Salmo 97
1 ¡X̱ancho Chiozaꞌ chṉabiꞌe!
¡Ḻi yiba yizaki,
leꞌ lleꞌle doxen yell-lioni!
¡Ḻi yiba yizaki,
leꞌ lleꞌle yell zitꞌkaꞌ llia choꞌa nisdoꞌnaꞌ!
2 Nec̱hj bej gasjaꞌ ḻeꞌ.
Chṉabiꞌe kon ka chiyaḻꞌ,
naꞌ chc̱hogloeꞌ c̱he beṉꞌ kon ka nakan.
3 Naꞌ nkwialoeꞌ yiꞌnaꞌ laweꞌnaꞌ
naꞌ wlliayiꞌ wlliaden beṉꞌkaꞌ lliadiaꞌ lliagodꞌ ḻeꞌ,
beṉꞌkaꞌ chakziꞌ chakzbangakileꞌneꞌ.
4 Naꞌ katꞌ chashj chtin yiꞌ wziwꞌ c̱heꞌnaꞌ,
chzeeniꞌn doxen yell-lioni,
naꞌ ax̱t chxiz yell-lioni.
5 Ka ser daa chiyonꞌ,
kanꞌ chak c̱he yaakaꞌ lao X̱ancho Chiozaꞌ,
beenaꞌ nak X̱an doxen yell-lioni.
6 Yabanaꞌ choꞌen dillꞌ nakeꞌ beṉꞌ ḻi beṉꞌ shaoꞌ,
naꞌ yogꞌḻoḻ beṉꞌ lleꞌ yell-lioni chleꞌgakileꞌ nakeꞌ beṉꞌ choo beṉꞌ xen.
7 Naꞌ beṉꞌkaꞌ choeꞌlaꞌo diikaꞌ nak yaj yag,
chziꞌgakeꞌ yeḻꞌ ztoꞌ daa chep chaꞌlallꞌlengakeꞌn.
Yogꞌ diikaꞌ nak yaj yag bibi zakꞌgakan lao Chiozaꞌ.
8 Chios c̱haꞌ,
beṉꞌkaꞌ lleꞌ yell Siónnaꞌ,
naꞌ beṉꞌkaꞌ lleꞌ yellkaꞌ sto diikaꞌ llia ganaꞌ mbani Judánaꞌ,
ḻe chiba chizakꞌgakileꞌ diikaꞌ nllioꞌ biaꞌ.
9 Ḻaꞌ liꞌ,
Chios c̱haꞌ,
nakoꞌ ḻiizelozi beṉꞌ choo beṉꞌ xen
naꞌ chṉabiꞌo zbii zkaaṉ yell-lioni.
Nakchoꞌ beṉꞌ choo beṉꞌ xen inllebch aga ka yogꞌ diikaꞌ noni chios c̱he beṉꞌ.
10 Beṉꞌkaꞌ chakgakileꞌ X̱ancho Chiozaꞌ chiyaḻꞌ wwigakileꞌ dii malaꞌ,
ḻaꞌ chap chwieꞌ yeḻꞌ mban c̱he beṉꞌkaꞌ chon ka cheenileꞌ,
naꞌ chisleꞌ ḻegakeꞌ lo ṉiꞌa naꞌ beṉꞌ malkaꞌ.
11 Yeḻꞌ goklen c̱he Chiozaꞌ nakan ka to beeniꞌ daa chzeeniꞌn lao beṉꞌkaꞌ zej shḻi,
naꞌ yeḻꞌ chiba chizakinaꞌ zoalenan beṉꞌkaꞌ zoa do yic̱hj do lallꞌgakeꞌ.
12 ¡Ḻi yiba yizaki lao X̱ancho Chiozaꞌ,
leꞌ nakle beṉꞌ wen,
naꞌ ḻi weꞌlaꞌo beenaꞌ nak dowalj beṉꞌ ḻi beṉꞌ shaoꞌ!