Salmo 80
1 Ka beṉꞌ chap chwia xildoꞌ,
chap chwioꞌ netoꞌ beṉꞌ Israel.
Liꞌ chap chwioꞌ xiiṉ dia c̱he dii Josénaꞌ,
naꞌ llioꞌ chṉabiꞌo ladj anjlkaꞌ le kerubines,
bzenaggach c̱hentoꞌ,
2 naꞌ bleꞌshiꞌgachi xiiṉ dia c̱he dii Efraínnaꞌ,
dii Benjamínnaꞌ naꞌ dii Manasézaꞌ.
Bi shagachiloꞌ yidyaklenoꞌ netoꞌ kon yeḻꞌ wak c̱hoꞌnaꞌ.
3 Chios c̱haꞌ,
¡bengach kwenc̱he yizoanto mbalaz ka wzoanto kanaꞌ!
¡Bileꞌshiꞌgachi netoꞌ naꞌ bislagach netoꞌ!
4 Chios c̱haꞌ,
beṉꞌ ḻiizelozi nap yeḻꞌ wak choo yeḻꞌ wak xen,
¿atoshiizin illoo?
¿abich wzenagoꞌ katꞌ weꞌḻwill beṉꞌki nak yell c̱hoꞌ liꞌ?
5 Lwaa dii nan yeej gaontoꞌ,
wchellyeshꞌləntoꞌ,
naꞌ nis xc̱hell c̱hentoꞌnaꞌ gokan dii zil.
6 Ba biꞌo latj kwenc̱he beṉꞌ yellkaꞌ nllagntoꞌ chtitj chtangakileꞌ netoꞌ,
naꞌ beṉꞌkaꞌ chakziꞌ chakzbani netoꞌ chxillgakeꞌ c̱hentoꞌ.
7 Chios c̱haꞌ,
beṉꞌ ḻiizelozi nap yeḻꞌ wak choo yeḻꞌ wak xen,
¡bengach kwenc̱he yizoanto mbalaz ka wzoanto kanaꞌ!
¡Bileꞌshiꞌgachi netoꞌ naꞌ bislagach netoꞌ!
8 Ka to beṉꞌ biḻallꞌ to lba c̱he uva naꞌ biyazeꞌn lo yell-lio yoblə,
kaꞌ benoꞌ bibejoꞌ netoꞌ beṉꞌ Israel yell Egíptonaꞌ,
naꞌ bizoꞌ netoꞌ lo yell-lio c̱he beṉꞌ zitꞌkaꞌ bi benḻilallꞌ liꞌ.
9 Bixi biḻoꞌ lo yell-lionaꞌ ganaꞌ biyazoꞌ ḻbanaꞌ,
naꞌ bde loinnaꞌ naꞌ blliljan doxen latjaꞌ ganaꞌ benshawoo.
10 Yaa yaokaꞌ wyoogakan xol c̱heyinnaꞌ,
naꞌ xozꞌ xkaꞌinkaꞌ ax̱t lo yag yeḻkaꞌ wxoagakan.
11 Ḻekzkaꞌ xozꞌ xkaꞌinnaꞌ blliljan ax̱t choꞌa nisdoꞌnaꞌ,
naꞌ ax̱t choꞌa yao Éufratezaꞌ bllin diikaꞌ bigaa.
12 ¿Berac̱he bc̱hiṉjzoꞌ leej c̱heyinnaꞌ
naꞌ beꞌzoꞌ latj bshib beṉꞌkaꞌ ngoo nez uvakaꞌ?
13 Kush yix̱ꞌkaꞌ chlliayiꞌgakbanꞌ;
naꞌ bakaꞌ lleꞌ yaa yaokaꞌ cheej chaogakban.
14 Chios c̱haꞌ,
beṉꞌ ḻiizelozi nap yeḻꞌ wak choo yeḻꞌ wak xen;
ben goklen bidagach.
Bwiagach netoꞌ yabanaꞌ ganaꞌ lliatioꞌ;
bwiagach yag uvani,
15 yag uvani dga kwinoꞌ biyazoꞌ,
naꞌ xozꞌ xkaꞌinkaꞌ diikaꞌ bisgoloꞌ.
16 Lo yeḻꞌ chllaa c̱hoꞌnaꞌ blliayiꞌgach
beṉꞌkaꞌ chc̱hogan naꞌ chzeygakeꞌn.
17 Naꞌ goklengach beenaꞌ ba wlejoꞌ,
xiiṉ beṉec̱haꞌ beenaꞌ bzoꞌ goneꞌ daa cheeniloꞌ,
18 naꞌ bichga wḻaalaꞌonto liꞌ.
Beṉ netoꞌ yeḻꞌ gaꞌ yeḻꞌ mbannaꞌ
naꞌ toshiizi weꞌlaꞌontoꞌ liꞌ.
19 Chios c̱haꞌ,
beṉꞌ ḻiizelozi nap yeḻꞌ wak choo yeḻꞌ wak xen,
¡bengach kwenc̱he yizoantoꞌ mbalaz ka wzoantoꞌ kanaꞌ!
¡Bileꞌshiꞌgachi netoꞌ naꞌ bislagach netoꞌ!