Salmo 77
1 Chṉabidꞌ X̱ancho Chiozaꞌ wzenagueꞌ c̱haꞌ
kwenc̱he gakleneꞌ nadꞌ.
2 Llanaꞌ zoaꞌ nyeshꞌ,
choeꞌḻwillꞌ X̱ancho Chiozaꞌ,
naꞌ toshiizi chḻis naꞌki choeꞌḻwillee waḻkaꞌ,
naꞌ yic̱hjlallꞌdawaani biṉꞌ yiyakshaoꞌlalliin.
3 Chjadinidꞌ X̱ancho Chiozaꞌ naꞌ chbellꞌ;
naꞌ ziaꞌ wṉeyi dga chak c̱haꞌ naꞌ chidiṉjidꞌ.
4 Chios c̱haꞌ,
bikz choo latj guesꞌ;
naꞌ daa ḻe chakshejlallaa,
ni bi chak wshaljꞌ.
5 Chjadinidꞌ llakaꞌ naꞌ yizkaꞌ ba wde.
6 Chjadinidꞌ ka choḻ chṉiaꞌ liꞌ waḻkaꞌ.
Naꞌ yic̱hjlallꞌdawaani zen wṉeyi,
naꞌ niaꞌ:
7 ¿Atoshiizin illaa X̱ancho Chiozaꞌ choꞌ,
lla?
¿Abichga yileꞌshikzileꞌ chonꞌ,
lla?
8 ¿Anti bich chakileꞌ chonꞌ,
lla?
¿Anti daa bc̱hebeꞌ goneꞌ c̱hecho bichga goneꞌn,
lla?
9 ¿Anti ba goḻ-lallꞌ Chiozaꞌ yeḻꞌ beṉꞌ wen c̱heꞌnanꞌ,
lla?
¿Anti daa ziꞌtelə chlleen,
bich chiyeshꞌlallileꞌ choꞌ,
lla?
10 Naꞌ niaꞌ:
“Ḻe chjeḻidꞌ daa chakbeꞌidꞌ beenaꞌ nak beṉꞌ choo beṉꞌ xen
bich chakleneꞌ choꞌ ka gokleneꞌ choꞌ kanaꞌ.”
11 Yisaꞌlallaa ka nak yeḻꞌ wak choo yeḻꞌ wak xenkaꞌ
ben X̱ancho Chiozaꞌ daa ba zeji.
12 Naꞌ siaꞌ wṉeyi c̱he yogꞌ diikaꞌ ba benleneꞌ yeḻꞌ wak xen c̱heꞌnaꞌ.
13 Dowalj dii ḻi dii shaoꞌ nak diikaꞌ chonoꞌ,
Chios c̱haꞌ;
kochno zoa nak beṉꞌ choo beṉꞌ xen ka liꞌ.
14 Linꞌ nakoꞌ beenaꞌ chon yeḻꞌ wak choo yeḻꞌ wak xenkaꞌ;
bliiloꞌ beṉꞌkaꞌ lleꞌ to to yell ka nak yeḻꞌ wakaꞌ napoꞌ.
15 Kon yeḻꞌ wak c̱hoꞌnaꞌ bisloꞌ beṉꞌkaꞌ nak yell c̱hoꞌ,
beṉꞌkaꞌ nak x̱iin dia c̱he dii Jacobaꞌ naꞌ dii Josénaꞌ.
16 Chios c̱haꞌ,
ka bleꞌi nisdoꞌnaꞌ liꞌ,
blleban,
naꞌ lo nisdoꞌnaꞌ ax̱t ganaꞌ zeelo zitj wxiztitan.
17 Naꞌ bej bzakaꞌ bengakan choc̱hj chlalj nis yejaꞌ,
naꞌ goshj wtin xan yabanaꞌ
naꞌ doxenz wyep yes.
18 Ḻoo beꞌ bdooṉnaꞌ goshj wtin ka wzoa yiꞌ wziwaꞌ,
naꞌ bzeeniꞌn doxen lo yell-lioni,
naꞌ yell-lioni wxoꞌ wṉiban.
19 Bsaljoꞌ nezaꞌ gchoḻ nisdoꞌnaꞌ
naꞌ wdioꞌ lawinnaꞌ,
per kono billeli ganaꞌ bx̱oa xṉezoꞌnaꞌ.
20 Benoꞌ beṉꞌkaꞌ nak yell c̱hoꞌ lallꞌ naꞌ dii Moisézaꞌ len dii Aarónnaꞌ,
naꞌ bic̱hiꞌogakeꞌ ka beṉꞌ zinc̱heꞌ xilꞌdoꞌ c̱heyin.