Salmo 74
1 Chios c̱haꞌ,
¿bic̱he ba wchooṉlallꞌzoꞌ netoꞌ?
¿Atoshiizin illoo netoꞌ nakntoꞌ lallꞌ noꞌ?
2 Jadini daa ba zejteyi wlejoꞌ netoꞌ kwenc̱he nakntoꞌ lallꞌ noꞌ,
naꞌ bisloꞌ netoꞌ kwenc̱he gakntoꞌ yell c̱hoꞌ.
Jadini yaa Siónni gani non lill xḻatjoꞌ.
3 Dakachi wiꞌo ganaꞌ gok lill xḻatjoꞌ,
ba bido bilenan wlliayiꞌ.
Beṉꞌkaꞌ chakziꞌ chakzbani liꞌ ba bc̱hiṉjgakeꞌn.
4 Naꞌ besyaagakeꞌ ganaꞌ wcheꞌ lill xḻatjoꞌnaꞌ daa chibagakileꞌ ba bengakeꞌ gan,
naꞌ ba bzoagakeꞌn bander c̱heꞌkaꞌ.
5 Bengakileꞌ lilloꞌnaꞌ ka beṉꞌ chxoxj chtin yag wag ga lleꞌ llaꞌ yag.
6 Kon yowag naꞌ kon marr bxoxj btingakeꞌ yogꞌ diikaꞌ nak de yaglaꞌ,
diikaꞌ bliꞌn xochi ḻoo lill xḻatjoꞌnaꞌ.
7 Bzey btegakeꞌ lill xḻatjoꞌnaꞌ,
naꞌ bṉitgakeꞌ balaaṉ c̱he latjaꞌ ganaꞌ zoꞌ
naꞌ bido bilenten bc̱hiṉjgakeꞌ.
8 Naꞌ bc̱hoglallꞌgakeꞌ yisol yiṉitgakeꞌ netoꞌ;
naꞌ bzeygakeꞌ yogꞌḻoḻte latjkaꞌ ganaꞌ chdop chllagntoꞌ choeꞌlaꞌontoꞌ liꞌ gani mbanintoꞌ.
9 Bich bi de dii chliꞌn zoakzoꞌ ladjntoꞌni;
ni sto beṉꞌkaꞌ chyix̱jee daa chiꞌo ḻegakeꞌ bich zoa,
naꞌ ni bi ṉezintoꞌ bat yiyoll yido diiki chak c̱hentoꞌ.
10 Chios c̱haꞌ,
¿bat yiyoll yido wtitji beṉꞌki chakziꞌ chakzbani netoꞌ?
¿Bat yiyoll yido kwell iṉegakeꞌ zban c̱hoꞌ?
11 ¿Bic̱he ki chliꞌo yeḻꞌ wak choo yeḻꞌ wak xen c̱hoꞌnaꞌ naꞌ gaklenoꞌ netoꞌ?
¿Bic̱he bikz bi chonoꞌ?
12 Kaniꞌteyi linꞌ chṉabiꞌo nadꞌ,
Chios c̱haꞌ;
naꞌ linꞌ chisloꞌ beṉꞌ yell-lioni.
13 Linꞌ benoꞌ nisdoꞌnaꞌ c̱hoplə kon yeḻꞌ wak choo yeḻꞌ wak xen c̱hoꞌnaꞌ,
naꞌ blliayoo ba zṉiakaꞌ chda ḻoo nisdoꞌnaꞌ.
14 Blej bshoshjoꞌ yic̱hjbkaꞌ,
naꞌ bzaḻoo ḻegakb lao ba zṉiakaꞌ lleꞌ ganaꞌ bibi chashj chḻeb naꞌ wdaogakb ḻegakb.
15 Liꞌ benoꞌ ka gol nisaꞌ ḻoo bejdoꞌkaꞌ naꞌ byalj yaokaꞌ,
naꞌ bzeejoꞌ yao xenkaꞌ.
16 Linꞌ wloo tellanaꞌ naꞌ waḻaꞌ
naꞌ linꞌ bzoꞌ bewaa naꞌ wbillaꞌ.
17 Linꞌ wloo biaꞌ ganaꞌ zeelo biyoll yell-lioni
naꞌ ḻekzkaꞌ wloo laꞌo banaꞌ naꞌ beoꞌkaꞌ chbeꞌ dii zagaꞌ.
18 Bi gaḻ-lalloo,
Chios c̱haꞌ,
ka btitji beṉꞌkaꞌ chakziꞌ chakzbani liꞌ,
naꞌ ka zban wṉe beṉꞌkaꞌ bi nteyi c̱hoꞌ.
19 Bi weꞌgachoꞌ latj gakntoꞌ lallꞌ naꞌ beṉꞌkaꞌ nak ka bell zṉia,
daa nakntoꞌ beṉꞌ gax̱jlallꞌ ka to ngolbex.
¡Bi gaḻ-lalloo ka chzakꞌziꞌntoꞌ,
netoꞌ nakntoꞌ yell c̱hoꞌ!
20 Jadini daa bc̱heboꞌ gonoꞌ c̱hentoꞌ,
ḻaꞌ gani mbanintoꞌ,
ax̱t ganaꞌ zeelon,
lleꞌchgan beṉꞌ zeshꞌ beṉꞌ zban.
21 Bich wiꞌo latj beenaꞌ chzakꞌziꞌ siꞌe yeḻꞌ ztoꞌ.
Ben kwenc̱he beṉꞌ yeshaa naꞌ beenaꞌ chzakꞌziꞌ weꞌlaꞌogakeꞌ liꞌ.
22 ¡Bliꞌ yeḻꞌ wak c̱hoꞌnaꞌ,
Chios c̱haꞌ!
Wzoshyiꞌ beṉꞌkaꞌ chllaa liꞌ.
Jadini ka chon beṉꞌkaꞌ bi nteyi chbell chṉegakeꞌ c̱hoꞌ yogꞌ lla.
23 Bi gaḻ-lalloo belbannaꞌ chgoo beṉꞌkaꞌ chakziꞌ chakzbani liꞌ,
naꞌ diikaꞌ zekizezi chbell chṉegakeꞌ c̱hoꞌ.