Salmo 75
1 Choṉntoꞌ liꞌ yeḻꞌ chox̱ken,
Chios c̱haꞌ.
Choṉntoꞌ liꞌ yeḻꞌ chox̱ken daa zoalenoꞌ netoꞌ.
Naꞌ choeꞌntoꞌ dillꞌ c̱he yogꞌ diikaꞌ chonoꞌ,
diikaꞌ chon ka chibani beṉꞌ.
2 X̱ancho Chiozaꞌ neꞌ:
“Llanaꞌ wlliaꞌ biaꞌ,
wc̱hogloaꞌ c̱he to to beṉꞌ kon ka chiyaḻꞌ gakan.
3 Nadꞌ chzoac̱hec̱hꞌ yell-lioni lo leninnaꞌ katꞌ chxoꞌ chṉiblenan beṉꞌkaꞌ lleꞌ llaꞌ lawinnaꞌ.”
4 Naꞌ chepꞌ beṉꞌ llaljkaꞌ naꞌ beṉꞌ malkaꞌ:
“Bi gakle beṉꞌ chaꞌsib;
5 ni bi gonlenle yeḻꞌ wak c̱helenaꞌ llalj
naꞌ ni bi shep shaꞌlallꞌle katꞌ chshaljle.”
6 Ḻaꞌ kono beṉꞌ zoa ganaꞌ chlaꞌlə wbillaꞌ ni ganaꞌ chxoalan,
ni ganaꞌ bibi chashj chḻeb,
beṉꞌ gak goneꞌ beṉꞌ choo beṉꞌ xen sto beṉꞌ yoblə.
7 San Chiozanꞌ chc̱hogbiꞌe c̱he beṉꞌ:
baḻeꞌ chsiꞌe yeḻꞌ ztoꞌ naꞌ zi baḻeꞌ choneꞌ beṉꞌ choo beṉꞌ xen.
8 Yeḻꞌ zakꞌziꞌ daa wseḻꞌ X̱ancho Chiozaꞌ
zaklebin vinonaꞌ daa ba golcha,
daa yoll ḻoo kopaꞌ nox̱ee.
Naꞌ katꞌ wlaljeꞌn lo yell-lioni,
yogꞌḻoḻ beṉꞌ malkaꞌ lleꞌ lawinnaꞌ sakꞌziꞌgakeꞌ ax̱t ga zeelo.
9 San nadꞌ,
toshiizi wiꞌa dillꞌ c̱he Chiozaꞌ,
beenaꞌ beꞌlaꞌo dii Jacobaꞌ,
naꞌ goḻ iṉiaꞌneꞌ.
10 Ḻaꞌ ḻenꞌ wlliayee yeḻꞌ chep chaꞌlallꞌ c̱he beṉꞌ malkaꞌ,
san beṉꞌ wenkaꞌ zizikli goneꞌ ḻegakeꞌ beṉꞌ choo beṉꞌ xen.