Salmo 96
1 Ḻi goḻ to dii kob dii koon X̱anchonaꞌ balaaṉ;
ḻi goḻ iṉieꞌ yogꞌḻoḻtele leꞌ zoale doxen yell-lioni.
2 Ḻi gol iṉe X̱anchonaꞌ,
ḻi kwee balaaṉ.
Lla kon lla liꞌ weꞌ dillꞌ ka choneꞌ chisleꞌ beṉꞌ lao dii nxollkaꞌ.
3 Ḻi weꞌ dillꞌ ladj beṉꞌkaꞌ lleꞌ to to yell doxen yell-lioni,
ka nak balaaṉ xen c̱heꞌnaꞌ naꞌ ka nak diikaꞌ choneꞌ diikaꞌ chon ka chibani beṉꞌ.
4 Ḻaꞌ X̱ancho Chiozaꞌ nakeꞌ beṉꞌ choo beṉꞌ xen naꞌ chidoḻee weꞌlaꞌochoneꞌ;
zeelo ḻenꞌ chiyaḻꞌ gall illebcho lao yogꞌ chioskaꞌ nx̱enilallꞌ beṉꞌ.
5 Ḻaꞌ diikaꞌ noni chios c̱he beṉꞌ zitꞌkaꞌ nakgakan de yaj yag,
san X̱ancho Chiozanꞌ bx̱e bsileꞌ yabanaꞌ.
6 De to yeḻꞌ chey cheeniꞌ xen ganaꞌ zoeꞌ daa nakeꞌ beṉꞌ zakii nlleb.
De yeḻꞌ wak choo yeḻꞌ wak xen naꞌ yeḻꞌ mbalaz latjaꞌ ganaꞌ zoeꞌ.
7 Leꞌ lleꞌle yogꞌḻoḻ yellkaꞌ llia yell-lioni,
ḻi yeꞌ X̱ancho Chiozaꞌ nakeꞌ beṉꞌ zakii,
naꞌ napeꞌ yeḻꞌ wak choo yeḻꞌ wak xen.
8 Ḻi koo X̱ancho Chiozaꞌ balaaṉ daa chidoḻee.
Ḻi shoꞌ leshꞌ lill xḻatjeꞌnaꞌ
naꞌ ḻi lljwaꞌ daa chzanile weꞌleneꞌ.
9 Ḻi weꞌlaꞌo X̱ancho Chiozaꞌ lill xḻatjeꞌnaꞌ ganaꞌ nak mbalaz inlleb.
¡Ḻi gall illebeꞌ,
yogꞌtele leꞌ zoale doxen yell-lioni!
10 Ḻi yeꞌ beṉꞌkaꞌ lleꞌ yell-lioni:
“¡X̱ancho Chiozaꞌ chṉabiꞌe!”
Ḻeꞌ bzoac̱hec̱heꞌ yell-lioni kwenc̱he bi chxiz chdan;
ḻeꞌ wc̱hogloeꞌ c̱he to to beṉꞌ kon ka chiyaḻꞌ gakan.
11 Yabanaꞌ len yell-lioni,
chiyaḻꞌ yiba yizakgakin;
naꞌ nisdoꞌnaꞌ chiyaḻꞌ gonan sshag yeḻꞌ chiba chizaki c̱heyinnaꞌ len yogꞌḻoḻ bakaꞌ lleꞌ llaꞌ ḻoꞌinnaꞌ.
12 Lyix̱aa len yogꞌḻoḻ dii lleꞌ llaꞌ lawinnaꞌ chiyaḻꞌ yiba yizakgakin.
Naꞌ yagkaꞌ lleꞌ llaꞌ yaa yaokaꞌ chiyaḻꞌ goḻ iṉegakan yeḻꞌ chiba chizaki c̱heyinkaꞌ
13 lao X̱ancho Chiozaꞌ,
beenaꞌ zaꞌ.
Ḻaꞌ ba zee zidc̱hogloeꞌ c̱he yogꞌḻoḻ beṉꞌ yell-lioni;
naꞌ wc̱hogloeꞌ c̱he to to beṉꞌ kon ka chiyaḻꞌ gakan.