Salmo 91
1 Beenaꞌ zoa lo ṉiꞌa naꞌ Chiozaꞌ,
Chios,
beenaꞌ nak ḻiizelozi beṉꞌ choo beṉꞌ xen,
beenaꞌ ḻiizelozi nap yeḻꞌ wak choo yeḻꞌ wak xen,
gap wwieꞌneꞌ.
2 Naꞌ chiꞌe Chiozaꞌ:
“Linꞌ nonꞌ lez gap wwioꞌ nadꞌ,
naꞌ wkwashꞌ wkweejoꞌ nadꞌ lao yogꞌ dii nxoll.
Linꞌ nakoꞌ Chios c̱haꞌ,
naꞌ nx̱enilallaa liꞌ.”
3 Ḻenꞌ yisleꞌ liꞌ lao dii nxollkaꞌ,
naꞌ yisleꞌ liꞌ lao yillweꞌkaꞌ daa nsaꞌ yeḻꞌ wit.
4 Naꞌ ḻeꞌ wkweejeꞌ liꞌ
ka chon bakaꞌ chiyell xiiṉbkaꞌ xan x̱ilbkaꞌ,
kwenc̱he bibi gak c̱hoꞌ.
Naꞌ daa nc̱hebeꞌ goneꞌ c̱hoꞌ wkweejan liꞌ.
5 Bi gall illeboꞌ diikaꞌ chda waḻ chel,
ni xiskaꞌ chzaḻꞌlengakeꞌ xis wix̱itꞌkaꞌ tellanaꞌ,
6 ni dii nxollkaꞌ chda waḻ chel,
ni dii malkaꞌ chlliayiꞌn beṉꞌ tellanaꞌ.
7 Ḻaꞌkzi kwitoꞌnaꞌ shḻaa guet to mil beṉꞌ,
naꞌ kwitoꞌnaꞌ zi shḻaa guet zi shi mileꞌ,
naꞌ liꞌ,
aga bi gakiloꞌ.
8 Kontgui sioꞌ wwioꞌ ka gak c̱he beṉꞌ malkaꞌ
katꞌ ikaagakeꞌ laxj dii malkaꞌ bengakeꞌ.
9 Daa ba nx̱enilalloo gap wwia X̱ancho Chiozaꞌ liꞌ,
beenaꞌ ḻiizelozi nak beṉꞌ choo beṉꞌ xen,
10 aga bi dii nxoll c̱hoꞌ gatꞌ,
ni yillweꞌ bi shoꞌ ḻoo yoo lilloꞌnaꞌ.
11 Ḻaꞌ ḻenꞌ wseḻee anjl c̱heꞌkaꞌ gap wwiagakeꞌ liꞌ gattezə shajoꞌ;
12 naꞌ gox̱ꞌgakeꞌ liꞌ kwenc̱he ki koo wc̱hewoꞌ yajkaꞌ.
13 Wak shec̱hj toꞌ ladj bell zṉiakaꞌ naꞌ ladj beḻ zṉiakaꞌ
naꞌ wlej wshoshjgakoꞌb naꞌ bibi gongakib liꞌ.
14 Chiozaꞌ neꞌ:
“Daa chaki beeni nadꞌ,
yislaꞌneꞌ,
naꞌ gonꞌ ka kono bi goni ḻeꞌ daa nombiꞌe nadꞌ.
15 Naꞌ katꞌ iṉieꞌ nadꞌ,
naꞌ wzenagꞌ c̱heꞌ,
naꞌ gaklenee lao yeḻꞌ zakꞌziꞌnaꞌ chllagloeꞌ,
naꞌ yislaꞌneꞌ lawi daa chak c̱heꞌ,
naꞌ gonꞌ ka shoꞌe balaaṉ xen.
16 Naꞌ wiꞌaneꞌ to yeḻꞌ mban xen
naꞌ gonꞌ ka yiba yizakileꞌ
daa chislaꞌneꞌ lawi daa chak c̱heꞌ.”