Salmo 85
1 Chios c̱haꞌ,
ba benlikzoꞌ wen c̱hentoꞌ,
netoꞌ nakntoꞌ yell c̱hoꞌ;
ba bisloꞌ netoꞌ nakntoꞌ xiiṉ dia c̱he dii Jacobaꞌ lo ṉiꞌa naꞌ beṉꞌ zitꞌkaꞌ.
2 Ba biziꞌxenoꞌ dii malkaꞌ benntoꞌ
naꞌ bisol biṉitoꞌ yogꞌḻoḻ saaxya c̱hentoꞌkaꞌ.
3 Ba bzoꞌ yeḻꞌ chllaa c̱hoꞌnaꞌ kaꞌlə,
naꞌ bich chlloo netoꞌ.
4 Chios,
beṉꞌ chisla netoꞌ,
¡bengach ka yiyak wen c̱hentoꞌ sto shii,
naꞌ bich illaagachoꞌ netoꞌ!
5 ¿Atoshiizin illoo netoꞌ?
¿Abiga yiyoll yido yeḻꞌ chllaa c̱hoꞌnaꞌ?
6 Beṉgach netoꞌ yeḻꞌ gaꞌ yeḻꞌ mbannaꞌ sto shii,
kwenc̱he yiba yizakintoꞌ lawoꞌnaꞌ.
7 Chios c̱haꞌ,
¡bliꞌgachi netoꞌ yeḻꞌ chaki c̱hoꞌnaꞌ,
naꞌ bislagach netoꞌ!
8 Wzenagꞌ daa iṉa Chios c̱haꞌnaꞌ;
ḻeꞌ chc̱hebeꞌ yizoeꞌ mbalaz yell c̱heꞌnaꞌ,
beṉꞌkaꞌ nak lallꞌ nee,
kwenc̱he bich gongakeꞌ dii malkaꞌ ba bengakeꞌ.
9 Dii ḻicha,
Chiozaꞌ zoeꞌ gaḻꞌ gllin
c̱he beṉꞌkaꞌ chall chlleb ḻeꞌ,
kwenc̱he yisleꞌ ḻegakeꞌ
naꞌ wliꞌe balaaṉ xen c̱heꞌnaꞌ gani mbanicho.
10 Naꞌ ganaꞌ zoa Chiozaꞌ,
yeḻꞌ chakinaꞌ len dillꞌ ḻinaꞌ chidiḻ chillaggakan;
yeḻꞌ zoa mbalazaꞌ len daa nak dii ḻi dii shaoꞌ nllagui ljwellgakan.
11 Naꞌ daa nak dii ḻi wliꞌlawin lo yell-lioni,
naꞌ yeḻꞌ ḻi yeḻꞌ shawaa wliꞌlawin yabanaꞌ.
12 X̱ancho Chiozaꞌ goneꞌ wen c̱hecho,
naꞌ ganaꞌ chazcho gatꞌ kweꞌ daa yiziꞌ yilapcho.
13 Daa nak dii ḻi dii shaoꞌ kwialon laweꞌnaꞌ
naꞌ ḻen wliꞌn ba zee.