Salmo 76
1 X̱ancho Chiozaꞌ ḻe zeyi c̱heꞌ ganaꞌ mbani Judánaꞌ;
naꞌ beṉꞌkaꞌ lleꞌ yell Israelaꞌ choeꞌgakeꞌ dillꞌ nan nakeꞌ beṉꞌ choo beṉꞌ xen.
2 Lill xḻatjeꞌnaꞌ zoan lo Yaa Siónnaꞌ,
daa zoa yell Jerusalénnaꞌ.
3 Naꞌ nanꞌ bxoxj btineꞌ yogꞌḻoḻ yesyakaꞌ bṉiayi beṉꞌkaꞌ wdiḻ-len ḻeꞌ.
4 Chios c̱haꞌ,
ḻe zeyi c̱hoꞌ napoꞌ balaaṉ xen inlleb,
naꞌ nakchoꞌ beṉꞌ choo beṉꞌ xench ka yaa yeḻkaꞌ zoa kaniꞌteyi.
5 Beṉꞌkaꞌ nak ḻiizelozi beṉꞌ wal bikzbi gok gongakeꞌ naꞌ blliayoo ḻegakeꞌ,
naꞌ zeelo wbangakeꞌ.
6 Chios c̱haꞌ,
beṉꞌ beꞌlaꞌo dii Jacobaꞌ,
ka bwall bsheboꞌ ḻegakeꞌ
bich gok saꞌ ni karret c̱heꞌkaꞌ ni kabay c̱heꞌkaꞌ.
7 ¡Yogꞌ beṉꞌ chall chllebgakeꞌ liꞌ!
Kokzno chzo chzaki liꞌ katꞌ chlloo.
8 Yabanaꞌ ganaꞌ lliatioꞌ bc̱hogloꞌ c̱he beṉꞌ.
Naꞌ yogꞌ beṉꞌ yell-lioni bllebgakeꞌ naꞌ wzoagakeꞌ llizə,
9 ka wzoloꞌ bc̱hogbiꞌo c̱he beṉꞌ
naꞌ bisloꞌ beṉꞌkaꞌ wxakꞌziꞌ lo yell-lioni,
Chios c̱haꞌ.
10 Daa chbekwllioꞌ yeḻꞌ chllaa chlok c̱he beṉꞌ malkaꞌ,
choeꞌlaꞌo beṉꞌ liꞌ;
naꞌ beṉꞌkaꞌ chila lao yeḻꞌ zakꞌziꞌ c̱hoꞌnaꞌ koogakeꞌ liꞌ balaaṉ.
11 Ḻi wc̱heb bin weꞌleꞌ X̱ancho Chiozaꞌ
naꞌ ḻi weꞌtieꞌn;
naꞌ yogꞌ beṉꞌ yellkaꞌ ṉdil nllag yell c̱heꞌnaꞌ
chiyaḻꞌ weꞌgakeꞌ daa chidoḻꞌ ikaa beenaꞌ chiyaḻꞌ gall illebcho.
12 Ḻaꞌ ḻenꞌ chsi chc̱hogueꞌ yeḻꞌ mban c̱he beṉꞌkaꞌ chṉabiaꞌ;
naꞌ chwall chshebeꞌ beṉꞌ wṉabiaꞌ xenkaꞌ lleꞌ lo yell-lioni.