ dia c̱hebꞌkaꞌ.