Salmo 92
1 Chios c̱haꞌ,
beṉꞌ nak ḻiizelozi beṉꞌ choo beṉꞌ xen,
¡ḻe mbalaz weꞌlaꞌontoꞌ liꞌ,
naꞌ goḻ iṉentoꞌ koontoꞌ liꞌ balaaṉ!
2 Lleꞌ zil weꞌntoꞌ dillꞌ
ka nak yeḻꞌ chaki c̱hoꞌnaꞌ naꞌ c̱he daa chonoꞌ toshiizi daa chc̱heboꞌ.
3 Naꞌ goḻ iṉelenntoꞌ liꞌ diikaꞌ llia kwerd c̱heyin,
diikaꞌ chzill xochi.
4 Chios c̱haꞌ,
¡Liꞌ ba bzoꞌ nadꞌ mbalaz ni c̱heyi diikaꞌ chonoꞌ!
¡Naꞌ diikaꞌ chonoꞌ chongakan ka chiba chizakidꞌ!
5 Chios c̱haꞌ,
¡dii choo dii xen inlleb nak diikaꞌ chonoꞌ!
Naꞌ ¡diikaꞌ chgoo xṉezin gonoꞌ ḻe lallj shajniintoꞌn!
6 Beṉꞌkaꞌ bi nteyi,
bi chajniꞌgakileꞌ dga:
7 ḻaꞌkzi chesh chalj beṉꞌ malkaꞌ ka yix̱ꞌ kwan naꞌ ḻe wen chak c̱hegakeꞌ,
wllin lla kwiayiꞌgakeꞌ toshiizi.
8 Per liꞌ,
Chios c̱haꞌ,
zejḻi kaṉi nakoꞌ ḻiizelozi beṉꞌ choo beṉꞌ xen.
9 Dii ḻicha,
Chios c̱haꞌ,
beṉꞌkaꞌ chakziꞌ chakzbani liꞌ kwiayiꞌgakeꞌ;
naꞌ beṉꞌ malkaꞌ ga gazə ikaa twej twejeꞌ.
10 Liꞌ chonoꞌ nadꞌ beṉꞌ wal inlleb
ka to gooṉ wal,
naꞌ choeꞌlawoꞌ nadꞌ daa chwazjoꞌ set zix̱aꞌ yic̱hjii.
11 Ileꞌteidꞌ ka kwiayiꞌ beṉꞌkaꞌ chakziꞌ chakzbani nadꞌ;
¡naꞌ yenteidꞌ ka kwellyeshꞌ beṉꞌ malkaꞌ ni c̱heyi daa gak c̱hegakeꞌ!
12 Beṉꞌ wenkaꞌ gak wen c̱hegakeꞌ ka yag zinkaꞌ diikaꞌ zoa shiꞌa shgaꞌ;
naꞌ kwejlaogakeꞌ ka mbejlao yag cedrokaꞌ lleꞌ ganaꞌ mbani Líbanonaꞌ.
13 Daa zoagakeꞌ leshꞌ lill xḻatj X̱ancho Chiozaꞌ,
ḻe mbalaz chak c̱hegakeꞌ.
14 Ḻaꞌkzi ba nakgakeꞌ beṉꞌ gol,
gak c̱hegakeꞌ ka chak c̱he to yag dii chbiachga dii zix̱,
naꞌ toshiizi zoan shiꞌa shgaꞌ.
15 Naꞌ weꞌgakeꞌ dillꞌ iṉagakeꞌ:
X̱ancho Chiozaꞌ,
beenaꞌ chap chwieꞌ nadꞌ,
nakeꞌ beṉꞌ ḻi beṉ shaoꞌ
naꞌ biga choneꞌ daa bi nak shḻi.