Salmo 94
1 Chios c̱haꞌ,
beṉꞌ chiziꞌ wzon,
bliꞌgach yeḻꞌ chllaa c̱hoꞌnaꞌ.
2 Linꞌ nakoꞌ beenaꞌ chc̱hoglo c̱he beṉꞌ yell-lioni.
¡Bi shagachiloꞌ wiꞌo beṉꞌki chep chaꞌlallꞌ yeḻꞌ zakꞌziꞌnaꞌ chidoḻꞌgakeꞌ!
3 ¿Bat,
Chios c̱haꞌ,
bat yiyoll yido yiba yizaki beṉꞌ malka?
4 Yogꞌḻoḻ beṉꞌ malkaꞌ chbell chṉe ka nḻaꞌ ka nte,
nakgakeꞌ beṉꞌ chep chaꞌlallꞌ
naꞌ ḻe chshalj chshon c̱he kwingakeꞌ.
5 Chios c̱haꞌ,
chongakileꞌ beṉꞌkaꞌ nak yell c̱hoꞌ kon da nazan c̱hegakeꞌ.
¡Chsakꞌziꞌgakeꞌ beṉꞌkaꞌ nak lallꞌ noꞌ!
6 Chitgakeꞌ nool wizebkaꞌ naꞌ beṉꞌ zitꞌkaꞌ;
naꞌ chsi chc̱hoggakeꞌ yeḻꞌ mban c̱he biꞌ wizebkaꞌ.
7 Naꞌ nazgakeꞌ aga chleꞌi Chiozaꞌ,
aga chakbeꞌi beenaꞌ beꞌlaꞌo dii Jacobaꞌ.
8 ¡Ḻi shajnii dga,
leꞌ beṉꞌ bi nteyi!
¿Bat illin lla shajniile?
9 ¿Achakile bi cheni beenaꞌ ben nagchokin?
¿Anti chakileꞌ bi chleꞌi beenaꞌ ben jalaochokin?
10 ¿Achakile beenaꞌ chigoo shḻilallꞌ beṉꞌkaꞌ lleꞌ yogꞌte yell bi wsakꞌziꞌe leꞌ?
¿Achakile de dii bi ṉezi beenaꞌ choeꞌ beṉꞌ yell-lioni yeḻꞌ sinꞌnaꞌ?
11 X̱ancho Chiozaꞌ ṉez nḻeꞌileꞌ yogꞌḻoḻ daa chzaꞌlallꞌ beṉꞌ yell-lioni,
naꞌ ṉezileꞌ nakan dii bibi zakii.
12 Chios c̱haꞌ,
chakomba beenaꞌ chonoꞌ ka chigooshḻilallee,
naꞌ chliꞌ chsediloꞌneꞌ daa nllioꞌ biaꞌ goneꞌ
13 kwenc̱he so sakileꞌ yeḻꞌ zakꞌziꞌkaꞌ llanaꞌ zaakan,
shlak chlliayoo beṉꞌ malkaꞌ.
14 X̱ancho Chiozaꞌ aga wchooṉlallee beṉꞌkaꞌ nak yell c̱heꞌ,
ni bi wsanlallee ḻegakeꞌ.
15 Naꞌ yiyatꞌ yeḻꞌ josc̱his wen,
naꞌ yogꞌ beṉꞌkaꞌ nak beṉꞌ wen ṉogakeꞌn.
16 ¿Nora gaklen nadꞌ
wlloneꞌ nadꞌ lao beṉꞌ malkaꞌ,
lla?
17 Sheḻꞌ X̱ancho Chiozaꞌ bi gokleneꞌ nadꞌ,
ba diaꞌ ladj beṉꞌ wetkaꞌ,
sheḻꞌkaꞌ.
18 Kanaꞌ wniaꞌ:
“Ni bllin lla guetꞌ ṉaa”,
yeḻꞌ chaki c̱hoꞌnaꞌ goklenan nadꞌ,
Chios c̱haꞌ.
19 Ladji diikaꞌ gok c̱haꞌ,
diikaꞌ bzegakan nadꞌ wṉeyi,
linꞌ biyonxenlalloo nadꞌ naꞌ benoꞌ ka biba bizakidꞌ.
20 Liꞌ aga chidiḻ chillaguiloꞌ beṉꞌkaꞌ bi chon yeḻꞌ josc̱his ka chiyaḻꞌ gakan,
ni bi chongakeꞌ diikaꞌ nllioꞌ biaꞌ gongakeꞌ,
21 naꞌ chakgakeꞌ toz chiyiljlallꞌgakeꞌ c̱he beṉꞌ wennaꞌ,
beenaꞌ bibi doḻꞌ c̱heyin de,
naꞌ chc̱hogbiaꞌgakeꞌ gueteꞌ.
22 Per X̱ancho Chiozaꞌ,
nakeꞌ ka to yoo dii nak c̱hec̱h ga shoꞌa kwenc̱he kono bi goni nadꞌ.
Naꞌ nakeꞌ ka to yaj xen daa chkwashꞌ chkweejan nadꞌ.
23 Naꞌ goneꞌ kwenc̱he beṉꞌ malkaꞌ
kwiayiꞌgakeꞌ lawi dii malkaꞌ chongakeꞌ.
X̱ancho Chiozaꞌ wlliayee ḻegakeꞌ.