Salmo 98
1 Ḻi goḻ to dii kob dii koon X̱anchonaꞌ balaaṉ,
daa ba beneꞌ diikaꞌ chon ka chibanicho;
kon yeḻꞌ wak choo yeḻꞌ wak xen c̱heꞌnaꞌ
ba beneꞌ gan lao beṉꞌkaꞌ chwigakileꞌneꞌ.
2 X̱ancho Chiozaꞌ ba bliꞌe lao yogꞌḻoḻ yellkaꞌ ka bisleꞌ choꞌ,
naꞌ ka chc̱hogloeꞌ c̱he beṉꞌ kon ka chiyaḻꞌ.
3 Ba bliileꞌ choꞌ yeḻꞌ chaki c̱heꞌnaꞌ naꞌ ba beneꞌ daa bc̱hebeꞌ goneꞌ c̱he yell c̱hechonaꞌ,
choꞌ beṉꞌ Israel.
Ax̱t ganaꞌ zeelo chiyoll chido yell-lioni ba ṉezgakileꞌ
bisla Chios c̱hechonaꞌ choꞌ.
4 Ḻi yibayi,
ḻi goḻ iṉe X̱ancho Chiozaꞌ,
yogꞌle leꞌ zoale doxen yell-lioni.
Ḻi goḻ zillj,
ḻi kapꞌ naꞌlenaꞌ
naꞌ ḻi goḻ dii koon ḻeꞌ balaaṉ.
5 Ḻi goḻ iṉe X̱anchoꞌ Chiozaꞌ,
kon diikaꞌ llia kwerd c̱heyin.
6 Ḻi yibayi ḻi goḻ iṉe X̱ancho Chiozaꞌ,
beenaꞌ chṉabiaꞌ,
kon yakaꞌ chkwellicho.
7 Gonshga nisdoꞌnaꞌ sshag naꞌ yogꞌ diikaꞌ lleꞌ llaꞌ loꞌinnaꞌ,
len yell-lioni naꞌ beṉꞌkaꞌ lleꞌ llaꞌ lawinnaꞌ.
8 Yaokaꞌ gonshgagakan ka beṉꞌ chgapꞌ naꞌyin;
naꞌ yogꞌ yaa yaokaꞌ gongakan ka beṉꞌ chosyaa daa chiba chizakileꞌ
9 lao X̱ancho Chiozaꞌ,
beenaꞌ zaꞌ.
Ḻaꞌ ba zee zidc̱hogloeꞌ c̱he yogꞌḻoḻ beṉꞌ yell-lioni;
naꞌ wc̱hogloeꞌ c̱he to to beṉꞌ kon ka chiyaḻꞌ gakan.