Salmo 88
1 Chios c̱haꞌ,
linꞌ nakoꞌ X̱anꞌ naꞌ beenaꞌ chisla nadꞌ,
ka tella ka waḻ chṉabꞌ yeḻꞌ goklen c̱hoꞌnaꞌ.
2 ¡Wxiꞌ wkaagach dga niaꞌ liꞌ!,
¡bzenaggach dga chṉabidꞌ liꞌ!
3 Ba jshyaidꞌ yogꞌ dii malkaꞌ chak c̱haꞌ,
naꞌ ba zoa ileꞌidꞌ yeḻꞌ witaꞌ.
4 ¡Ba nontekz beṉꞌ lez guetꞌ,
daa bich chak c̱has taꞌ!
5 Naꞌ ba mbej yic̱hjgakeꞌ nadꞌ ka to beṉꞌ ba wit;
nakꞌ ka beṉꞌkaꞌ wit lo wdiḻaꞌ
beṉꞌkaꞌ ba bkwashꞌgakeꞌ;
ka beṉꞌkaꞌ bich goklenoꞌ
naꞌ wlej yic̱hjoꞌ ḻegakeꞌ.
6 Ba bzaḻoo nadꞌ ḻoo yechaꞌ ganaꞌ zeelo nak zitj,
latjaꞌ ganaꞌ nak zitj naꞌ shgashj shc̱hoḻ.
7 Ba chsakꞌziꞌo nadꞌ lo yeḻꞌ chllaa c̱hoꞌnaꞌ,
naꞌ chak c̱haꞌ ka chak c̱he to beṉꞌ chchix̱ chtoḻ bḻi c̱he nisdoꞌnaꞌ.
8 Ba benoꞌ kwenc̱he beṉꞌkaꞌ nllaguidꞌ wchooṉlallꞌgakeꞌ nadꞌ;
ba benoꞌ nadꞌ ka to dii chpani ḻegakeꞌ.
Naꞌ nakꞌ ka to beṉꞌ de lillya beṉꞌ bi gak yila.
9 Ax̱t ba chc̱hoḻ jalawꞌki daa ḻe chbellꞌ.
¡Yogꞌ lla chṉabidꞌ liꞌ yeḻꞌ goklen c̱hoꞌnaꞌ,
Chios c̱haꞌ,
naꞌ chḻis naꞌki lawoꞌnaꞌ!
10 ¿Abeṉꞌ wetkaꞌlan wliiloꞌ yeḻꞌ wak c̱hoꞌnaꞌ?
¿Awaktgui beṉꞌ wetkaꞌ weꞌlaꞌogakeꞌ liꞌ?
11 ¿Awaktgui beṉꞌ wetkaꞌ weꞌgakeꞌ dillꞌ c̱he yeḻꞌ chaki c̱hoꞌnaꞌ naꞌ c̱he dillꞌ ḻi c̱hoꞌnaꞌ
ḻoo banaꞌ ganaꞌ chṉabiaꞌ yeḻꞌ witaꞌ?
12 ¿Awleꞌi beṉꞌkaꞌ lleꞌ ḻoo banaꞌ,
ganaꞌ shgasj shc̱hoḻ,
diikaꞌ chonoꞌ daa chon ka yibani beṉꞌ?
¿Alleꞌtgui no yiyombiaꞌ yeḻꞌ beṉꞌ ḻi beṉꞌ shaoꞌ c̱hoꞌnaꞌ,
ganaꞌ bichbi chjadingakileꞌ?
13 Per nadꞌ,
chṉabidꞌ liꞌ gaklenoꞌ nadꞌ,
Chios c̱haꞌ;
naꞌ shzildoꞌ choeꞌḻwillꞌ liꞌ.
14 ¿Bic̱he chonziloꞌ nadꞌ nakzi,
Chios c̱haꞌ?
¿Bic̱he chllonziloꞌ nadꞌ yeḻꞌ goklen c̱hoꞌnaꞌ?
15 Kanaꞌ naktiaꞌ bi wewꞌ chzakꞌziꞌa,
naꞌ toshiizi ni zoaꞌ dii nxoll lao yeḻꞌ witaꞌ.
Ba wzo wzakidꞌ dii zan wal yeḻꞌ zakꞌziꞌkaꞌ beniloꞌ nadꞌ,
naꞌ ṉaa bich so sakidaꞌn.
16 Yeḻꞌ chllaa c̱hoꞌnaꞌ ba bsakꞌziꞌn nadꞌ dii wal inlleb,
naꞌ ba bden c̱haꞌ.
17 Nakan ka nis zil dii nec̱hj yoll nadꞌ toshiizi.
18 Ba biḻoo nadꞌ beṉꞌkaꞌ nllaguidꞌ,
naꞌ toz yel c̱holaꞌ chgaaṉlenan nadꞌ.