Salmo 79
1 Chios c̱haꞌ,
beṉꞌ zitꞌkaꞌ bi nombiaꞌ liꞌ ba wdegakeꞌ ganaꞌ mbaniloꞌ,
naꞌ ba bṉitgakeꞌ balaaṉ c̱he lill xḻatjoꞌnaꞌ,
naꞌ ba blliayiꞌ blliadegakeꞌ yell Jerusalénni.
2 Ba bzoles bzollingakeꞌ kwerp c̱he beṉꞌkaꞌ ben ka cheeniloꞌ,
kwenc̱he gakgakeꞌ yeḻꞌ waw c̱he llodkaꞌ naꞌ no ba zṉiakaꞌ.
3 Ka beṉꞌ chlalj nis,
ba blaljgakeꞌ xc̱heneꞌkaꞌ doxen Jerusalénni,
naꞌ kono zoa wkwashꞌ ḻegakeꞌ.
4 Beṉꞌ yellkaꞌ nllagntoꞌ chtitj chtangakileꞌ netoꞌ,
naꞌ yogꞌ beṉꞌ chxillgakileꞌ netoꞌ.
5 Chios c̱haꞌ,
¿Atoshiizin illoo netoꞌ,
lla?
¿Atoshiizin gak yeḻꞌ chllaa c̱hoꞌnaꞌ ka yiꞌnaꞌ daa chaḻꞌṉiṉ?
6 Bliꞌgach yeḻꞌ chllaa c̱hoꞌnaꞌ lao beṉꞌ zitꞌkaꞌ,
beṉꞌkaꞌ bi nombiaꞌ liꞌ ni bi choeꞌḻwillgakeꞌ liꞌ,
7 daa blliayiꞌgakeꞌ dia c̱hentoꞌnaꞌ,
netoꞌ nakntoꞌ xiiṉ dia c̱he dii Jacobaꞌ,
naꞌ blliayiꞌ blliadegakeꞌ yell c̱hentoꞌni.
8 Bi gonoꞌ ka netoꞌlə koo c̱hixjzntoꞌ dii malkaꞌ ben dii x̱ozxtoꞌntoꞌkaꞌ.
Btalalloo yidyaklenoꞌ netoꞌ,
ḻaꞌ ḻe nyeshꞌ zoantoꞌ.
9 Chios c̱haꞌ,
beṉꞌ chisla netoꞌ,
goklengach netoꞌ,
bisell biḻaꞌ netoꞌ,
naꞌ wxiꞌxen c̱hentoꞌ,
kwenc̱he shoo balaaṉ.
10 Kwenc̱he bi iṉaz beṉꞌ zitꞌkaꞌ bi chajḻeꞌ c̱hoꞌ:
¿Gaṉ Chios c̱hoꞌnaꞌ?,
bengach ka ileꞌintoꞌ,
naꞌ ḻekzkaꞌ ka ileꞌi beṉꞌ zitꞌkaꞌ,
yiziꞌo wzon c̱he beṉꞌkaꞌ bet beṉꞌkaꞌ bzenag c̱hoꞌ.
11 Bzenaggach ka chbellyeshꞌ beṉꞌkaꞌ bc̱heꞌ beṉꞌ zitꞌkaꞌ.
Naꞌ kon yeḻꞌ wak c̱hoꞌnaꞌ
bislagach beṉꞌkaꞌ ba nc̱hogbiaꞌgakeꞌ guet.
12 Chios c̱haꞌ,
biziꞌgach wzonnaꞌ lao beṉꞌkaꞌ bi chajḻeꞌ c̱hoꞌ ax̱t gall shii
ni c̱heyi diikaꞌ bengakileꞌ netoꞌ.
13 Naꞌ netoꞌ nakntoꞌ yell c̱hoꞌ naꞌ ka x̱il c̱hoꞌ,
toshiizi weꞌlaꞌontoꞌ liꞌ naꞌ goḻ iṉentoꞌ liꞌ zejḻi kaṉi.