Salmo 86
1 Chios c̱haꞌ,
bzenaggach c̱haꞌ,
ḻaꞌ ḻe nyeshꞌ chak c̱haꞌ naꞌ kono zoa gaklen nadꞌ.
2 Wdap bwiagach yeḻꞌ mban c̱haꞌni,
daa chonꞌ ka cheeniloꞌ.
Liꞌ nakoꞌ Chios c̱haꞌ,
bislagach nadꞌ daa nx̱enilallaa liꞌ.
3 Chios c̱haꞌ,
biyeshꞌlallꞌgachi nadꞌ,
ḻaꞌ linꞌ choeꞌḻwillꞌ toshiizi.
4 Chios c̱haꞌ,
nadꞌ chzoa xtilloonaꞌ,
btipgach lallaa,
ḻaꞌ linꞌ choeꞌḻwillꞌ.
5 Liꞌ,
Chios c̱haꞌ,
nakoꞌ beṉꞌ wen naꞌ beṉꞌ chiziꞌxen,
naꞌ ḻe chakchgailoꞌ beṉꞌkaꞌ chṉab yeḻꞌ goklen c̱hoꞌnaꞌ.
6 Chios c̱haꞌ,
bzenaggach ṉaa choeꞌḻwillꞌ liꞌ,
¡bzenaggach dga chṉabidꞌ liꞌ!
7 Llanaꞌ chleꞌidꞌ yeḻꞌ zakꞌziꞌnaꞌ chṉabidꞌ liꞌ yeḻꞌ goklen c̱hoꞌnaꞌ,
daa ṉezidꞌ linꞌ gaklenoꞌ nadꞌ.
8 Chios c̱haꞌ,
tozoꞌ linꞌ nakoꞌ beṉꞌ chidoḻꞌ weꞌlaꞌontoꞌ,
kochno zoa ka liꞌ.
Naꞌ kono zoa gak gon ka diikaꞌ chonoꞌ.
9 Chios c̱haꞌ,
linꞌ bx̱e bsiloꞌ beṉꞌkaꞌ lleꞌ to to yell,
naꞌ yogꞌgakeꞌ yidgakeꞌ lawoꞌnaꞌ kwenc̱he weꞌlaꞌogakeꞌ liꞌ,
naꞌ koogakeꞌ liꞌ balaaṉ.
10 Ḻaꞌ tozoꞌ linꞌ nakoꞌ Chios;
¡liꞌ nakoꞌ beṉꞌ choo beṉꞌ xenꞌ naꞌ diikaꞌ chonlenoꞌ yeḻꞌ wak c̱hoꞌnaꞌ chonan ka chibani beṉꞌ!
11 Chios c̱haꞌ,
bliꞌyi nadꞌ nez c̱hoꞌnaꞌ,
kwenc̱he gonꞌ ka cheeniloꞌ.
Bengach ka soac̱hec̱h yic̱hjlallꞌdawaani lawoꞌnaꞌ,
kwenc̱he gall illebꞌ liꞌ.
12 Chios c̱haꞌ,
liꞌ nakoꞌ X̱anꞌ,
Weꞌlawaa liꞌ do yic̱hj do lallaa
naꞌ toshiizi kwaa liꞌ balaaṉ.
13 ¡Daa ḻe chakchgailoꞌ nadꞌ
ba bisloꞌ nadꞌ lo yeḻꞌ witaꞌ!
14 Chios c̱haꞌ,
x̱oṉj beṉꞌ chep chaꞌlallꞌ,
beṉꞌ zeshꞌ beṉꞌ zban,
beṉꞌ bi ngoo yic̱hjlallꞌdoꞌgakeꞌ liꞌ,
ba ngoogakeꞌ xṉezin witgakeꞌ nadꞌ.
15 Per liꞌ,
Chios c̱haꞌ,
nakoꞌ beṉꞌ wen beṉꞌ shaoꞌ naꞌ beṉꞌ chiyeshꞌlallii.
Nakoꞌ beṉꞌ yeḻꞌ chxenlallꞌ xen,
naplikzoꞌ yeḻꞌ chaki,
naꞌ nakoꞌ beṉꞌ chon ka chc̱heboꞌ.
16 Bwiagach ka chak c̱haꞌ,
naꞌ ¡biyeshꞌlallꞌgachi nadꞌ!
Bislagach nadꞌ,
naꞌ ben nadꞌ wal,
daa chzoaꞌ xtilloonaꞌ.
17 Bengach ka gakbeꞌidꞌ nakoꞌ beṉꞌ wen,
naꞌ beṉꞌkaꞌ chakziꞌ chakzbani nadꞌ ileꞌgakileꞌ chaklenoꞌ nadꞌ naꞌ yiyii yidoꞌgakileꞌ.
Liꞌ Chios c̱haꞌ,
chaklenoꞌ nadꞌ naꞌ chiyonxenlalloo nadꞌ.