Salmo 84
1 Ḻe mbalaz nak lill xḻatjoꞌnaꞌ,
Chios c̱haꞌ,
beṉꞌ ḻiizelozi nap yeḻꞌ wak choo yeḻꞌ wak xen.
2 ¡Ḻe chzelallꞌchgaꞌ shoꞌa leshꞌ lill xḻatj Chiozaꞌ!
¡Do yic̱hj do lallaa goḻ iṉiaꞌ Chios yaa Chios bannaꞌ!
3 Ax̱t byiṉ yoodoꞌkaꞌ naꞌ bic̱hbziwꞌkaꞌ
chllel ga gon lillbkaꞌ gaoshosh ganaꞌ chzeygakeꞌ bayix̱ꞌkaꞌ lawoꞌnaꞌ,
naꞌ naꞌ chgooshaoꞌ xiiṉdoꞌbkaꞌ,
Chios c̱haꞌ,
beṉꞌ ḻiizelozi nap yeḻꞌ wak choo yeḻꞌ wak xen,
beṉꞌ chṉabiaꞌ nadꞌ.
4 Chakomba beṉꞌkaꞌ zoatezi zoagakeꞌ lill xḻatjoꞌnaꞌ,
naꞌ toshiizi choeꞌlaꞌogakeꞌ liꞌ.
5 Chakomba beṉꞌkaꞌ chaklenoꞌ,
beṉꞌkaꞌ zelallꞌ koo nez shajgakeꞌ ganaꞌ zoa lill xḻatjoꞌnaꞌ.
6 Katꞌ chdegakeꞌ leshaa ganaꞌ le Leshꞌ c̱he nis xc̱hell,
ganaꞌ nak yo bill,
daa chdegakeꞌ lawinnaꞌ chiyakan ga chal nis,
naꞌ nis yejaꞌ chbian ḻoo xitjkaꞌ.
7 Naꞌ shlak ngoogakeꞌ nez,
zizikli chatꞌch fuerz c̱heꞌkaꞌ
ax̱t ki chllingakeꞌ lao Chiozaꞌ yell Siónnaꞌ.
8 Chios c̱haꞌ,
beṉꞌ ḻiizelozi nap yeḻꞌ wak choo yeḻꞌ wak xen,
beṉꞌ beꞌlaꞌo dii Jacobaꞌ,
bzenaggach ṉaa choeꞌḻwillꞌ liꞌ.
9 Chios c̱haꞌ,
liꞌ nakoꞌ beṉꞌ chkweej netoꞌ,
bleꞌshiꞌgachi beenaꞌ nzoꞌ chṉabiꞌe netoꞌ.
10 Zakꞌtechin soaꞌ shlla leshꞌ lill xḻatjoꞌnaꞌ
aga ka daa soaꞌ ssha inlleb gan yoblə.
Wenchlan lljsiaꞌ gapꞌ choꞌa yoo c̱he lill xḻatjoꞌnaꞌ
aga ka daa lljsoaꞌ ladj beṉꞌ malkaꞌ.
11 Ḻaꞌ X̱ancho Chiozaꞌ nakeꞌ beeniꞌ c̱hecho,
naꞌ ḻenꞌ chkweejeꞌ choꞌ.
X̱anchonaꞌ chakleneꞌ naꞌ chgwee balaaṉ beṉꞌkaꞌ zoa do yic̱hj do lallꞌgakeꞌ,
naꞌ bibi dii wen chllonileꞌ ḻegakeꞌ.
12 Chios c̱haꞌ,
beṉꞌ ḻiizelozi nap yeḻꞌ wak choo yeḻꞌ wak xen,
chakomba beṉꞌkaꞌ nx̱enilallꞌgakeꞌ liꞌ.