Salmo 73
Libr wyoṉi
(Salmos 73—89)
1 Dii ḻicha,
wen inlleb choni Chiozaꞌ netoꞌ beṉꞌ Israel,
netoꞌ chzenagntoꞌ c̱heꞌ do yic̱hj do lallꞌntoꞌ.
2 Per ka nak nadꞌ,
zi latꞌzə ki wlaa lo xṉez Chiozaꞌ,
naꞌ ixopꞌ lao dii malaꞌ,
3 daa wzelallaa gak wen c̱haꞌ ka chak c̱he beṉꞌ chaꞌsibkaꞌ,
ka bleꞌidꞌ ḻe wen chak c̱hegakeꞌ,
len naktegakeꞌ beṉꞌ wen dii mal.
4 Bibi de dii nzoaziꞌyaan ḻegakeꞌ;
naꞌ mbalaz zoagakeꞌ shiꞌa shaoꞌ.
5 Aga bi dii zed chen chleꞌgakileꞌ ka chak c̱he beṉꞌ yoblə,
ni bibi yeḻꞌ zakꞌziꞌ nombiaꞌgakeꞌ.
6 Chliꞌ chze c̱hegakeꞌ nakgakeꞌ beṉꞌ chaꞌsib,
naꞌ bi chiyii chidogakileꞌ chliꞌ chzegakeꞌ yeḻꞌ zeshꞌ yeḻꞌ zban c̱heꞌkaꞌ.
7 Ḻoo yic̱hjlalldoeꞌkaꞌ lleꞌ llanꞌ dii malaꞌ ax̱t llian choꞌalaweꞌkaꞌ,
naꞌ wdeteli lawin nakgakeꞌ beṉꞌ mal.
8 Chtitj chtangakileꞌ beṉꞌ,
naꞌ chbell chṉegakeꞌ zban c̱hegakeꞌ;
nakgakeꞌ beṉꞌ chaꞌsib naꞌ chgooshebgakeꞌ beṉꞌ gongakeꞌ mal c̱hegakeꞌ.
9 Chbell chṉegakeꞌ c̱he Chiozaꞌ,
beenaꞌ llia yabanaꞌ,
naꞌ ḻekzkaꞌ chbell chṉegakeꞌ c̱he beṉꞌ.
10 Naꞌ ḻe chak c̱he beṉꞌ yell-lioki c̱hegakeꞌ
naꞌ chajḻeꞌtezgakeꞌ daa cheꞌgakeꞌ.
11 Naꞌ beṉꞌ malkaꞌ nagakeꞌ:
Chiozaꞌ,
beenaꞌ nak ḻiizelozi beṉꞌ choo beṉꞌ xen,
bi ṉez nḻeꞌileꞌ dga choncho ni bi chakbeꞌileꞌ.
12 Beṉꞌ malki,
aga bi yeḻꞌ zakꞌziꞌ chen chleꞌgakileꞌ,
naꞌ zizikli chgol yeḻꞌ wniꞌa c̱heꞌkaꞌ.
13 Naꞌ nadꞌ chakidꞌ bikz bi zejin nxi nyech yic̱hjlallꞌdawaani,
naꞌ chonꞌ daa nak wen.
14 Ḻaꞌ toshiizi chen chleꞌidꞌ yeḻꞌ zakꞌziꞌkaꞌ.
15 Sheḻꞌ nadꞌ wṉiaꞌ ka chṉegakeꞌ,
naꞌ bx̱iṉj bḻenꞌ yic̱hjlallꞌdoꞌ beṉꞌkaꞌ nak xiiṉoꞌ,
sheḻꞌkaꞌ.
16 Ka benꞌ to dii byen shajniidꞌ dga,
lallj inlleb gokidaan,
17 ax̱t galjch wyoꞌa ganaꞌ choeꞌlaꞌocho Chiozaꞌ,
kanaꞌch wyajniidꞌ ka gak c̱he beṉꞌ malkaꞌ.
18 Dii ḻicha ba bzoꞌ ḻegakeꞌ lo nezaꞌ ganaꞌ ibix̱gakeꞌ,
naꞌ ba bdegakoꞌneꞌ ganaꞌ kwiayiꞌgakeꞌ.
19 Tokonganzi illin lla kwiayiꞌgakeꞌ,
naꞌ dii wal inlleb gall illebgakeꞌ ka guetgakeꞌ.
20 Ka to yel dii wṉeyi beṉꞌ naꞌ bi chjtinileꞌ bin nan,
kaꞌ gak beṉꞌ malkaꞌ lawoꞌnaꞌ,
Chios c̱haꞌ,
bi lljadiniloꞌ ḻegakeꞌ.
21 Ḻe ziꞌ goki yic̱hjlallꞌdawaani daa chwiaꞌ chak wen c̱he beṉꞌ malkaꞌ,
naꞌ ḻe gokyeshiin.
22 Ḻaꞌ daa bi wyajniidꞌ gokꞌ ka bayix̱ꞌ,
ba bi nteyi lawoꞌnaꞌ.
23 Per toshiizi zoalenoꞌ nadꞌ naꞌ chaklenoꞌ nadꞌ.
24 Liꞌ ngoo nadꞌ lo nez ḻi c̱hoꞌnaꞌ,
naꞌ wllin lla koo nadꞌ balaaṉ.
25 ¿Noran zoa yabanaꞌ gakleneꞌ nadꞌ shi aga linꞌ?
Naꞌ daa zoalenoꞌ nadꞌ bichbi de lo yell-lioni dii chzelallaa.
26 Ḻaꞌkzi chax̱ꞌ chde c̱he beli chen c̱haꞌni,
Chiozaꞌ chtipeꞌ lallaa,
naꞌ ḻenꞌ zoaleneꞌ nadꞌ toshiizi,
naꞌ bich bi chyallj chc̱hinidꞌ.
27 Beṉꞌkaꞌ chḻaalaꞌo liꞌ kwiayiꞌgakeꞌ,
naꞌ wlliayoo beṉꞌkaꞌ bi chzoa xtilloonaꞌ.
28 San nadꞌ,
goni Chios c̱haꞌneꞌ,
ḻaꞌ ḻennanꞌ zeelo nak dii wen.
Nonꞌ lez gap wwia X̱ancho Chiozaꞌ nadꞌ,
naꞌ wiꞌa dillꞌ c̱he yogꞌ diikaꞌ ba beneꞌ.