Salmo 72
1 Chios c̱haꞌ,
bliꞌgachi beenaꞌ ba bzoꞌ iṉabiꞌe netoꞌ
kwenc̱he goneꞌ daa nak shḻi,
ka chonoꞌ.
2 Naꞌ kaꞌ wc̱hogbiꞌe ka chiyaḻꞌ gak c̱he to to netoꞌ nakntoꞌ yell c̱hoꞌ
naꞌ c̱he beṉꞌ yeshꞌdoꞌkaꞌ.
3 Doxen ganaꞌ chṉabiꞌe soashgagakeꞌ mbalaz
naꞌ gatꞌ daa nak yeḻꞌ ḻi yeḻꞌ shaoꞌ ladjeꞌkaꞌ.
4 Naꞌ beenaꞌ chṉabiaꞌ gakleneꞌ beṉꞌ yeshꞌkaꞌ,
naꞌ yisleꞌ beṉꞌkaꞌ kono zoa gaklen ḻegakeꞌ,
naꞌ wlliayee beṉꞌkaꞌ chc̱hiꞌ chsakꞌ beṉꞌ.
5 Toshiizi iṉabiꞌe.
Shlak ni chzeeniꞌ wbillaꞌ len beoꞌdoꞌnaꞌ iṉabiꞌe.
6 Gongacheꞌ ka gak wen c̱he yell c̱heꞌnaꞌ,
ka chon nis yejaꞌ naꞌ xelj zagaꞌ,
chyilgakan lo yell-lioni len diikaꞌ chashj chḻeb lawinnaꞌ.
7 Naꞌ soa beṉꞌkaꞌ chṉabiꞌe mbalaz
naꞌ gatꞌ daa nak yeḻꞌ ḻi yeḻꞌ shaoꞌ ladjeꞌkaꞌ shlak iṉabiꞌe,
ax̱t ni ka te c̱he beoꞌdoꞌnaꞌ.
8 Naꞌ iṉabiꞌe dezd ganaꞌ chxe nisdoꞌnaꞌ ax̱t ganaꞌ zeelo chiyollan,
naꞌ ḻekzkaꞌ ganaꞌ chxe yao Éufratezaꞌ ax̱t ganaꞌ zeelo chiyoll chido yell-lioni.
9 Naꞌ beṉꞌkaꞌ chakziꞌ chakzbangakileꞌneꞌ,
beṉꞌkaꞌ lleꞌ ganaꞌ bibi chashj chḻeb,
wc̱hekꞌ xibeꞌkaꞌ laweꞌnaꞌ yiyonyeshꞌgakeꞌ.
10 Naꞌ beenaꞌ chṉabiaꞌ Társizaꞌ naꞌ beenaꞌ chṉabiaꞌ beṉꞌkaꞌ lleꞌ choꞌa nisdoꞌnaꞌ,
len beṉꞌkaꞌ chṉabiaꞌ Sabánaꞌ naꞌ Sébanaꞌ,
yidwaꞌgakeꞌ laweꞌnaꞌ daa chzangakileꞌ
naꞌ daa chidoḻꞌgakeꞌ c̱hixjgakeꞌ.
11 Yogꞌḻoḻ beṉꞌ wṉabiaꞌkaꞌ wc̱hekꞌ xibeꞌkaꞌ laweꞌnaꞌ,
naꞌ beṉꞌkaꞌ lleꞌ yogꞌḻoḻ yellkaꞌ wzoagakeꞌ xtillee.
12 Ḻaꞌ ḻenꞌ yisleꞌ beṉꞌ yeshꞌkaꞌ,
beṉꞌkaꞌ chṉab yeḻꞌ goklennaꞌ,
naꞌ beṉꞌkaꞌ kono zoa gaklen ḻegakeꞌ.
13 Yiyeshꞌlallileꞌ beṉꞌkaꞌ chyallji yeḻꞌ goklennaꞌ
naꞌ yisleꞌ yeḻꞌ mban c̱heꞌkaꞌ.
14 Yisleꞌ ḻegakeꞌ lo naꞌ beṉꞌ zeshꞌ beṉꞌ zbankaꞌ chsakꞌziꞌ ḻegakeꞌ,
ḻaꞌ yeḻꞌ mban c̱heꞌkaꞌ nakan to dii zakii laweꞌnaꞌ.
15 ¡Beenaꞌ chṉabiaꞌ ibanshgueꞌ ssha!
Weꞌshgagakeꞌneꞌ oraꞌ daa zaꞌ Sabánaꞌ.
Naꞌ bi wsangakeꞌ iṉabgakeꞌ c̱heꞌ lao Chiozaꞌ
kwenc̱he gak wen c̱heꞌ toshiizi.
16 Gatꞌ kweꞌshga daa yiziꞌ yilapgakeꞌ doxente ganaꞌ mbanileꞌ;
gashj iḻebgachan lo yaakaꞌ,
ka chashj chḻeb diikaꞌ chazgakeꞌ ganaꞌ mbani Líbanonaꞌ;
naꞌ seshga do zan inlleb lawinkaꞌ ka lleꞌ llaꞌ yix̱ꞌkaꞌ lyix̱aa.
17 Lljadinshgagakileꞌ toshiizi beenaꞌ chṉabiaꞌ,
naꞌ seshgayi c̱heꞌ toshiizi ax̱t katꞌ te c̱he wbillaꞌ.
Yogꞌḻoḻ beṉꞌ lleꞌ doxen zbii zkaaṉ yell-lioni gak wen c̱hegakeꞌ ni c̱heꞌ,
naꞌ iṉagakeꞌ c̱heꞌ:
“¡Chakomba beeni!”
18 Weꞌlaꞌoshga yogꞌ beṉꞌ Chiozaꞌ,
beenaꞌ nak X̱ancho,
choꞌ beṉꞌ Israel,
beenaꞌ zeelo chon diikaꞌ chon ka chibani beṉꞌ.
19 Toshiizi weꞌlaꞌoshga beṉꞌ X̱ancho Chiozaꞌ,
beenaꞌ nak beṉꞌ choo beṉꞌ xen,
naꞌ doxen yell-lioni wliꞌlao balaaṉ xen c̱heꞌnaꞌ.
Kanꞌ gakan.
20 Ni chiyoll xtillꞌ dii Davínaꞌ,
xiiṉ Isaínaꞌ,
daa beꞌḻwilleꞌ Chiozaꞌ.