Salmo 99
1 X̱ancho Chiozaꞌ chṉabiꞌe.
Ladj anjlkaꞌ le kerubines llieꞌ chṉabiꞌe.
Yogꞌ beṉꞌ lleꞌ to to yell gall illebgakeꞌneꞌ,
naꞌ yell-lioni ixiz iṉiban.
2 X̱ancho Chiozaꞌ,
beenaꞌ zoa yell Siónnaꞌ,
nakeꞌ beṉꞌ choo beṉꞌ xen,
nakeꞌ ḻiizelozi beṉꞌ choo beṉꞌ xen lao yogꞌḻoḻte yell.
3 Weꞌlaꞌoshga yogꞌḻoḻ beṉꞌ ḻeꞌ,
daa nakeꞌ beṉꞌ choo beṉꞌ xen naꞌ beṉꞌ gall illebcho.
¡X̱ancho Chiozaꞌ nakeꞌ dowalj beṉꞌ ḻi beṉꞌ shaoꞌ!
4 Liꞌ nakoꞌ to beṉꞌ wṉabiaꞌ xen
naꞌ liꞌkzan bllioꞌ biaꞌ c̱hogbiꞌa c̱he yogꞌte beṉꞌ kon ka chiyaḻꞌ gak c̱heꞌ,
ḻaꞌ kanꞌ chazlalloo.
Chonoꞌ yeḻꞌ josc̱his ladj xiiṉ dia c̱he dii Jacobaꞌ kon ka chiyaḻꞌ gak.
5 ¡Ḻi weꞌlaꞌo Chios c̱hechonaꞌ,
beenaꞌ nak X̱ancho,
naꞌ ḻi wc̱hekꞌ xible laweꞌnaꞌ!
¡Ḻeꞌ nakeꞌ dowalj beṉꞌ ḻi beṉꞌ shaoꞌ!
6 Dii Moisézaꞌ naꞌ dii Aarónnaꞌ wlengakeꞌ ladj bx̱ozkaꞌ,
naꞌ dii Samuelaꞌ wleneꞌ ladj beṉꞌkaꞌ wṉab yeḻꞌ goklen c̱he Chiozaꞌ.
Ka wṉabgakeꞌ yeḻꞌ goklennaꞌ,
Chiozaꞌ gokleneꞌ ḻegakeꞌ.
7 Ḻoo bejaꞌte wṉe Chiozaꞌ bshaljleneꞌ dii Moisézaꞌ naꞌ dii Aarónnaꞌ,
naꞌ ḻegakeꞌ bengakeꞌ ka golleꞌ
naꞌ daa bllieꞌ biaꞌ gongakeꞌ.
8 Chios,
beṉꞌ nak X̱anntoꞌ,
liꞌ goklenoꞌ dii x̱ozxtoꞌntoꞌkaꞌ
naꞌ biziꞌxenoꞌ c̱hegakeꞌ,
per ḻekzkaꞌ bsakꞌziꞌo ḻegakeꞌ ni c̱he dii malkaꞌ bengakeꞌ.
9 ¡Ḻi weꞌlaꞌo X̱ancho Chiozaꞌ!
Naꞌ ¡ḻi lljac̱hekꞌ xiblenaꞌ laweꞌnaꞌ lo yaa c̱heꞌnaꞌ!
Ḻaꞌ ¡X̱ancho Chiozaꞌ nakeꞌ dowalj beṉꞌ ḻi beṉꞌ shaoꞌ!