Salmo 81
1 ¡Ḻi yiba yizaki goḻ iṉele Chiozaꞌ,
beenaꞌ chkwashꞌ chkweej choꞌ lao bittez dii nxoll!
Ḻi yiba yizaki weꞌlaꞌole Chiozaꞌ,
beenaꞌ beꞌlaꞌo dii Jacobaꞌ.
2 Ḻi goḻ iṉieꞌ kon pandérokaꞌ
len diikaꞌ llia kwerd c̱heyin.
3 Ḻi wkwell trompetaꞌ katꞌ yizee beoꞌ cheeṉnaꞌ,
Naꞌ katꞌ sinꞌ yel,
ḻaꞌ kananꞌ lla lṉi c̱hechonaꞌ.
4 Ḻaꞌ ḻennanꞌ bllia Chiozaꞌ biaꞌ goncho,
Chiozaꞌ beenaꞌ beꞌlaꞌo dii Jacobaꞌ.
5 Naꞌ ḻekzannanꞌ bllieꞌ biaꞌ gon xiiṉ dia c̱he dii Josénaꞌ
kanaꞌ bsakꞌziꞌ Chiozaꞌ beṉꞌ Egíptokaꞌ.
Benidꞌ shii to beṉꞌ,
naꞌ bi ṉezidꞌ non wṉe,
naꞌ wneꞌ:
6 “Ba bikwasꞌ dii ziinaꞌ yaaxizoꞌnaꞌ,
naꞌ ba bibejꞌ liꞌ lo llinnaꞌ daa gokiloꞌ zii zshab.
7 Kanaꞌ wxakꞌziꞌo,
wṉioꞌ nadꞌ naꞌ bislaꞌ liꞌ;
naꞌ billiꞌa xtilloonaꞌ ḻoo bej bzanaꞌ kanaꞌ goshj wtin.
Naꞌ Meríbanaꞌ,
ganaꞌ blaꞌ nisaꞌ,
bwiaꞌ shi lekziloꞌ chonḻilalloo nadꞌ.
8 Israel,
liꞌ nakoꞌ yell c̱haꞌ,
bzenag dga chsiꞌnidꞌ liꞌ.
Bzenaggach c̱haꞌ.
9 Bi wx̱enilalloo diikaꞌ nx̱enilallꞌ beṉꞌ zitꞌkaꞌ
ni bi weꞌlaꞌogakoꞌn.
10 Nadaan nakꞌ X̱anoꞌ,
naꞌ Chios c̱hoꞌ,
beenaꞌ bibej liꞌ yell Egíptonaꞌ.
Bx̱aꞌ choonaꞌ,
naꞌ nadꞌ wzesh wzeljidꞌ liꞌ.
11 “Per beṉꞌ Israelkaꞌ,
beṉꞌkaꞌ nak yell c̱haꞌ,
bi goklallꞌgakeꞌ wzenaggakeꞌ c̱haꞌ;
¡ni bi bzoagakeꞌ xtillaa!
12 Daan,
biꞌa latj bengakeꞌ kon daa nazan c̱hegakeꞌ,
naꞌ wzoagakeꞌ kon ka goklallꞌgakeꞌ.
13 ¡Sheḻꞌ yell c̱haꞌni bzenagan c̱haꞌ!
¡Sheḻꞌ beṉꞌ Israelki wyoogakeꞌ lo x̱nezaꞌnaꞌ,
14 tolbeꞌ nlleb blliayaa beṉꞌkaꞌ chakziꞌ chakzbani ḻegakeꞌ naꞌ bsakꞌziꞌa beṉꞌkaꞌ chdiḻ-len ḻegakeꞌ,
sheḻꞌkaꞌ!”
15 Beṉꞌkaꞌ chakziꞌ chakzbangakileꞌ X̱ancho Chiozaꞌ,
ax̱t gall illebgakeꞌneꞌ,
sheḻꞌkaꞌ,
naꞌ toshiizi tegakeꞌ lo yeḻꞌ zakꞌziꞌnaꞌ.
16 Naꞌ Chiozaꞌ wweej wwaweꞌ yell c̱heꞌnaꞌ trígonaꞌ daa zeelo nakch,
naꞌ goneꞌ choc̱hj chlalj shinꞌ baseraꞌ daa yeejgakeꞌ,
sheḻꞌkaꞌ.