Salmo 90
Libr wdapi
(Salmos 90—106)
1 Chios c̱haꞌ,
toshiizi ba goklenoꞌ dia c̱hentoꞌkaꞌ ba wde,
naꞌ kaꞌkzə ni chaklenoꞌ netoꞌ ṉaa.
2 Kanaꞌ ziꞌ x̱e silte yaa yaokaꞌ
naꞌ ziꞌ x̱e silte yell-lioni,
kaniꞌteyi naꞌ zejḻi kaṉi,
liꞌ nakoꞌ Chios.
3 Liꞌ chiyonoꞌ beṉec̱haꞌ bishte yell-lio
katꞌ chiꞌo ḻegakeꞌ:
“Ḻi yiyak bishte yell-lio,
leꞌ xiiṉ beṉec̱h.”
4 To mil yiz chleꞌiloꞌn ka shllazə,
wa ka shoṉ tap gor c̱he shyel.
5 Ḻobeꞌ chiziꞌ chikoo yeḻꞌ mban c̱he beṉꞌ yell-lioni,
ḻaꞌ to ldezan chbangakeꞌ,
ka beṉꞌ chṉezi yel.
Chak c̱hegakeꞌ ka chak c̱he yix̱ꞌ kwannaꞌ daa chlaꞌ shzilaꞌ.
6 Ḻaꞌkzi chlaꞌn shzilaꞌ naꞌ chakshaoꞌlalliin,
shlleꞌnaꞌ chkwedan naꞌ chbillan.
7 Yeḻꞌ chllaa c̱hoꞌnaꞌ chwall chsheban netoꞌ
naꞌ chlliayiꞌn netoꞌ.
8 Yogꞌḻoḻ dii malkaꞌ chonntoꞌ ṉez nḻeꞌiloꞌn kwasḻoḻ,
naꞌ ni ton bi ngashꞌ lawoꞌnaꞌ.
9 Naꞌ chsi chc̱hogoꞌ yeḻꞌ mban c̱hentoꞌni daa chshaantoꞌ liꞌ.
Ka to beṉꞌ chkaalallꞌzin,
kaꞌzə chde lla yel c̱hentoꞌkaꞌ.
10 Guiyonshi yiz zeelo chbanntoꞌ,
naꞌ beṉꞌkaꞌ chon beṉꞌ walch chbangakeꞌ taplalj yiz.
Naꞌ ḻaꞌkzi to katꞌ chzoantoꞌ,
yizkaꞌ chbanntoꞌ nsaꞌn dii zenꞌ dii zed naꞌ yeḻꞌ chjx̱aki.
Naꞌ yizkaꞌ ḻobeꞌ chdegakan,
naꞌ ḻobeꞌ chiyoll chidolenntoꞌgakan.
11 Kono ṉezi ka to nak yeḻꞌ chllaa c̱hoꞌnaꞌ
kwenc̱he gall illebeꞌ liꞌ ka chiyaḻꞌ.
12 Bliꞌ bsedi netoꞌ kwenc̱he gakbeꞌintoꞌ mbabzi lla yel c̱hentoꞌkanꞌ
kwenc̱he shoꞌ yeḻꞌ sinꞌ c̱hoꞌnaꞌ ḻoo yic̱hjlallꞌdoꞌntoꞌni.
13 Biziꞌxengach c̱hentoꞌ,
Chios c̱haꞌ,
naꞌ bich shaꞌgachiloꞌ.
Wdapgach yeḻꞌ chiyeshꞌlallii c̱hentoꞌ,
netoꞌ nakntoꞌ xmosoꞌ.
14 Soalengach yeḻꞌ chaki c̱hoꞌnaꞌ netoꞌ ka ziꞌ solo llanaꞌ,
naꞌ yiba yizakintoꞌ goḻ iṉentoꞌ liꞌ shnon mbanntoꞌ.
15 Bengach ka yizoantoꞌ mbalaz,
ka to llakaꞌ naꞌ yizkaꞌ ba bsakꞌziꞌo netoꞌ
naꞌ ben bleꞌintoꞌ dii malaꞌ.
16 Bengach ka netoꞌ chonntoꞌ ka cheeniloꞌ,
naꞌ len xiiṉ dia c̱hentoꞌkaꞌ,
yen ileꞌintoꞌ diikaꞌ chonlenoꞌ yeḻꞌ wak c̱hoꞌnaꞌ.
17 Soalengach yeḻꞌ goklen c̱hoꞌnaꞌ netoꞌ,
Chios c̱haꞌ.
Bengach ka siꞌntoꞌ banez llinnaꞌ chonntoꞌ.
Ben goklen,
bengach ka siꞌntoꞌ banez llinnaꞌ chonntoꞌ.