Salmo 83
1 Chios c̱haꞌ,
¡bi soagachoꞌ llizə!
¡Bi gonoꞌ ka beṉꞌ bibi chak gon naꞌ soazoꞌ llizə!
2 Bwia ka chon beṉꞌkaꞌ chakziꞌ chakzbani liꞌ;
chaklleshgakileꞌ naꞌ cheengakileꞌ soshyiꞌgakeꞌ liꞌ.
3 Ba wloogakeꞌ xṉezin nak gongakeꞌ
wlliayiꞌgakeꞌ beṉꞌkaꞌ nak yell c̱hoꞌ,
beṉꞌkaꞌ chapꞌ chwioꞌ.
4 Nagakeꞌ:
“Ḻi shoꞌ,
lljalliayiꞌcho ḻegakeꞌ kwenc̱he yiyol yinit yell c̱heꞌkaꞌ
naꞌ kochno lljadin lljazaꞌlallii yell Israelaꞌ.”
5 Chios c̱haꞌ,
ba nakgakeꞌ toz
naꞌ ba nongakeꞌ toz dillꞌ tiḻ-lengakeꞌ liꞌ.
6 Beṉꞌkaꞌ nak xiiṉ dia c̱he dii Edomaꞌa,
xiiṉ dia c̱he dii Ismaelaꞌ,
xiiṉ dia c̱he dii Moabaꞌ,
naꞌ xiiṉ dia c̱he dii Agaraꞌ,
7 naꞌ beṉꞌ Gebalkaꞌ,
beṉꞌ amonítakaꞌ,
beṉꞌ amalecítakaꞌ,
beṉꞌ filisteokaꞌ beṉꞌkaꞌ zoa Tíronaꞌ,
8 naꞌ ax̱t beṉꞌ Asíriakaꞌ ba nakgakeꞌ ḻegakeꞌ txen,
chaklengakeꞌ xiiṉ dia c̱he dii Lotaꞌ tiḻ-lengakeꞌ liꞌ.
9 Bengach c̱hegakeꞌ ka benoꞌ c̱he beṉꞌ Madiánkaꞌ,
ka benoꞌ c̱he Sísaranaꞌ,
naꞌ ka benoꞌ c̱he Jabínnaꞌ yao Cisónnaꞌ,
10 beṉꞌkaꞌ blliayoo yell-lio Endoraꞌ
naꞌ biyakgakeꞌ benꞌ lo yell-lionaꞌ.
11 Bengach c̱he beṉꞌkaꞌ mbejlawin ladjeꞌkaꞌ ka benoꞌ c̱he Orebaꞌ len Zeebaꞌ;
ben kwenc̱he yogteꞌ beṉꞌ wṉabiaꞌ c̱heꞌkaꞌ gak c̱hegakeꞌ ka benoꞌ c̱he Zébanaꞌ len Zalmúnanaꞌ,
12 daa wnagakeꞌ:
“Gaki c̱hecho
yell-lio c̱he beṉꞌ Israelkaꞌ daa naki c̱he Chiozaꞌ.”
13 Chios c̱haꞌ,
ben c̱hegakeꞌ ka yix beb
naꞌ ka ḻagꞌ bill daa choaꞌ beꞌnaꞌ.
14 Naꞌ ka chon yiꞌnaꞌ daa chzey ḻoo yagkaꞌ
naꞌ chlliayiꞌn yaa yaokaꞌ kon beḻ yiꞌ c̱heyinnaꞌ,
15 kaꞌ blagdogach ḻegakeꞌ naꞌ bwall bshebgakeꞌ kon yejpeꞌ wal c̱hoꞌnaꞌ.
16 ¡Bsiꞌgachgakeꞌ yeḻꞌ ztoꞌ,
Chios c̱haꞌ,
kwenc̱he yiyiljgakeꞌ liꞌ!
17 Siꞌshgagakeꞌ yeḻꞌ ztoꞌ toshiizi;
¡yiyii yidoshgagakileꞌ naꞌ guettegagakeꞌ!,
18 kwenc̱he iṉezgakileꞌ zeelo linꞌ nakoꞌ X̱anntoꞌ,
naꞌ liꞌ nakoꞌ ḻiizelozi beṉꞌ choo beṉꞌ xen,
beenaꞌ chṉabiaꞌ doxen lo yell-lioni.